SULAT PA MANGA HIBRANI
HIBRANI
Pahāti
In sulat ini diꞌ matantu bang hisiyu tuud in nagsulat, sagawaꞌ kaingatan dayn ha luun sin sulat ini, sin hisiyu-siyu na in tagsulatan ha ini. In pasampayan niya manga Yahudi, amu in nimananam kasigpitan iban kabinsanaan pasal sin pagꞌagad nila ha Almasi. Hangkan biyaꞌ agun-agun nila na butawanan in pagꞌagad nila ha Almasi. Na, in maksud sin sulat ini tumabang magpahugut sin parachaya iban pangandul sin manga Almasihin kan Īsa Almasi. In baytaꞌ ha lawm sulat ini magpaingat sin in katān kiyabaytaꞌ pasal hi Īsa Almasi tantu tuud bunnal, lāgiꞌ duun na kaniya tumubtub in unu-unu katān kabayaan sin Tuhan hipaingat ha manga mānusiyaꞌ.
1
In Nagpasampay sin Parman sin Tuhan amuna in Anak Tuhan
1 Manjari, sin masa nakauna yadtu, nakamataud in Tuhan nagparman pa manga kaapuꞌ-apuan natuꞌ naug dayn ha manga nabi, lāgiꞌ mataud in ginisan sin dān pagpasampay sin Parman niya. 2 Sagawaꞌ ha masa bihaun, amu in tagnaan na sin kahinapusan sin masa natuꞌ, in nagpasampay sin Parman sin Tuhan mari kātuꞌniyu, amuna in Anak Tuhan. Siya da isab in nagpapanjari sin katilingkal ālam iban sin katān luun niya dayn ha kabayaan sin Tuhan. Lāgiꞌ in unu-unu katān ha katilingkal ālam asal kiyapusakaꞌ kaniya sin Tuhan. 3 Duun kaniya kakitaan in sahaya iban sipat sin Tuhan, karnaꞌ in siya iban Tuhan magsibuꞌ tuud. Siya da isab in tagkaputan sin katilingkal ālam, iban dayn ha sabab sin kusug sin kawasa sin Parman kapagbayaan niya in unu-unu katān ha katilingkal ālam. Iban pagꞌubus niya mayan hīnang in dān sin hikaampun sin manga dusa sin mānusiyaꞌ, nagbalik na siya pa surgaꞌ, ampa siya limingkud ha dapit pa tuu sin Tuhan amu in sangat-kawasa, karnaꞌ kiyabugsuꞌ na kaniya sin Tuhan in kawasa magbayaꞌ ha unu-unu katān.
Labi tuud Makawasa hi Īsa Almasi dayn ha Manga Malāikat
4 Na, labi tuud makawasa in Anak Tuhan dayn ha manga malāikat, sabab minsan sadja in gulalan kaniya sin Tuhan labi mataas dayn ha gulalan ha manga malāikat. 5 Karnaꞌ walaꞌ in Tuhan nakapagparman pa manga malāikat niya sin biyaꞌ ha ini amu agi,
“In ikaw Anak ku.
Iban bihaun aku na in Amaꞌ mu.”
Damikkiyan walaꞌ da isab in Tuhan nakapagparman sin pasal ini ha tungud sin hisiyu-siyu na malāikat, amu agi,
“In aku Amaꞌ mu,
iban in ikaw Anak ku.”
Sagawaꞌ in Tuhan nagparman ha yan pa amu in Anak niya. 6 Lāgiꞌ marayꞌ mayan palahilun sin Tuhan pa dunya in Anak niya amu in sangat-kawasa, nagparman siya pa manga malāikat, amu agi,
“In kamu katān manga malāikat ku subay sumumba kaniya.”
7 Sagawaꞌ ha pasal sin manga malāikat, biyaꞌ ha ini in Parman sin Tuhan, amu agi,
“In manga malāikat daraakun ku sadja,
miyamagad sadja sin daakan ku biyaꞌ sin hangin iban kāyu.”
8 Samantaraꞌ ha pasal sin amu in Anak niya, ini in kiyaparman sin Tuhan, amu agi,
“In pagsultan mu, ya Tuhan, tumatas kasaumulan.
Mabuntul tuud in pamarinta mu ha manga tau.
9 In kabayaan mu in unu-unu mabuntul, iban marugal kaw ha unu-unu mangīꞌ.
Na, hangkan dīhilan kaw sin Tuhan mu kakuyagan iban kalagguan, amu in labi tuud dayn sin dīhil niya ha manga panāiban mu.”
10 Nagparman pa isab in Tuhan pa amu in Anak niya, amu agi,
“Ikaw, Panghuꞌ, in nagpapanjari sin dunya
iban sin katilingkal ālam dayn ha panagnaan. Ikaw da in naghinang, way dugaing.
11 In dunya iban ālam ha susūngun malanyap da, sagawaꞌ in ikaw diꞌ mapinda kasaumulan.
Biyaꞌ da sila sin tamungun dumaan, diꞌ na kalagihan.
12 Hibugit mu na in manga yan biyaꞌ sapantun tamungun daan,
ampa mu gantian sin baꞌgu.
Sagawaꞌ in ikaw diꞌ magkapinda,
iban wayruun kahinapusan sin kabuhiꞌ mu.”
13 In Tuhan walaꞌ tuud nakapagparman pa hisiyu-siyu na malāikat biyaꞌ sin kiyaparman niya ha amu in Anak niya, amu agi,
“Lingkud kaw dī ha dapit pa tuu ku
sampay ku daugun in katān kimukuntara kaymu.
Mahinang sila biyaꞌ paggigiikan sin siki mu.”
14 Na, pagga biyaꞌ ha yan, unu in manga malāikat? Na, in manga malāikat, daraakun sadja sin Tuhan. Diꞌ sila kakitaan, sagawaꞌ sila in naraak sin Tuhan tumabang ha manga tau katān amu in makataymaꞌ sin kalappasan dayn ha Tuhan.