1 'A ‑tɩ, ‑a 'nɩ 'we 'le 'yuo꞊pli ye, 'ke 'o Nyɩsʋa a 'hru wlɔn, kɛɛ, ‑ba mu ye 'mʋ, ‑ba 'nyɩ Nyɩsʋa a wintɛ ꞊nʋ, ‑ɛ blɛ nahuin ꞊nʋ ye, ‑ʋ kuu 'le Nyɩsʋa a wintɛ 'nyɩ 'mʋ. ‑Tɛ ‑a ꞊tu la ‑Yusu a ꞊wlʋ a yekuolɛ ‑wlu, ye‑hɛ‑tɔplɩ ꞊nʋ, ‑a 'nyɩ la, ‑a kɔ ‑ba ‑hi lɛ, ‑ba 'nyɩ ‑tɔplɩ gblakɩ ‑ye, 'ke 'o ‑Yusu 'Klɩsʋ a ‑ta 'mʋ. Ye‑hɛ‑tɔplɩ a ‑gbɛ, ‑ɩ kɔ ‑tɩ 'nɩɩ ꞊tu, nɩ‑ mɔ: Nahuin kɔ bʋ hie 'o dɛ 'kuku a nunue gbo, ‑ɛɛ 'le 'kʋkʋɛ ya, kɔ, ʋ kɔ bʋ ‑nyi 'waa ꞊wlɩ 'bii Nyɩsʋa. 2 'Ke 'le ye‑hɛ‑tɔplɩ a ‑gbɛ ‑hɛyri, ɛ kɔ dɛ ‑ye, 'ʋ nye tɔɔ, 'ke 'o 'nie a 'lupupue a ‑ta 'mʋ, kɔ nahuin a dabʋɩ a 'lugbopupue, 'ke 'le Nyɩsʋa a 'dʋ 'kwli 'mʋ, kɔ, ‑tɛ Nyɩsʋa di nu, ɔ 'mʋ 'le nahuin 'kʋkʋnyʋ ‑hɛyri ‑ha, ɔ 'mu 'klɔ ‑ha, kɔ, ‑tɛ ɔ di 'waa ‑bati a lɛpupue nu, 'lelɛ'bɔɔti 'yri. 3 ‑A kɔ ‑ba ‑hi ‑tɔplɩ a ‑gbɛ lɛ, ‑ba mu ye 'mʋ, ‑ɛ die nu, 'mʋ 'a mʋ ‑tɔplɩ yrayrɩ tɔɔ. Kɛ'ɛ nɩ, ‑ba nu 'a nunue, 'ke 'le Nyɩsʋa a 'klɩ 'kwli 'mʋ.

4 'Bɩa ꞊baa lele ye‑hɛ‑tɔplɩ tɔɔ, ɛ 'die 'le ‑wɛ bɛ ‑hɛ nahuin 'mʋ, ‑ɛ nue, 'bɩa nahuon 'bɔ ‑nyi 'a dɩɔnʋ Nyɩsʋa, 'plɩɩ 'bɔ plee 'le Nyɩsʋa ke, ‑ye ɛ 'die 'le ‑wɛ, 'ke bʋ ‑hɩɔ 'mʋ, bɔ ‑nyi lele 'a dɩɔnʋ Nyɩsʋa. Nahuon a ‑gbɛ, ɔ 'ye Nyɩsʋa a ‑nyrɛ nɩ, 'plɩɩ Nyɩsʋa 'ɔ nu ꞊nɔ ꞊hapʋdɛ 'mʋ 'dɔ, 'ɔ ‑nyi ‑wɛ ꞊nɔ 'a ‑Hihiu. 5 Nahuon a ‑gbɛ, ɔ yie nɩ, ‑ɛ mɔ, Nyɩsʋa a wintɛ, ɛ mɔ ꞊hapʋwiin nɩ, Nyɩsʋa 'ɔ ‑nyi ꞊nɔ 'a 'klɩ a kenɩnɩɛ ꞊nʋ, ‑ɛ ‑hɔn 'le 'a 'klɔ yrayrʋ ꞊nʋ 'mʋ, ‑ɔ di 'le di. 6 Nahuon 'bɔ nɩ 'o, 'bɔ kuo ‑tɔplɩ 'bii a ‑gbɛ ꞊wlʋ ye, 'plɩɩ 'bɔ plee 'le Nyɩsʋa ke, ‑ye ɛ 'die 'le ‑wɛ, 'ke bʋ ‑hɩɔ 'mʋ, bɔ ‑nyi lele 'a dɩɔnʋ Nyɩsʋa, ‑ɛ nue, 'bɔ plee 'le Nyɩsʋa ke, ‑ye ɛ 'we ꞊nɔ ye, ‑tɛ bɔ 'nɩnɩ kɔɔ wɛn 'o lele Nyɩsʋa a 'Yu tu 'yie 'mʋ, bɔ 'nɩnɩ ꞊tuo wɛn tanɩ, 'ke 'o nahuin 'bii ye.

7 ꞊Bo pue ‑ci a dɛ ye. 'Bɩa 'nu 'bʋʋ di, 'dɩdɔ‑tɔplɩ 'bɩ ꞊ga, 'bɩ tʋ, 'ke 'le ‑ci 'kwli 'mʋ, ‑ye ɛ ꞊hɛn 'nyrɛ, Nyɩsʋa po ‑ci a ‑gbɛ ‑wɔn wa. 8 Kɛɛ, 'bɩa ‑ci a ‑gbɛ, 'bɛ ꞊gaa 'witi, 'bɛ nyre 'a 'dɩdɔ‑tɔplɩ 'yi lɛ, ‑ye ‑ci a ‑gbɛ, ɛ 'de ‑kʋan kɔ. ‑Ye ɛ ꞊hɛn 'nyrɛ, Nyɩsʋa ‑wɛ lɛ kɛ 'a 'jrɔ a ‑wɔnpupue. ‑Ye ‑ci a ‑gbɛ, ɛ di 'nɩ 'yrɔ. 'A ‑tɩ, ‑ba 'we ꞊nɔ ꞊hapʋ‑ci ꞊nʋ ye.

9 'Na 'dɩayuo ‑a, ꞊hapʋkɔ, ꞊aa lɛ 'pʋprɛ nu, kɛɛ, ‑a yie nɩ ‑tɛɛ, ‑ɛ mɔ, a ‑mɛ ‑ye, ꞊hapʋ'hru, nʋ‑ aa na, kɔ, dɛ, ‑ɛ di 'le ꞊nɔ 'kwli 'mʋ ‑hɔn, nɛ‑ mɔ, Nyɩsʋa di 'a mʋ 'nɩ waa. 10 ‑Kʋan ꞊nʋ, a nu, 'a ‑hɛ 'a nɩ 'bienʋ ‑Yusu a nahuin 'mʋ, 'a ‑tɩ 'deɛ bɩ ‑hri Nyɩsʋa ‑wɔn. Ɛ ꞊hɛn 'nyrɛ, a ‑hɛ 'a nɩ 'bienʋ ‑Yusu a nahuin 'mʋ nɩ, kɔ, 'a 'kɩɛ ‑hɩʋ 'mʋ. Nɛ‑ nye ‑a mʋ tɔɔ, ‑ɛ mɔ, a nʋɛ Nyɩsʋa 'mʋ nɩ. Gbegbe, ɔ 'deɛ bɔ ‑hri ꞊hapʋdɛ a ‑gbɛ a ‑tɩ ‑wɔn, ‑ɛ nue, ɔ 'sii 'o ye. 11 ‑A nye 'nɩ ‑hʋa, ‑tɛ a 'blee 'o kwa, 'ke ba 'kɩɛ 'blee 'o kwa, ɛ 'mue gba ‑gbagba, 'lelɛ'bɔɔ‑nyrɔwɔ ꞊nʋ, ɔ 'mʋ 'o nyre. A nɩ sɩa 'le, ‑ɛ die nu, ‑tɔplɩ 'bii ꞊nʋ, a kuo ꞊wlʋ ye, kɔ, aa ‑pre, a 'mui kɔ. 12 'A nɩ 'klɩ nɩ ‑wɛ 'le 'le, kɛɛ, nahuin ꞊nʋ, ‑ʋ kuo Nyɩsʋa ꞊wlʋ ye, kɔ, ‑ʋ kɔ ꞊wlʋ a 'lɩla, ba ‑ha 'le 'waa ꞊pɩ lɛ. Nahuindʋ a ‑gbɛ, nʋ‑ Nyɩsʋa di dɛ ꞊nʋ ‑nyi, ɔ pue 'le ꞊nʋ.

13 A yie nɩ, ‑ɛ mɔ, ti ‑hi la a ti 'yri, Nyɩsʋa po la 'le Abrahamʋ dɛ. ‑Tɛ ɔ pue la 'le, ‑ye ɔ 'sʋɛ la nɩ, ‑ɛ mɔ, ɔ di la dɛ a ‑gbɛ 'nɩ nu. Nahuon ꞊de 'de 'o Nyɩsʋa 'mʋ ‑hi, Nyɩsʋa bɔ di 'sʋʋ. 'A ‑tɩ, 'a ‑gbɛ a 'dʋ 'kwli 'mʋʋ nɩ, ɔ 'sʋʋ 'le. 14 ‑Tɛ ɔɔ la 'sʋʋ, kɛ ɔɔ la Abrahamʋ ye po, ɔ nɔ: «'N 'sʋ nɩ, ‑ɛ mɔ, 'n di ‑mʋ 'mʋ nu ꞊hapʋdɛ. 'N die 'nɩ nu, ‑na 'yuo a 'yuo, ʋ 'mʋ wlo.» 15 ‑Tɩ ꞊nʋ, Nyɩsʋaa la Abrahamʋ ye ꞊tu, ɔ kui la ye ꞊wlʋ ‑tɛɛ, 'ɔ nyi la ‑pre, 'ke 'le ꞊wlʋ a 'lɩla 'kwli 'mʋ. Ɛ nue, 'ɔ 'ye ‑tɔplɩ a ‑gbɛ, Nyɩsʋa pue la 'le ꞊nɔ.

16 Nahuin 'bʋʋ 'sʋʋ, nahuon ꞊nʋ, ‑ɔ nɩʋ 'o 'lu ye, nɔ‑ kɔ 'dʋ 'kwli 'mʋ, ʋʋ 'le 'sʋʋ. 'Sʋʋlɛdʋ a ‑gbɛ, nɛ‑ nye nu, 'ɛ nɩ ‑tɩ 'ɩɩ 'le ‑wɛ. 17 Nɛ‑ nue, Nyɩsʋa 'ɔ 'sʋɛ. Ɔ nye 'nɩ ‑hʋa, 'ke nahuin ꞊nʋ, ɔ pue 'le dɛ, bʋ yrie 'mʋ lɛ, ‑ɛ mɔ, dɛ ꞊nʋ, ɔ pue 'le ꞊nʋ, ɔ 'deɛ bɔ 'cɩcɩɛ. Nɛ‑ nue, 'ɔ pue 'le ꞊nʋ, 'plɩɩ 'ɔ 'sʋɛ la. 18 'A ‑tɩ, ‑tɔplɩɩ 'hɔn a ‑gbɛ, ‑ɩ mɔ 'lepoodɛ, kɔ 'sʋʋlɛ 'hɛɛn, ɔ 'deɛ bɔ pui 'le hɩ 'kwli 'mʋ. 'A ‑tɩ, ‑a mʋ ‑gbo, ‑ʋ 'ye ‑hliilɛ, 'ke 'o Nyɩsʋa 'hʋɩn 'mʋ, ‑tɔplɩɩ 'hɔn a ‑gbɛ, nɩ‑ɩ ‑a mʋ 'klɩ ‑nyi, 'ke dɛ ꞊nʋ, Nyɩsʋa pue 'le ‑a mʋ, ‑a nye ‑pre, 'ke 'le ꞊wlʋ a yekuolɛ 'kwli 'mʋ. 19 Dɛ ꞊nʋ, ‑aa ‑pre, nɛ‑ 'ble ‑a mʋ kwa, nɛ‑ nye nu, ‑a nɩ ꞊wlʋ 'ʋ ku gbo, 'ke 'o Nyɩsʋa ye, ‑ɛ 'we ꞊nɔ ye, ‑tɛ 'mɩɩ a duu nu, 'bʋ pu 'nie 'mʋ, 'ʋʋ 'mɩɩ kwa 'ble. Dɛ a ‑gbɛ, nɛ‑ nye nu, danʋ ꞊nʋ, ‑ʋʋ Nyɩsʋa a gbonɩɩlɛ ꞊nʋ ‑hli, 'ke 'le 'a 'kagblaka gbo, ‑ɔ nɩ 'le yakɔ 'mʋ, 'ʋ ꞊ga wlɔn, 'ke 'o ‑a mʋ ‑wɔn, ꞊aa 'le ‑tɛgbi ꞊nʋ pa, ‑tɛ Nyɩsʋa nɩ 'o. 20 ‑Yusu, nɔ‑ 'nyɛ 'hru, 'ɔ pa 'le ‑tɩtɛ, 'ke 'o ‑a nɩ ‑ta 'mʋ, ‑ɛ nue, nɔ‑ ‑hɛ Nyɩsʋa a ‑cɔhlʋnpinyɔ gblaka, ‑tɛ 'klɔ tɛ ye gbo, ‑ɛ 'we ꞊nɔ nahuon ꞊nʋ ye, ‑ɔ kɔ 'dʋ mɔ Mɛkisɩdɛkɩ.