1 Lin nyaꞌaŋ ka Yesu nie o meŋi yaꞌas n paꞌal o nyaꞌandolib la, Tiberias beuŋ baba, ka lin niŋ siꞌem ane anwa. 2 Simon Piita ne Tomas one ka ba buon Liibir la, ne Nataniel, one yi Kana, Galilee soꞌolim la ne Zebedee biis ne Yesu nyaꞌandol sieba ayi da laꞌam bene taaba. 3 Ka Simon Piita yeli ba ye, “M waꞌene ye m gbanꞌ zimi.” Ka ba lebis ye, “Ti me na keŋ.” Ka ba keŋ kpenꞌ aaruŋ, ka yuꞌuŋkan wusa ka ba pu gbanꞌe siꞌel siꞌela.

4 Ka beug yiligid la, ka Yesu ziꞌe beuŋ gbeug, amaa o nyaꞌandolib la pu baŋ ye li ane one.

5 Ka Yesu buꞌosi ba ye, “M biise, ya mor zimii?”

Ka ba lebis o ye, “Ayei.”

6 Ka o yeli ba ye, “Lomini ya zimilaꞌad la aaruŋ la datiuŋ baba ka ya na gbanꞌe. Ka ba lobi li ka zimi peꞌeli galis ka ba mak ye ba teeg li niŋ aaruŋ la guꞌuŋ.”

7 Ka nyaꞌandol yinni, on ka Yesu noŋ la yel Piita ye, “Li ane Zugsob la.” Ka Piita n wumi ala la, ka on pu yeꞌ fuug la zug, o yeꞌ fuug ka ianki li kuꞌomin la keŋ Yesu saꞌan. 8 Aaruŋ la pu lal ne beuŋ gbeugo, ka wen wuu fun na yaꞌas noba kobus ayiꞌiŋa ne, ka nyaꞌandolib bama la be aaruŋin la n veꞌed laꞌakan ka zimi peꞌel la. 9 Ka ban du gbeug la ba yi aaruŋin la na ka nye ka bugum saana dit, ka zimi paꞌe ka bodobodo me be.

10 Ka Yesu yeli ba ye, “More zimbane ka ya gbanꞌe la sieba na.”

11 Ka Simon Piita kpenꞌ aaruŋ ka veꞌed zimilaꞌad la duꞌos gbeug. Ka zimbeda peꞌeli li, ka ba kal a kobuga ne piisnu ne atanꞌ. Laꞌam ne ban zuꞌe la zimilaꞌad la pu aenn. 12 Ka Yesu yeli ba ye, “Kemi na di.” Ka nyaꞌandolib la soꞌo soꞌ pu mor sukpiꞌem na buꞌos o ye, “Fu aa anoꞌone?” Bozugo ba baŋ ye on a Zugsob la. 13 Ka Yesu zaŋ bodobodo ne zimi la tisi ba, ka ba onb. 14 Neꞌeŋa da a noor atanꞌ daan ka Yesu nie o meŋ paꞌal o nyaꞌandolib la on da vuꞌug kumin la.

15 Ka ban di naae la, ka Yesu buꞌos Simon Piita ye, “Simon, Joon biiga, fu sid noŋ man n gat bamaa?”

Ka o lebis o ye, “Eenn, m Zugsoba, fu pun miꞌ ye m noŋ uf.”

Ka Yesu yel o ye, “Guri m peꞌebibis la.”

16 Ka Yesu lem buꞌos o noor ayi daan ye, “Simon, Joon biiga, fu noŋi maa?”

Ka o lebis o ye, “Eenn, m Zugsoba fu miꞌ ye m noŋ uf.”

Ka o yel o ye, “Guri m peꞌes la.”

17 Ka Yesu lem buꞌos o noor atanꞌ daan yaꞌas ye, “Simon, Joon biiga, fu noŋi maa?”

Ka Piita sunf saꞌam, on buꞌos o noor atanꞌ daan ye, “Fu noŋi maa la,” ka o lebis ye, “M Zugsoba, fu miꞌ siꞌel wusa, ka miꞌ ye m noŋ uf.”

Ka Yesu yel o ye, “Guri m peꞌes la.”

18 Ka Yesu lem yel o ye, “Asida ka m yet uf ye, fun da a dasaŋ la, fu da lood vilig n ken fun boode siꞌel, ka fun a bunkudug la, fu na tienn fu nuꞌus ka soꞌ na lo uf vilig ka more fu keŋ zinꞌi kan ka fu pu booda.” 19 Yesu yel neꞌeŋa ne ye o paꞌal kuꞌum kan buudi ka Piita na kpi, ka li a zunꞌor n tis Winaꞌam. Ka neꞌeŋa nwa nyaꞌaŋ ka Yesu yel o ye, “Dol man.”

20 Ka Piita giꞌe ka nye ka nyaꞌandolkan ka Yesu noŋ la doli ba nyaꞌaŋ, ka a one zinꞌi kpiꞌe ne Yesu ban daa dit la. Ka o me buꞌos Yesu ye, “M Zugsoba, anoꞌon ye o zam uf la.” 21 Ka Piita nye o la ka buꞌos Yesu ye, “Ka dau kaŋa mene?”

22 Yesu lebis o ye, “Li yaꞌa ane m boodim ye o kpelim be ka m ti leb na, fu baꞌa bo be li nii? Fun yaꞌa dol man.” 23 Ka pianꞌad la yadig paae yadda niŋidib la ye nyaꞌandol kan la ku kpii, amaa Yesu meŋ pu yel ye o ku kpii, ka lee ye, “Li yaꞌa ane m boodim ye o kpelim be ka m ti leb na, fu baꞌa bo be li nii?”

24 Nyaꞌandol kaŋa di kaset yelbama nwa yela, ka sobi li. Ti baŋ ye o kaset la a yelsida.

25 Siꞌelnam bedego be ka Yesu maal. Ka ba yaꞌa ye ba sob li wusa, m tenꞌes ka paalo ku be dunia ni ka ba sob gbana la digile.