1 Palhɨɨp pɨx jañ ba tu jam aꞌgidhaꞌ bhaan dhi uꞌuan aapiꞌm jiñ jaaduñ na baꞌ moo bar daipuꞌ kaꞌ. Jich aꞌmkam japim tu daandaꞌ buiñor gu Dios na baꞌ gux bhaiꞌm kaiꞌchdham ñioꞌkiꞌñ guch Xoiꞌkam jotmodaꞌ bɨɨx kap aayaꞌ, gio nam baꞌ cham jax ji chɨꞌji joidham kɇɇji miꞌ puiꞌ ba jimiaꞌ guiꞌ nam kaayaꞌ, jaꞌp na jax aapiꞌm na pimɨt cham jax ji chɨꞌɨɨk kɇɇk miꞌ puiꞌ jii. 2 Puiꞌ pim xi kaiꞌchdhaꞌ sia buiñor gu Dios nam cham jich juandaꞌ gu jaꞌtkam nam jix buam tomaat nam cham tuꞌ kaꞌm tɨ nɨiꞌñ, nam guꞌ cham tuꞌ bɨɨx puiꞌp ɨlhiiꞌñdhaꞌ nach jax kaiꞌchdhaꞌ aach. 3 Ku guꞌ na guꞌr gɇꞌkam guch Xoiꞌkam, puiꞌ tu duñiaꞌ jax noꞌt ba tɨi. Jam palhbuiꞌñchuꞌndaꞌ sia aapiꞌm na pim jax jaꞌk miꞌ puiꞌ jiimdaꞌ na jax jix aaꞌ, gio na baꞌ cham tuꞌx buam jum duukam jam daam jimiaꞌ. 4 Guch Xoiꞌkam pɨx nar Gɇꞌkam buiñor jix bhaiꞌch chaat ich na jam palhbuiꞌñchuꞌ na pim miꞌ puiꞌ jiim na chich jax jam aaꞌñdhak, guiꞌ pɨx jam palhbuiꞌñchuꞌndaꞌ na pim gammɨjɨ miꞌ puiꞌ jiimdaꞌ. 5 Sia guch Xoiꞌkam pɨx jam palhbuidhaꞌ na pim baꞌ jaꞌxbuiꞌp jix chu joiꞌgɨꞌndaꞌ na jax gu Dios, gio na pim baꞌ jaꞌxbuiꞌp jix ñakooꞌndaꞌ gu tulhiiñaraꞌ nat jax jix ñakoo dɨɨlh guch Xoiꞌkam.

6 Aapiꞌm jiñ jaaduñ jich Xoiꞌkam bhaan, jix gɨꞌm jañ jaꞌpnip xi jam tɨɨdam bhaankam gu Gɇꞌkam jich Xoiꞌkam. Chaꞌpim mi bɨpnatdaꞌ gu jax chuꞌm jich Xoiꞌkam jɨɨgiꞌñdham noꞌ cham tu juanam, piam noꞌ cham miꞌ puiꞌ tu daaꞌñchuꞌ nach jax jam aagiꞌñ na pim tuiꞌñgɨdaꞌ. 7 Jix maat japim guꞌ na jax jaꞌk jum aaꞌ na pim miꞌ puiꞌ jiimdaꞌ, na pimɨt guꞌch chɨɨ aach na chich jax jaꞌk miꞌ puiꞌ jii nach jam buip tuꞌt na pim baꞌ aapiꞌm miꞌ puiꞌp tu dagiaꞌ. Tu juandaꞌ ich gammɨjɨ, cham tuꞌ nach miꞌ paiꞌ pɨx pu darkaꞌ. 8 Ni kuch puiꞌ pɨx jam taanɨt tu kuaꞌdaꞌ gu tuꞌ, guꞌ jaꞌpji nach jam sabaꞌndaꞌ. Jax dhui nach guꞌ gammɨjɨ tu juandaꞌ nabap tanoolh gio nabap tukaaꞌ, nach guꞌx mat kaꞌ nax xijai kaꞌ aapiꞌm jam bui na pim tuꞌ kɨꞌn jich xiispaꞌ. 9 Sia ku guꞌ maaxik jum aagɨt ɨp na pim jich xiispaꞌ sia tuꞌ na pim bhaan jum guꞌnguxiꞌñdhaꞌ gɨt, guꞌ ji nach guꞌ cham paiꞌ jax jam tɨtda. Dɨɨlh jach tu juanat duduakaꞌ, pu kaiꞌñkam jach pɨx dɨɨlh tu juandaꞌ na pim baꞌ aapiꞌm jich ñɨidhat miꞌ puiꞌp tu daaꞌñchuꞌndaꞌ. 10 Janoꞌ nach bhammɨp tuꞌt jam bui, jaꞌpni chich xi jam tɨɨdak na tu tuiꞌkaꞌ: Jaroiꞌ nax cho oodat cham aaꞌndaꞌ na tu juandaꞌ, puiꞌ mu oirɨdaꞌ cham tu kuaꞌdat. 11 Baꞌ aach puiꞌ tɇ kɇɇ na pim aapiꞌm jaiꞌ dhɨt pu cham tu juan, dai na pim gam darkaꞌ sap. 12 Dhiꞌ pu chuꞌm gu jaꞌtkam, aach yaꞌ dɨr pu ja tɨtda bhaankam gu Gɇꞌkam jich Xoiꞌkam nam tu juandaꞌ cham tuꞌ bhaan jax jim aagɨt nam baꞌ maiꞌchidhaꞌ tuꞌ nam aaꞌndaꞌ nam jɨꞌx duduakaꞌ.

13 Jiñ jaaduñ jich Xoiꞌkam bhaan, chaꞌpim jum oꞌjolhdhat jix kɨɨꞌp jum duukam xip tu duñiidhat gammɨjɨ. 14 Noꞌ jaroiꞌ maadɨt cham pu bua nach jɨꞌk jax kaiꞌch dhi uꞌuan taꞌm bhaan, jix xiꞌɨraam japim xi ñɨidhat cham mi bɨpnatdaꞌ na baꞌ bhaan maachidhat jix xiꞌɨraidhaꞌ ɨp dɨɨlh. 15 Ku guꞌ cham tuꞌ ji na pim moop jix bhaamkiꞌñdhaꞌ, iimdaꞌ pim ji nar jam jaduuñ jich Xoiꞌkam bhaan na baꞌ cham xiꞌ pɨk jix buam jum aaꞌndaꞌ.

16 Baꞌ gu Dios jich Gɨꞌkoraꞌ na buiñor jix bhaiꞌ tu tatdaꞌ pɨx jam aꞌm tɨ nɨidhidhaꞌ gammɨjɨ na pim baꞌx bhaiꞌm taatɨt tu oiꞌñkaꞌ, sia bɨɨx aixim bhaan nax bhaiꞌ tu jam jimdaꞌ. Guiꞌ pɨx jam bɨɨm jup tuiꞌñgɨdaꞌ gammɨjɨ.

17 Aañ Paablo, dɨɨlh jiñ ñob kɨꞌn jañich yaꞌ tu uaꞌna dai dhiꞌñi nañ bhaan jam tabuimgiꞌñ. Dhiꞌ baꞌ bhaan jix maatɨꞌ kaꞌ nañ aañ mu jam joochxiꞌñ dhi uꞌuan. Puiꞌ jaꞌk bua iñ guꞌ bɨɨx na jɨꞌk aañ jir jiñ uꞌuan, dɨɨlh jañ miꞌp xi chu uaꞌnaꞌ na paiꞌm tɨɨmoꞌ. 18 Baꞌ gu Gɇꞌkam jich Xoiꞌkam pɨx jam aꞌm tɨ nɨidhidhaꞌ gammɨjɨ bɨɨx jɨꞌmaꞌn aapiꞌm.