3
Kristo jama n mɔfɔm ni bukafɔm jɔrɛ
1 Ahin nɔaniɛ jɔjɔɔwa n ti nahɔrɛ wɔ, ka, sɔnɔ kɛrɛ bo i boro i nyi na i yo Kristo jama n mɔfɔ, i mi koro juma kpa lɛɛ. 2 Kristo jama n mɔfɔ ni, wɔ yo daka ka má i la ŋgasi be, na i ja bara kun n kpein, na i bita i ŋu, na i la tarabuŋu, na i yo sa bo i la anyunuyi. I ti ye ni ka i de wɔfɔm, na i koro kere minɛm Nyɛmɛ nɔaniɛ nyunyumi. 3 I ti má ye ni ka i nu nzan agaya, wara i ti aluwa korofɔ, ama, i yo i ŋu bɛnlɛ, na i koro tanalaifiɛ. I kaaki ti má ye ni ka i koro ŋwaa agaya. 4 Wɔ yo daka ka i koro bita i awurufɔm nyunyumi, na i ma i nbaam de i nɔaniɛ na bu ma i jirima deke kɛrɛ nu. 5 Dama nzɛn sɔnɔ koro bita má i awurufɔm, i mi yo sɛ koro bita Kristo jama n a? 6 I ti má ye ni ka i mi ti Yesu susufɔ fɔfɔrɛ, adena má i wura i ŋu kpiri na Nyɛmɛ di i jɔrɛ yo i ŋgbɛɛn kabo i yoori Sitana ni. 7 Wɔ kaaki ayo daka ka i mi ti sɔnɔ bo minɛm bo bu ti má Kristo jama n nufɔm ma i jirima, adena, má Sitana nya i taraabiri na i yo sa be bo i di nyinsɛ.
8 I ti sɔ ɔ fa kɔ Kristo jama n bukafɔm gusu dɔ. Wɔ yo daka ka bu ti minɛm bo bu la anyunuyi, na má bu yo anɔɔ nnyɔ nnyɔfɔm, na má bu nu nzan agaya, na má bu nyunu boro ŋwaa kpini su. 9 Wɔ yo daka ka bu subita Kristo jama n kereewa n bo Nyɛmɛ ayi akere n kenken, na bu la má ŋgasi be bu sunsunni nu. 10 I ti ye ni ka bu du mɔ fiiti bɛrɛ Kristo jama n bukafɔm ni na bu niɛ. Na nzɛn bu la má ŋgasi be, am ma bu yo bukafɔm n juma ni. 11 I ti sɔ ɔ nbaram gusu dɔ. Wɔ yo daka ka bu ti minɛm bo bu la anyunuyi, na má bu susaaki minɛ duma. Wɔ yo daka ka bu bita bu ŋu, na bu la dabuŋu deke n kɛrɛ nu. 12 Kristo jama n bukafɔ, i ti ye ni ka i ja bara kun n kpein, na i koro bita i nbaam, ni i dikafɔm nyunyumi. 13 Nyini bukafɔm bo bu yo bu juma na i kɔ atin su ni, bu kpini duma kpa ma bu ŋu wɔ, na bu kaaki koro jɔjɔ ni ahoresi kabo bu yo Yesu Kristo yarada ni.
Kereewa n bo Nyɛmɛ ayi akere Kristo jamam ni
14 Kabo m sukɛrɛ ahin kadasi n ma u ni, m la tama ka m bá u dɔ kisa. 15 Ama, nzɛn haari ma ba aba má nde, ahin kadasi ni má a si kabo wɔ yo daka ka Nyɛmɛ minɛm wo ti barasu a. Bɛrɛ ti Kristo jama n a, yiri n bo i wo bɛrɛ saŋga kɛrɛ n dɛɛm a, bɛrɛ bita i kereewa n bo i ti nahɔrɛ n kenken a, kabo sɔɔ fa seewa n ni i jantaraka n bita i kenken ni. 16 Be koro kete má ka ya nyɛmɛsu atin n bo i wo asiri nu la má aŋusu, ka o,
“Na wɔ kaaki adamande ayi i ŋu fofoe nu.
Na Nyɛmɛ Awiɛwiɛ Casi n akere ka wɔ yo sa bo i sun Nyɛmɛ nu.
Na Nyɛmɛ mɛrɛkɛm aŋu i.
Na i susufɔm n akɔ ajɔjɔ i jɔrɛ durunya n kɛrɛ nu.
Na durunya n nufɔm dɔŋgu ayo i yarada.
Na Nyɛmɛ afa i akɔ awo i bi aŋgoro, jirima kɛrɛ woobiri ni.”