1 Man Paul one ka Winaꞌam boodim ke ka m a Yesu Kiristo Tumtum ka li dol nyovur noziꞌelug line be Yesu Kiristo saꞌan. 2 M sobid gbauŋ kaŋa tisid Timoti one liebi m binoŋir la.

Ti Baꞌ Winaꞌam ne ti Zugsob Yesu Kiristo na tis uf yelsum ne nimbaanlzoor ne sumalisim.

3 M puꞌusid Winaꞌam bareka one ka m dol ne popielim wenne m yaaname da dol siꞌem la. Saŋa wusa m tenꞌesidi ya yela m Winsosugin. 4 M pu tami fu susaꞌaŋ la yela, ka bood hale yuꞌuŋ ne nintaŋ wusa ye m nye uf ka mor sumalisim. 5 M tenri fu yadda niŋir ameŋa la line deŋi be fu yaapoꞌa Lois ni ka me be fu ma Yunis ni la. M miꞌ ye li me be fu ni. 6 Lin la ka m tiend uf ye fu ke ka Winaꞌam piini line be fu sunfin la, ka o da tis uf saŋkan ka m da paꞌal m nuꞌusi fu zugin la maligim nie. 7 Ka Winaꞌam tisi ti o Siig Suŋ ye ti mor paŋ ne noŋilim ne meŋ gbanꞌar ka kaꞌ ye ti zo dabiem.

8 Dinzugo da zot nyan ye fu yel line ka fu miꞌ ti Zugsob yela, ka me da zot nyan ne mam one a sarega nidi o yela laa, amaa me diꞌem namisug line aa fu din labasuŋ la yela, ka tiaꞌ ne Winaꞌam paŋ, 9 one faann ti ka buoli ti ye ti a o ninsuma la, ka li kaꞌane tiname tum siꞌel la zugo, amaa li ane o meŋ boodim ne o popielim piini line ka o tisi ti Yesu Kiristo ni, yuma bane gaad ka dunia nam pu pinꞌil la. 10 Ka popielim piini la yuꞌun nie nyain Yesu Kiristo lebigin la, one faann ti ka saꞌam kuꞌum paŋ, ka ke ka ti nye nyovur line ka kum kaeꞌ, ka li yi Winaꞌam labasuŋin la na.

11 Labasuŋ la yela ka o gaŋi m ye m a Kiristo Tumtum la ne one paꞌan ka lem mooni li. 12 Ka yelkaŋa zug ka m namisid amaa m pu zoti li nyan ne; ka m miꞌ one ka m niŋ o yadda, ka miꞌ ye o na nyaŋe guri line ka o guꞌuli m la suꞌuŋa, n ti paae Winaꞌam saria kadib daar la.

13 Dolisim paꞌalsuŋ line ka m paꞌal uf la ne noŋilim ne yadda niŋir line be Yesu Kiristo ni la. 14 Guri yelsida line ka Winaꞌam Siig Suŋ guꞌul uf la, one be ti ni la.

15 Ya pun miꞌ ye, bane be Asia la wusa basi m ne, ka Pigelus ne Hermogenes a nimbane bee ba soogin.

16 Ti Zugsob na zo Onesiferus yidim nimbaanlig ka o yiti kaadi m ka m sunf maꞌed, ka pu zot nyan ne ban loo m ne baans laa. 17 Ka on paae Room na la, o ia man ne nimmua ka nye m. 18 Saria kadib daar la ka Zugsob na zo o nimbaanlig. Ka fu pun miꞌ suŋir kan ka o suŋim Efesus teŋin la.