1 Tienmi ba ye ba siak naꞌanam ne gomena kpiꞌemnam noya, ka niŋ ban yel siꞌel, ka siake niŋ line a tuumsuma wusa. 2 Ka ba da pianꞌ beꞌed soꞌ yelaa, ka da bood zaba, ka a suguru dim bane naꞌasid nidib wusa.

3 Ka saŋsiꞌen la tinam meŋ da ane zon, ka pu siakid yelugo, ka dol suebeꞌednam, ka ti yaꞌamleog ne niŋgbina boodim nyaŋe ti, ka ti beilim wusa ka ti mor potenꞌebeꞌednam ka nen nidib, ka nidib kisi ti ka ti me kisi taaba. 4 Ka Winaꞌam one a ti faangid la suŋir ne noŋilim nie la, 5 o faann ti ka li kaꞌ ti tuumsuma zugo, amaa li ane o meŋ nimbaanlzoor la yela, ka o faandi ti ne o Siig Suŋ, line piedi ti ka li aa duꞌampaal ne nyovurpaal la. 6 O tisidi ti o Siig Suŋ la bedego Yesu Kiristo ti faangid la zug, 7 ye ti a popielim dimi o tuon ka li yi o meŋ popielimin ka ti mor tiꞌir ye ti diꞌe nyovur line kaꞌ naare. 8 Neꞌeŋa a yelsida. M bood ye fu paꞌali ba yelbama ne kpiꞌeuŋ, ka bane siak Winaꞌam la na guꞌusid ka tum tuumsuma saŋa wusa. Yelbama a suꞌum ka tisid nidib nyood.

9 Amaa basimi buꞌosyeed ne yaanam yuda yela ne noŋgban nwaꞌar ne zaba line a Jew dim wada yela, bozugo lin wusa ane zaalim ka kaꞌ nyoode. 10 Ka soꞌ yaꞌa bood ye o weligi ya yanam boom saŋa n saꞌal o noor ayinni bee ayi, ka o yaꞌa zanꞌas yanam kee o bas. 11 Fu miꞌ ye ninkaŋa buudi tiakne a nimbeꞌed ka pu dol suer suŋo. O kadi o meŋ saria beꞌed.

12 M yaꞌa tum Artemas bee Tikikus fu saꞌan na, fun on kpeꞌeŋi fu meŋi kenn m saꞌan Nikopolis teŋin na, ka m gbanꞌe ye m be anina sapal waad saŋa. 13 Kpeꞌeŋimi fu meŋi n suŋ Zenas one tum wada tuuma la, ne Apollos, ba kena ni, ka siꞌel da poꞌogi baa. 14 Kel ka ti nidib la zamis ka tum tuuma line nar ye ba tum ka li suŋi ba, ka ba be zaalim zaalim.

15 Bane be ne mam wusa puꞌusid uf. Puꞌusimi ti yadda niŋidib taaba bane noŋi ti la.

Winaꞌam yelsum na be ne ya wusa.