SULAT HIKARUWA KAN TIMUTI
2 TIMUTI
Pahāti
In sulat ini amuna in hinapusan sin manga sulat hi Paul. Ha waktu siya nagsulat ha ini, kiyakarinahan siya ha lawm jīl sabab sin pagnasīhat niya sin Baytaꞌ Marayaw pa manga mānusiyaꞌ. Nagsusūng na in waktu patayun siya sin tau bangsa Rūm. (Kitaa ha bāb 4, ayat 6)
Hangkan hi Paul nagsulat nagbalik kan Timuti ha supaya diꞌ mabugtuꞌ in paghinduꞌ iban pagnasīhat hi Timuti sin Baytaꞌ Marayaw pasal hi Īsa Almasi. Laung hi Paul kan Timuti, subay niya bawgbugan in hinang kiyabugsuꞌ kaniya minsan da unu in haggut-pasuꞌ kumugdan kaniya.
Bicharahun hi Paul in pasal sin hugut sin parachaya iban pangandul niya ha Almasi, in kasabal niya sumandal sin unu-unu haggut-pasuꞌ kumugdan kaniya iban sin kasi-lasa niya. Amu yan in kabayaan niya pasinguran kan Timuti.
1
In Salam-duwaa hi Paul
1 In sulat ini naug dayn kākuꞌ hi Paul hambuuk tau kiyawakilan hi Īsa Almasi dayn ha kabayaan sin Tuhan. Kiyawakilan aku magpamahalayak pa manga mānusiyaꞌ pasal sin kabuhiꞌ sabunnal, amu in kiyajanjiꞌ sin Tuhan pa tau katān naghahambuuk iban hi Īsa Almasi.
2 In sulat ini hipasampay ku mawn kaymu Timuti, karnaꞌ biyaꞌ na tuud kaw anak ku kalasahan.
Mura-murahan bang mayan kaw dihilan tulung-tabang, iban kaulungan, lāgiꞌ dihilan kasannyangan in lawm atay mu kaagi sin Tuhan, Amaꞌ natuꞌ, iban sin Panghuꞌ natuꞌ, hi Īsa Almasi.
Pasal sin Pagsarang-sukul pa Tuhan iban Manga Kabtangan Hipagpakamdus sin Pangatayan
3 Magsarang-sukul aku pa Tuhan, amu in piyagtataatan ku tuud mabuntul biyaꞌ sin pagtaat sin manga kamaasan ku. Ha sakahabaꞌ ku mangarap pa Tuhan dūm-adlaw piyapangayuan ta kaw duwaa pa Tuhan, lāgiꞌ magsarang-sukul aku kaniya sabab karnaꞌ mu. 4 Bang ku katumtuman in pagtangis mu (ha waktu kapagbutas ta), magtūy aku bayaan dumā magkitaꞌ kaymu ha supaya kumuyag in lawm atay ku. 5 Way ku kiyalupahan sin in pangandul mu ha Almasi bunnal tuud biyaꞌ da sin pagpangandul sin apuꞌ mu babai, hi Luyda, iban sin inaꞌ mu hi Yunisa. Lāgiꞌ sampay pa bihaun tantu tuud masi bunnal in pangandul mu kaniya. 6 Hangkan dayn ha sabab yan, hipatumtum ku kaymu sin subay mu pasūngun in ingat kapandayan dīhil kaymu sin Tuhan ha waktu kadupun ku sin lima ku ha ū mu nangayuꞌ duwaa pa Tuhan. 7 Karnaꞌ in Rū sin Tuhan, amu in piyahūp niya kātuꞌ, walaꞌ dimihil kātuꞌ sin pangatayan mabugaꞌ, sagawaꞌ dīhilan kitaniyu sin Rū sin Tuhan sin pangatayan mahugut iban makusug. Lāgiꞌ dīhilan niya kitaniyu sin atay baynglasahun iban dīhilan da isab kusug supaya natuꞌ diꞌ dūlan in hawa-napsu sin baran natuꞌ.
8 Ayaw kaw masipug mamaytaꞌ ha manga tau pasal sin hinduꞌ hi Panghuꞌ Īsa. Damikkiyan ayaw kaw masipug ha pasal ku, minsan aku yari najīl ha pasal sin pagbawgbug ku ha Almasi. Gām mayan agad kaw sandal sin manga kabinsanaan dumatung ha manga tau amu in mamawgbug sin baytaꞌ marayaw pasal sin Almasi. Sandali in manga kabinsanaan dumatung kaymu karnaꞌ dayn ha kusug dīhil sin Tuhan kaymu. 9 Siya in nanglappas kātuꞌ, iban siya in nagpīꞌ kātuꞌ ha supaya mahinang sukuꞌ niya. Walaꞌ kitaniyu pinīꞌ niya sabab sin nahinang natuꞌ marayaw, sagawaꞌ dayn ha sabab sin maksud niya tumabang kātuꞌ manga mānusiyaꞌ. In tabang yan asal niya kiyarihil na kātuꞌniyu dayn ha waktu walaꞌ pa naawn in unu-unu katān, iban asal dayn kan Īsa Almasi matabuk natuꞌ in tabang yan. 10 Na, bihaun in tabang yan napanyataꞌ na kātuꞌniyu, sabab nakakari na pa dunya in manglalappas kātuꞌniyu hi Īsa Almasi. Piyaawn niya na in dān sin hikapuas sin mānusiyaꞌ dayn ha kamatay, amu in kasiksaan salama-lama ha narkaꞌ, iban dayn ha baytaꞌ marayaw pasal sin Almasi piyaingat niya na kātuꞌniyu sin ha adlaw mahuli karihilan kitaniyu sin ginhawa-baran, amu in diꞌ na magkamatay, lāgiꞌ awn na kabuhiꞌ natuꞌ salama-lama.
11 Na, in aku napīꞌ sin Tuhan, iban kiyawakilan hi Īsa Almasi manghinduꞌ iban magpamahalayak sin Baytaꞌ Marayaw. 12 Na, dayn ha sabab yan numanam aku sin manga kabinsanaan ini, sagawaꞌ minsan bihādtu, diꞌ ku da hikasipug in hinang daakan kākuꞌ, sabab kaingatan ku da bang hisiyu in piyangangandulan ku sin ginhawa-baran ku. Lāgiꞌ natatantu ku sin jagahan niya dayn ha kamulahan in hinang daakan kiyabugsuꞌ niya kākuꞌ sampay maabut in adlaw pagbalik niya mari.
13 Gunggungi in hinduꞌ kasabunnalan kiyahinduꞌ ku kaymu, amu in suntuan subay agarun mu. Iban pataptapa in īman mu kan Īsa iban kalasahi in pagkahi mu, sabab in ikaw agad kan Īsa Almasi. 14 Lāgiꞌ bawgbugi tuud in manga hinduꞌ kasabunnalan kiyapangandul kaymu sin Tuhan. In Rū sin Tuhan, amu in yari himuhūp ha lawm atay natuꞌ, amu in tumabang kaymu mamawgbug.
15 Na, tantu kiyaingatan mu da isab sin piyasāran aku sin manga Almasihin ha hulaꞌ Asiya, sampay hi Pigilus kay Hirmugin.
16 Samantaraꞌ mura-murahan bang mayan kaulungan sin Tuhan in anak-asawa iban sin katān ha lawm bāy hi Nipurus, sabab nakamataud niya aku bisita, iban nakarihil siya kākuꞌ kakuyagan. Walaꞌ niya aku kiyasipug minsan aku yari najijīl. 17 Gām mayan pagkari niya pa dāira Rūm, magtūy siya naglawag kākuꞌ. Walaꞌ siya himundung naglawag sakaynu niya aku walaꞌ kiyabaakan. 18 Mura-murahan bang mayan siya kaulungan sin Tuhan bang maabut na in adlaw pagbalik mari sin Almasi. Minsan ku diꞌ na hibaytaꞌ kaymu, asal kaingatan mu da in tabang niya kākuꞌ duun ha dāira Ipisus.