1 'A mʋ ‑Yusu a nahuin, ba 'cipi 'o, ba nʋnʋɛ 'mʋ. 2 'Dagbɩ ꞊nʋ, ‑ʋʋ 'le 'a mʋ ‑wɔn pa, ba 'blu kwa. ‑Tɩ a ‑gbɛ, ɩ nɩ ‑hri 'le 'a mʋ ‑wɔn. Nɛ‑ nahuin ‑ye nu la, 'ʋ 'ble la Nyɩsʋa a lɛleenyʋ kwa ‑tɛɛ. Kɛɛ, ʋ ‑mɛ ‑ye, ʋ 'di la yi, ‑ɛ mɔ, Nyɩsʋa a lɛleenyʋ'ʋ nɩ. 3 Nahuin ꞊nʋ, ‑ʋ nɩ 'le ꞊jɩ 'mʋ, ba po 'waa ‑tɩ ꞊wlʋ ‑wɔn, ‑ɛ 'we ꞊nɔ ye, ‑tɛ a kɔ ꞊nʋ 'hɛɛn, ba 'nɩnɩ nɩ wɛn 'le ꞊jɩ 'mʋ. Nahuin ꞊nʋ, ʋʋ ꞊sʋɛ ꞊tue, ba po ‑wɛ 'waa ‑tɩ ꞊wlʋ ‑wɔn, ‑ɛ 'we ꞊nɔ ye, ‑tɛ a kɔ ꞊nʋ 'hɛɛn, ba 'nɩnɩ 'ye wɛn ꞊sʋɛ.

4 Nahuin 'bii, bʋ ꞊tuu 'o wintɛ ꞊nʋ 'o, Nyɩsʋa ꞊tu, 'ke 'o 'blɩ a ‑ta 'mʋ. Nyrʋgba, ꞊nɩ hie 'le 'o ‑na tɔ gbo, ꞊nɩ nu 'le ‑wlawli. Tɔ, ꞊nɩ hie 'le ‑wɛ 'o ‑na nyrʋgba gbo, ꞊nɩ nu 'le ‑wɛ ‑wlawli. Ba kɔ 'a yiyie, nahuin ꞊nʋ, ‑ʋʋ dɛ a ‑gbɛ nu, Nyɩsʋa diu lɛ poo ‑bati, kɔ, ɔ 'mʋ ‑wɛ nahuin ‑ye ꞊nʋ ‑bati lɛ poo, ‑ʋʋ 'lalu nu.

5 'Wliyɛ a 'mʋnʋɛlɛ nɩ kɔɔ 'le 'a mʋ win ke. 'A nɩ ꞊wlɩ nɩ bi 'le ꞊hlɔn, 'ke 'o dɛ ꞊nʋ, a kɔ a ‑ta 'mʋ, ꞊betɩ bɛ 'de ‑huo. Kɛ Nyɩsʋaa po, ɔ nɔ: «'N kɔ ꞊bo kikle ‑mʋ lɛ. 'Klɔ ‑wɔn, 'n 'deɛ ꞊bo hie 'o ‑mʋ gbo.» 6 ‑Tɛ Nyɩsʋa nu lɛ 'a ꞊tutue, 'ke 'le 'a mʋ ‑hɛyri, 'ɛ nɩ nahuon ‑wɛ 'le bɔ ꞊tui nɩ, 'ke 'le ꞊wlʋ a yekuolɛ 'kwli 'mʋ, ‑ɛ mɔ:

7 Ye‑hɛnahuin ꞊nʋ, ‑ʋʋ la 'a mʋ naa, 'ke 'o Nyɩsʋa a 'hru wlɔn, ‑ʋʋ la 'a mʋ Nyɩsʋa a ‑tɩ ye ꞊tu, a nɩ ‑hri 'le 'waa ‑tɩ ‑wɔn. 'Waa 'yrinaabʋɩ, kɔ 'kʋkʋɛdʋ ꞊nʋ, ʋ 'kʋ, 'a ‑tɩ bɩ bi 'le 'a mʋ 'kwli 'mʋ. Ba kuo Nyɩsʋa ꞊wlʋ ye, ‑ɛ 'we ꞊nɔ ye, ‑tɛ ʋ nu la 'a ꞊wlʋ a yekuolɛ. 8 ‑Tɛ ‑Yusu 'Klɩsʋ nɩ la 'mʋ, kɛ'ɛ nɩ, ɔ 'kɩɛ nɩɛ kɛ 'mʋ. ‑Tɛ 'klɔ tɛ ye gbo, kɛ'ɛ nɩ, ɔ 'kɩɛ die 'mʋ nɩ. Gbegbe, ɔ 'deɛ bɔ 'cɩcɩ. 9 Ba ꞊tu 'a nɩ dɩɔnʋ 'yie, ‑ɛ nue, ɛ kɔ nahuin ‑ye, 'ʋʋ ‑tɔplɩ yrayrɩ tɔɔ, ‑ɩ nɩnɩ 'dɔdɔ lɛ. ‑Tado, ʋ die 'nɩ nu, a 'mʋ Nyɩsʋa a 'hru bʋ wlɔn ‑ha. Kɛ ʋʋ po: 'Ke 'o didi‑tɔplɩ ke, ba kʋɛ tetei ‑ye ‑wɔn, ‑ɛ die nu, 'a nɩ ꞊wlɩ 'mʋ 'klɩ kɔ. ‑Tɩ ꞊nʋ, ʋʋ ꞊tu, a nɩ pui 'le nʋa ye gbo, ‑ɛ nue, dɛ ꞊nʋ, ‑ɛɛ ‑tʋnahuon a ꞊wlʋ 'klɩ ‑nyi, nɛ‑ mɔ ꞊hapʋdɛ ꞊nʋ, Nyɩsʋa nyo 'mʋ nu, 'ke 'le ‑gbʋgbɛkɔ 'kwli 'mʋ. Ɛ 'de dɛ ꞊nʋ, ‑aa di, ‑hee' ‑a 'nɩnɩ di, ɛ 'nɩ ‑nyi ꞊le ‑tʋnahuon a ꞊wlʋ 'klɩ. Nahuin ꞊nʋ, ‑ʋʋ 'o teteidʋ a ‑gbɛ 'o ꞊tuu, tetei a ‑gbɛ, ɩ 'nɩ ‑hɩʋ ꞊le 'mʋ gbe.

10 ‑A mʋ ‑gbo, ‑ʋ kuo ‑Yusu 'Klɩsʋ ꞊nʋ ꞊wlʋ ye, ‑ɔ ‑hɛ ‑cɔhlʋn, ‑a nɩ dɛ 'kuku a ‑tɩ, ‑a mʋʋ nɩ, Nyɩsʋa, ɔɔ waa. Kɛɛ, nahuin ꞊nʋ, ‑ʋ 'kɩɛ ꞊tue 'o didi‑tɔplɩ a tetei 'o, 'plɩɩ ‑ʋ 'kɩɛ kʋɛ ‑Juukʋɛ a ‑tɔplɩ ‑wɔn, 'ke 'o ‑cɔhlɩn a pipie a ‑ta 'mʋ, Nyɩsʋa 'nɩ waa ꞊le ꞊nʋ. 11 ‑Nyrɔwɔɔ ‑do, 'ke 'le 'yrʋ 'kwli 'mʋ, ‑Juukʋɛ a ‑cɔhlʋnpinyɔ gblaka, 'ɔɔ 'wlugba‑tɔplɩ 'la, 'ke 'o Nyɩsʋa a ‑cɔhlʋn a ‑ta 'mʋ, 'ɔɔ 'wlugba‑tɔplɩ a ‑gbɛ a dablo gba, 'ɔɔ 'le Nyɩsʋa a kayu gbo pa, 'ke 'le 'a ‑gblo a 'hɔn a nɔnɔ 'mʋ, ‑ɛ die nu, ɔ 'mʋ Nyɩsʋa lɛ 'batɩ, 'ke bɔ 'wʋwla 'a nahuin a dɛ 'kuku. ‑Cɔhlʋn a ‑gbɛ, ʋ nyu 'mʋ ꞊tɩɔ 'dɩɔ, 'ʋ nyu 'tɔ po. 12 Kɛ'ɛ nɩ, ‑Yusu a dɛ nɩ la ‑wɛ 'mʋ. Ɔ wɛɛn ke, 'ke bʋ ꞊tɩɔ 'dɩɔ 'mʋ, bʋ 'lɔɔ 'o tu 'yie 'mʋ, ‑ɛ die nu, ɔ 'mʋ 'a dablo nu, ɔ 'mʋ 'a dakʋ a dɛ 'kuku 'wʋwla. 13 'A ‑tɩ, ‑a 'nɩ kʋɛ 'le 'klɛɛ lele ‑Juukʋɛ a dɛ ‑wɔn. Kɛɛ, ‑tɛ ‑Yusu 'Klɩsʋ nu, 'ɔ wɛɛn ke, 'ke bʋ ‑haa 'a ‑tɩ lɛ, ‑ba wɛɛn ‑wɛ ke, 'ke ‑ba ‑ha 'klɔ ‑gbo a ‑tɔplɩ mɛ lɛ, ‑ba kʋɛ ‑Yusu ‑wɔn, ꞊betɩ bʋ di ‑a nɩ ‑tɩ lɛ ‑haa, 14 ‑ɛ nue, kɛ nɔ 'klɔ ‑gbo ke, ‑a 'de nɔ ꞊hapʋ'dɩɔ kɔ, ‑ɔ hie 'klɔ. 'Ke ‑a nɩ ꞊hapʋ'dɩɔ nɩ 'le Nyɩsʋa 'hʋɩn 'mʋ, 'ke 'le ‑a mʋ ye 'mʋ. ꞊Hapʋ'dɩɔ a ‑gbɛ, nɔ‑ ‑aa lɛ ꞊mɔ.

15 'A ‑tɩ, ‑ba baa Nyɩsʋa, 'ɛ nɩ ti, kɔ, ‑ba ‑nyo 'wio, 'ke 'le ‑Yusu a 'dʋ 'kwli 'mʋ. Baalɛ ꞊nʋ, ‑a nyo baa, ɛ 'we ꞊nɔ ‑cɔhlʋn ye, ‑aa ‑ha, 'ke 'o Nyɩsʋa ‑wɔn, 'ʋ nye nahuin tɔɔ, ‑ɛ mɔ, ‑a mʋ mɔ 'a nahuiin nɩ. 16 Ba nu 'a nɩ 'bienʋ ‑tʋnahuin ꞊hapʋdɛ 'mʋ, kɔ, ba ‑hɩhɛ 'mʋ lɛ 'ɛ nɩ ti, ‑ɛ nue, ‑cɔhlʋndʋ a ‑gbɛ, nʋ‑ʋ Nyɩsʋa ke klɩɩ.

17 Ba ꞊tuu 'o 'a nɩ 'cʋɛ a ye'mʋnaanyʋ 'o. Ba po 'waa ꞊tɔwin nʋa ye gbo, ‑ɛ nue, nʋ‑ʋ 'a mʋ 'yie ꞊tu, ‑ɛ die nu, a 'nɩ ꞊han Nyɩsʋa a 'hru bʋ wlɔn ‑ha. 'Ɛ mɔ ‑tɛɛ, Nyɩsʋa diu wlɔn 'nɩ ꞊gba, ʋ 'mue klɛ ‑hɩhɩa, ‑tɛ ʋ nu 'waa ‑kʋan a nunue. 'A ‑tɩ, ‑tɛ ɛ nɩ lɛ 'mʋ, ba ꞊tuu 'o, ‑ɛ die nu, ʋ 'mʋ ‑kʋan nu, 'ke 'le 'manʋ 'kwli 'mʋ. 'Bɩa 'ba 'nɩnɩ ꞊tuu 'o, ‑ye 'waa ꞊wlɩ di bi ꞊hlɔn. 'Waa ꞊wlɩ 'bɩ bi ꞊hlɔn, ‑ye dɛ a ‑gbɛ, ɛ 'deɛ bɛ ‑hɛ 'a mʋ 'mʋ.

18 Ba 'cipi 'o, ba da Nyɩsʋa, 'ke 'o ‑a mʋ ‑wɔn, ‑ɛ die nu, ɔ 'mʋ ‑a mʋ 'mʋ ‑hɛ. ‑A yie nɩ, ‑ɛ mɔ, ‑a nɩ ꞊wlʋ 'nɩ yɛɛ ꞊le ‑a mʋ ‑tɩ. ‑A nye 'nɩ ‑hʋa 'ɛ nɩ ti, 'ke ‑ba nu ꞊hapʋdɛ. 19 Ba da ‑wɛ Nyɩsʋa, ‑ɛ die nu, ɔ 'mʋ 'mʋ 'hru ‑nyi, 'mʋ 'le 'a mʋ ‑wɔn di 'tata a ti 'yri.

20 Nyɩsʋa ꞊nʋ, ‑ɔɔ ‑a mʋ kegbowɛɛnlɛ ‑nyi, 'ke 'le ‑a nɩ ꞊wlɩ ke, nɔ‑ ‑ha 'le ‑a nɩ Kʋkɔnyɔ ‑Yusu 'kʋkʋnyʋ ‑hɛyri, 'ɔ ‑hɩɔ 'klɔ, 'ɔ nuo ‑a nɩ 'yie꞊tunyɔ gblaka 'mʋ. ‑Yusu a ‑gbɛ a dablo, nɔ‑ Nyɩsʋa nu, 'ɔ ꞊tue 'yrɩ yrayrɩ, ɔ kɔ ‑a mʋ 'hɛɛn. 'Yrɩ yrayrɩ a ‑gbɛ, ɩ di hie 'klɔ. 21 ‑Tɛ ɛ nɩ lɛ 'mʋ, Nyɩsʋa bɔ ‑nyi 'a mʋ 'klɩ, ‑ɛ die nu, a 'mʋ 'a ꞊wlʋ a dɛ nu. Nyɩsʋa a ‑gbɛ, nɔ‑ die nu, a 'mʋ dɛ ꞊nʋ nu, ‑ɛɛ ꞊nɔ ke klɩɩ, ‑ɛ nue, 'ke ‑Yusu 'Klɩsʋ nɩ 'le 'a nɩ ꞊wlɩ ke. 'A ‑tɩ, ‑Yusu 'Klɩsʋ bɔ kɔ ‑tɩ a 'yi'bʋaalɛ, ‑tɛ 'klɔ tɛ ye gbo. Kɛ'ɛ nɩ, bɛ nɩ 'mʋ.

22 'Na 'dɩayuo ‑a, 'nɩɩ 'a mʋ ‑wɔn 'nɩ 'crɩɩ, ‑ɛ die nu, 'mʋ 'a mʋ 'klɩ ‑nyi. 'Crɩɩnɩɛ ‑gbo, ɛ 'de lɛ hren. 'A ‑tɩ, 'nɩɩ 'a mʋ lɛ 'nɩ 'batɩ, ba 'ble 'a wintɛ kwa, 'ke 'le 'a nɩ ꞊wlɩ ke.

23 ꞊Bo le 'a mʋ: ‑A nɩ 'dɩayu Timote, ɔ 'de 'klɛɛ lele ꞊jɩ 'mʋ nɩ. Ʋ tɩɔ gbo. 'Bɩa 'bɔ nyre nɔ 'mʋ ‑wɔn 'tata a ti 'yri, 'bɩa 'nɩɩ 'a mʋ ye di ‑mrɛ, ‑ye ɔ kɔ 'mʋ 'hɛɛn, ‑a mʋ di 'le di.

24 'N ꞊gba 'a nɩ 'cʋɛ a ye'mʋnaanyʋ 'bii wlɔn lɛ, ʋ kɔ Nyɩsʋa a nahuin 'bii 'hɛɛn. Nyɩsʋa a nahuin, ‑ʋ nɩ 'le Yitaliblʋgba 'mʋ, ʋ ꞊gba ‑wɛ 'a mʋ wlɔn lɛ.

25 Nyɩsʋa bɔ nu a 'bii ꞊hapʋdɛ 'mʋ.