2
Faangir titaꞌar la yela
1 Dinzugo li nar ka ti gbanꞌe tiname wum yelsida la suꞌuŋa, ka da basi lii. 2 Ka pianꞌ kan ka maleknam da yel la yaꞌa pu lu teŋa, ka one zanꞌas ka pu doli lii na diꞌe namisug line nar o. 3 Ka ti yaꞌa neꞌes Winaꞌam faangir titaꞌar nwa, ti na niŋ wala pons namisug la? Zugsob la da deŋim pianꞌ faangir la yela yiiga, ka bane wumi li la paꞌali ti ye li a sida. 4 Ka Winaꞌam me paꞌal ye li a sida, ne tuumnyalima ne tuumkpiꞌema buudi buudi ne o Siig Suŋ piini line ka o pudugidi li ne o meŋ boodim la.
Faangir la soꞌod la yela
5 Ka Winaꞌam pu ke ka maleknam soꞌe dunia line ka o da nan ye o maal ka ti pianꞌad li yela laa. 6 Li sob Winaꞌam gbauŋin zinꞌisiꞌa ka soꞌ yel ye,
“Ninsaal a bo, ka fu tenꞌesidi o yela?
Ka ninsaal biig a bo, ka fu gosidi o yelle?
7 Fu maal o ka maleknam gaad o ne biꞌela,
ka fu yuꞌun pid o naꞌam zugpibig ne naꞌasi,
8 ka ke ka o soꞌe siꞌel wusa.”
Ka on ke ka ninsaal soꞌe siꞌel mekama la, o pu bas siꞌel ka li kaꞌa o soꞌolim. Ka lin a siꞌem la, ti nam pu nye ka o soꞌe siꞌel mekamaa. 9 Amaa ti nye Yesu, on ka Winaꞌam sie n gaad maleknam saŋa biꞌela la, ka o yuꞌun pid naꞌam zugpibig ne naꞌasi, kuꞌum namisug la yela. Ka li ane Winaꞌam popielim ke ka o kpi n tis soꞌ mekama yela ka nye naꞌasi la. 10 Li suꞌum ye Winaꞌam one maan ka gosid siꞌel wusa la, ke ka Yesu one aa ti faangir la a suꞌuŋa one namis la yela ye, Winaꞌam zaŋ o biis bedego ka ba kpenꞌe o naꞌamin la.
11 Ka on ne nimbane ka o maal ka ba a popielim dim la, babayi wusa mor Baꞌ yinni. Dinzug ka o pu zot nyan ye on na buoli ba ye o baꞌabiise. 12 Ka yel Winaꞌam ye,
“M na pianꞌ fu yuꞌur la tisi m baꞌabiis,
ka na yuum yuma pianꞌ fu yuꞌur fu nidib bedego tuon.”
13 Ka lem ye,
“M na tie ne Winaꞌam.”
Ka lem yel yaꞌas ye,
“Mane nwa be ne Winaꞌam biis bane ka o tisi m la.”
14 Ka biis la wusa sadigim mor niŋgbiŋ ne ziim kaŋa nwa, on meŋ da mor niŋgbiŋ kan la men, ye o kum la yela ka o na nyaŋe saꞌam Sutaana one mor paŋ na soꞌe kum 15 ka tis bane ka kum zotim yela ke ka ba a yamis ba beilim wusa ni la yolisim. 16 Ka li a sida ye o baꞌa kaeꞌ ne maleknama, amaa Abraham yaas ka o baꞌa be ne ba. 17 Dinzug ke ka o maal o meŋ wenne o baꞌabiis ne, yel mekama wusa ni, ye o lieb maalmaan kpeenm n mor yelsida ka zot nimbaanlig Winaꞌam tuuma ni, n maan ye Winaꞌam bas o supeen o nidib tuumbeꞌed yela. 18 Ka Sutaana daa ye Yesu maal siꞌel ka o gos ka pu nye la zug, ka Yesu na tunꞌe suŋ bane be panꞌasugin la.