8
‑Yusu, nɔ‑ mɔ ‑a nɩ ‑cɔhlʋnpinyɔ gblaka, nɔ‑ nue, ‑a kɔ Nyɩsʋa 'hɛɛn, ꞊a ‑mʋɛ
1 Dɛ gblaka ꞊nʋ, 'nɩɩ ‑hʋa ꞊bo le 'a mʋ, nɛ‑ ‑gbo: ‑Tɩ ‑gbo, 'n ꞊tu wɛn, ɩ nye ‑a mʋ 'nɩ tɔɔ, ‑tɛ ‑a nɩ ‑cɔhlʋnpinyɔ gblaka ‑Yusu nɩ 'mʋ. Nɔ‑ɔ ‑a mʋ 'mʋ ‑hɛ. Nyɩsʋa ꞊nʋ, ‑ɔ kɔɔ 'ɛ nɩ dɛ ꞊de win ke, nɔ‑ kɔ diidɛpɩa ke ‑Yusu nɩ 'o gbo, 'ke 'le yakɔ 'mʋ.
2-3 ‑A yie nɩ, ‑ɛ mɔ, ‑cɔhlʋnpinyʋ 'bii, ‑ʋ nɩ nɔ ‑tʋtʋ ke, 'waa ‑kʋan, nɔ‑ mɔ, bʋ nu 'wlugba‑tɔplɩ, bʋ pi Nyɩsʋa a ‑cɔhlʋn, kɔ ‑nyinyi‑tɔplɩ ‑ye, ʋʋ Nyɩsʋa ‑nyi. 'Bɩa 'bʋʋ ‑cɔhlɩn a ‑gbɛ mu pi, 'ke ʋʋ 'le Nyɩsʋa a kayu ꞊nʋ gbo pa, ‑tʋnahuin po. ‑Yusu ‑mɛ ‑ye, 'a ‑kʋan, ɔ 'nɩ nuo ꞊le 'le Nyɩsʋa a kayu ꞊nʋ gbo, ‑tʋnahuin po. Kɛɛ, 'ke ɔ nyo 'le Nyɩsʋa a ꞊hapʋkayu ꞊nʋ gbo nuu, ‑ʋ nɩ 'le yakɔ 'mʋ, ‑ʋ mɔ kayu ꞊nʋ, Nyɩsʋa a ‑gbɛ, ɔ po. ‑Ye 'klɛɛ, ‑tɛ ‑Yusu 'ya ‑a nɩ ‑cɔhlʋnpinyɔ 'mʋ, ɔɔ nu Nyɩsʋa a ‑cɔhlʋnpi‑kʋan. 4 Kɛɛ, ɔ 'nɩ nu ꞊le ‑kʋan a ‑gbɛ, kɛ nɔ 'klɔ ‑gbo ke, ‑ɛ nue, ɛ kɔ ‑cɔhlʋnpinyʋ, 'ʋ nɩ nɔ 'klɔ ‑gbo ke, 'ʋʋ ‑cɔhlʋnpi‑kʋan nu, ‑ɛ 'we ꞊nɔ ye, ‑tɛ Moise a teteii 'a ꞊tutue nu.
5 Nyɩsʋa a kayu ꞊nʋ, ‑ʋ kɔ gbo ʋʋ 'le ‑kʋan nuu, ti ꞊nʋ ‑kɔ 'yri Moise nyu la 'o mu poo, kɛ Nyɩsʋa puo la ye, ɔ nɔ: «꞊Tue 'yie ‑tɛɛ, ‑ɛ die nu, ‑tɛ 'n nu ‑mʋ 'a tɔɔlɛ, kɛ nɔ dʋgba ‑gbo 'lu, ꞊mʋ lɛ 'a pupue nu.» Dɛ a ‑gbɛ, ɛ ꞊hɛn 'nyrɛ, Nyɩsʋa a kayu ꞊nʋ, Moise po la, ʋ kɔ ‑cɔhlʋnpi‑kʋan 'hɛɛn, ‑ɔ kɔ ‑tɩ Moise a teteii ꞊tu, ɩ mɔ ‑tɔplɩ ꞊nʋ, ‑ɩ nɩ 'le yakɔ 'mʋ a ye'wedɛ'ɛ nɩ. Kɛɛ, ‑tɔplɩ ꞊nʋ, ‑ɩ nɩ 'le yakɔ 'mʋ, nɩ‑ mɔ ꞊hapʋ‑tɔplɩ.
6 'A ‑tɩ, ‑a nye 'nɩ 'ye, ‑ɛ mɔ, ‑Yusu a ‑cɔhlʋnpi‑kʋan, ɔɔ nu, 'ke 'le yakɔ 'mʋ, ɔ ‑hi 'o ‑Juukʋɛ a ‑cɔhlʋnpinyʋ a ‑kʋan 'mʋ nɩ. 'Ke ‑Yusu nɩ 'o Nyɩsʋa kɔ ‑tʋnahuin 'hɛɛn a ‑gbahlɔn, Nyɩsʋa 'ɔ ꞊tue 'yrɩ yrayrɩ, ɔ kɔ ‑tʋnahuin 'hɛɛn. 'Yrɩ yrayrɩ a ‑gbɛ, ɩ ‑hi 'o ye‑hɛyrɩ ꞊nʋ 'mʋ nɩ, ‑ɛ nue, 'ke 'le 'yrɩ yrayrɩ a ‑gbɛ 'kwli 'mʋ, ‑tɔplɩ ꞊nʋ, Nyɩsʋa po la lɛ, ɔ di la nu, ɩ nɔ lɛ 'yi, 'ɩ ‑hi 'o ‑tɔplɩ ꞊nʋ 'mʋ, ɔ nu la ti ‑hi la a ti 'yri. 7 'Bɩa ye‑hɛyrɩ ꞊nʋ, Nyɩsʋa ꞊tue la, ɔ kɔ ‑tʋnahuin 'hɛɛn, 'bɩ ꞊cɛɛ la 'o ye, ‑ye ɔ 'deɛ bɔ ꞊tue wɛn 'o lele 'yrɩ yrayrɩ ‑ye, ɔ kɔ ‑tʋnahuin 'hɛɛn. 8 Kɛɛ, ‑a nye 'nɩ 'ye, ‑ɛ mɔ, ye‑hɛyrɩ a ‑gbɛ, ɩ 'de la 'o ye ꞊cɛɛ. Nɛ‑ nue, Kʋkɔnyɔ Nyɩsʋa 'ɔɔ la 'a nahuin ‑tɩ yɛɛ, 'ke 'o 'waa dɛ 'kuku a ‑ta 'mʋ. Kɛ ɔɔ la ꞊nʋ ye po, ɔ nɔ:
«Ɛ di kɔ ti, ‑ɩ kɔ 'yri 'n di 'o 'yrɩ yrayrɩ ꞊tue,
'n kɔ Judakʋɛ a ꞊tugba kɔ Yisraɛkʋɛ a ꞊tugbɩ 'bii 'hɛɛn.
9 Ti ‑hi la a ti 'yri,
‑tɛ 'n klɩ la 'waa bunʋ dabʋ ye,
'n ‑hɩʋ la 'le ꞊godɛ ‑gbahlɔn,
'ke 'le Esipʋblʋgba 'mʋ,
ti a ‑gbɛ 'yri, 'n ꞊tue la 'yrɩ, 'n kɔ ꞊nʋ 'hɛɛn.
Kɛɛ, 'yrɩ yrayrɩ ‑gbo, 'n di ꞊tue, 'n kɔ ꞊nʋ 'hɛɛn,
ɩ di nɩ 'dɔ.
'Yrɩ ꞊nʋ, 'n ꞊tue la, 'n kɔ ꞊nʋ 'hɛɛn,
ʋ 'di 'o ꞊tuu. Nɛ‑ nue, 'nɩ hiu 'o gbo.
'Mɔ ‑gbo, ‑ɔ mɔ 'waa Kʋkɔnyɔ,
'mɔɔ nɩ, ‑ɔɔ lɛ 'pʋprɛ nu.
10 'Yrɩ yrayrɩ ꞊nʋ, 'n di ꞊tue,
'n kɔ Yisraɛkʋɛ 'hɛɛn,
‑tɛ ɩ di 'mʋ nɩ, nɛ‑ ‑gbo:
'N die 'nɩ nu, ʋ 'mʋ 'na tetei yi,
'mui ‑wɛ 'crɩɩ, 'ke 'le 'waa ꞊wlɩ ke.
'N di 'ya 'waa Nyɩsʋa, ʋ 'mʋ 'na nahuin 'mʋ 'ya.
11 Ɛ 'deɛ bɛ kɔ 'klɛɛ lele nahuon,
‑ɔ di 'a 'be kɔ 'a 'dɩayu tɔɔ,
‑ɛ mɔ, bʋ yi Nyɩsʋa,
‑ɛ nue, kʋɛ 'o 'yu ke gbo, ‑bo yɛ kukunyɔ,
ʋ 'bii a ‑gbɛ, ʋ di 'mʋ 'nɩ yi.
12 'N di 'waa dɛ 'kuku 'nɩ 'wʋwla,
kɔ, 'mʋ ‑wɛ 'waa dɛ 'kuku a ‑gbɛ a ‑tɩ ‑wɔn ‑hri.»
13 Kɛ Nyɩsʋa nu la 'yrɩ yrayrɩ a ‑tɩ a ꞊tutue. Ɛ ꞊hɛn 'nyrɛ, ye‑hɛyrɩ ꞊nʋ, ɩ 'de 'klɛɛ lele 'klɩ kɔ. ‑A yie nɩ, ‑ɛ mɔ, dɛ ꞊nʋ, ‑ɛ 'de 'klɛɛ lele ‑kʋan kɔ, kɔ, ‑ɛ 'nɩnɩ ‑hɛ nahuon 'mʋ, ɛ ‑wɛ lɛ kɛ gbo‑wʋwɛ.