1 Kemin, unang tunum alik disa laap sok de-yimulip bomdip, okok kemin iyo aket fukun-bamdipla, Numi tiin molin tunum kaata-kup tunum tambal kemin, nuli ami weng kaa kutal-fukule uyo kanu-mokomup o, kal-bomdipla yi! Kanu-mokomip kaata tiin molin tunum ayo itama yi, Okok kemin imi kukup kaa atin ti tambal u, kala-somdaya, God ami win ayo ku-mafak-daka-mokoma disa le, Kristen imi win uyo kaa mafak o ke-mokoma dinim o. 2 Disa laap sok de-yimulip ok tabuulin imi tiin molin ili Kristen kesip namti, ok fukulin ayo aket fuku-daala yi, Ali nalmi kayaak kemin weng dinim ke-lom ami ok uyo daal-daal-ke-bamdila yiis kemin daa, ami aket fukunin kaa, Ali Kristen kemin, nali ami aket konbi kaata, ami ok uyo tambal-kup kamaan-biliya, akal okok kamaanbi kabak-ali mafek mafek tambal uyo kaa-bala kemum o, kala aket fanang daalokoma kaata, fan ok tambal-kup fuku-mokoma no.

Kemin, kabi suunkup unang tunum iyo kukuyin-bamdap, kukup kalanolin kiita kala-nuumin o kal-bom kukuyin-kup kukuyin-kup ke-balawa yi! 3 Numi Kamokim Yesus Kraist ata taba-lomda, nuli God ami kukup kaami sang uyo talalu kukuyinsa, tunum kaa dok kanolin kaata ma taba-lomda, Kraist ami tituun-kup weng so, God ami kukup kutal-fukumin sang so, iyo kela yak weng kusnum kaata kuluu-lomda unang tunum imi kukuya namti, kaali 4 nokol utamupla, Tunum kaa, Nata talalu utamsi no, kal-bomda kutaang-kup taba bomda dak-fananba kata, ali ma talalu utamsa disa yo, kalokomup. Kemin, aket mafak kaali, kanolin tunum ami diim kawu bomdula, disa iweng kaata, Nata-kup bokoliya yo, kal-bomda, weng miit kaami kalan uyo weng aal diki-bam ke-bam ilin kemin, ali kanolin kukup kaata-kup aket aasu. Kemin, kanu-bamda bomdaya, kemin kanolin weng kaata kukuyin-bala, kayak kayak iyo weng sandipla, kukup mafak kanun-umbip namti kabakbu. Kanola aptum kusal ilmi mafek mafek kalan tuluya, weng aal diki-bam, disa kawu ilmi mafek mafek kalan nen-una-tala-ke-bamdip, dinan-kulii-tabe-bam ale, ap-tunum kusal imi weng mafak kukaayin-bamdiple, utamiwa yi, Nak-tunum kusal imi aket mafak uyo suunkup numi kukaayinbip kala kala-laabip, ale 5 suunkup weng aal-kup diki-bilip, somu-somu-ke-bam laabip kemin, kanolin tunum kiimi aket kaa atin ti mafak-insu. Kemin, God ami tituun weng uyo talalu utamin dinim keliwa kemin, imi aket fukunin uyo, God ami kukup kutal-fukumin uyo mafek mafek soyal kemin kaami liip uli kabuu nema yo, ken-umbip ko.

6 Fan, tunum ali kanita bilili kala dik-diiba bomda, aptum kusal imi mafek mafek mok uyo inin dinim ke-bamda, God ami kukup kaata kutal-fukulin-kup ilin namti, God ata taba-lomda ali atin tambal-kup kaman-bam laaba. 7 Nokol utamsup kemin, awak kasel ili numi yimu-laabip kaa awak kusal imi mat tem kaptamu mafek mafek so ma kuliilup, talen-umbup disa; bom bii tawaal diim kalaami ke-lokomup, kaa mafek mafek katip so ma kutama unokomup disa. 8 Kanolin kemin, nuli inin so, ilim kaal so, iyo ma bom-bilip namti, nuli mafek mafek katip kulaata tii yo, kal-bomdupya yo. 9 Tunum kanta ma bung yaapkan kaamin kaami aket-kup aalu namti, kaali dok kanolin dap-kukumin ma tiltam dap-kamolu kulii afun tem unin aye tap kelale, kukup mafak kaata taba-lomdu ami aket tem uyo ku-mafak-daalula babon-bam suunkup bung aket an-buluya, atin mafak-nokoma. 10 Kaa dok kata naa kalolip: Tunum ali tuumon kaamin aket kaata aalule, ali yak kukup mafak mafak alik kiimi miit namti kabuu kemin, tunum maakup maakup ili tuumon aket yelula, aket dakat yak abemin kuuta taba-lomduya, yim-tama yang tem diiluya, ilmi God ami lak dakaamin uyo kambola-lomdip ililta ilmi angtiil yol uyo kuluu kutaldak daa-lomdipya, aket uluum dukum uyo kan-tabasip o.

11 Kata, kabi God ami man ale, kabi kanumin kukup uyo kewa-kewa-ke-bamdap tambal tambal ma ke-bamdap, atin ti God ami kukup tangbal kaata-kup kutal-fuku-bom, kapni aket uyo kulaalap yak God ami diim abu kela-bomdap, kap-tunum kusal kayak kayak iyo, tambal o yakan-kaa-bamdaple, mafek mafek mafak tal kapni angtiil diim abamnu uyo titil-fak-daa-lom welap une-buluya, tunum kusnum kayak kayak imi aket filit kaata-kup kukaayin-bamdaple, kanu-balawa yo. 12 Kemin, tunum ayo Kraist ami lak duu-bomda ilokoma kaalile, tunum abiltap binan-bom kapta kapta kelap o kala, mafek mafek kukaanbip ultap kemin ale, kapkal ti tambal-kup abil unabap kaa, ti titil-foko-bomdapya yi! Sawaayak uyo God ali, Dap-tiiliya suunkup ilin tunum kelak o kala-lomdala, tim-tiilaya, kabi unang tunum yaapkan imi tiin diim kaa kapni Kraist ami lak duusap kaami sang uyo ku-fatap-daalap utam-silip kemin, kapni suunkup ilin tunum kesap kaa, ti dukum-kup titil-foko bom-balawa yi.

13 Kemin, God ali alik titfitmin mafek mafek kiimi mam-kukaayin God ale, Yesus Kraist ali kiyap Pontius Pailat ami diim kawu tituun-kup weng tambal-kup bokonsa tunum kemin, God so, Yesus Kraist so, alim imi tiin diim kawu weng dukum-kup uyo bokop-tokomi kayi! 14 Kabi dok kanumin kaata ma nuu-balapla, weng mafak uyo kulii-tal aba yak God ami weng kabak tinimin daa yo; tambal-kup tiin mo-bomdawa yi. Kabi tiin molokomap kaali, tunum unang ili boko-lomdip: Weng kuuli mafak o, kalokomip disa. Kemin, kano ti tiin molin-kup una-balapya, yak aba butoop numi Kamokim Yesus Kraist ami tal fatap-nokoma kulu kutoop kulu daalan o, kala-somla ko. 15 God ali utamaya, Yesus Kraist dabaali daak fatap-nokoma no kalsa kaa, tiltam tulu no, kalokoma, kabak-ata fan dabaala tildaak fatap-nokoma. Kemin, God ata-kup fiyaap duumin kaami miit kayaak ale, maakup ata-kup titil sakbaalim dukum uyo ami diim kawu bombuu. Kemin, ata king alik imi Kamokim diildiil ale, ata kamok kamok alik imi dabom ko. 16 Maakup ata-kup taan-yaamin disa ale, ami falala-kalin iilfoba kaa, atin tiin buluusi so kemin, dok kano-somdupla nuli yang ami mepso kaa yang ilomdup atamalup dinim; aa, tunum ma ata taba-lomda atamsa disa le, kuno tunum maakup ma ata taba-lomda atamama dinim o. Unang tunum nuli ami win kaata-kup kufon-bamdupla, ayo suunkup nuli tiin molin-kup bom-bala yo kala-somla ko.

17 Kemin, tawaal diim kalawaami mafek mafek uyo abiltap-siik mafak-nokomu kemin, tunum bung kayaakal kiili fuut-tabemalip. Kemin, bokoyilawa, imi mafek mafek yaapkan kaami lak dakaamin kaa kambola-lomdipla, atin ti God ami lak kaata duulin i! God ali alalta numi mafek mafek tambal yaapkan iyo kukaayin-bala fiyaap duumin-kup laabup o. 18 Kabi mafek mafek soyal iyo bokoyapla: Suunkup kukup tambal tambal kaata kutal-fuku bomdiple, ap-tunum kusal iyo atin kukup tambal kaata-kup kukaayin-bamdip, suunkup imi mafek mafek uyo aket dinim ke tunum kusnum iyo isom ke-bamdip masiim kukaayim-bam ke-bamdipla ko. 19 Umi kanumin kaali, iltipni bung men tap ke kuyak tam abiil tikiin tiiliwa, ilom dong dokoyokomu ultap, Kuuta tangbal kemin, am talaap kun kemin, uyo am kaami miit titil sokan kaata dong dakaalin ulultap kemin, mafek mafek soyal iyo mafek mafek masiim kukaayim-bam ke-mokomip kaata, fan dong dokoyilula, ili suunkup ilin unang tunum God ami abip bombe kawu ilokomip ko.

20-21 Timoti kapyo, God ami ok kup-tase kaa talalu tiin mo-bomdawa yi! Kanola tunum iip maakup maakup iyo boko-lomdip: Nuta-kup tituun weng uyo utamsup o, ken-umbip. Yale, kiili ibakamin weng kaa baka-bamdiple, tawaal diim kalaami disa eng kaata kasen-foko, Kaa God ami weng o, ke-bamdip kanun-umbip kemin ale, tunum malo iyo boko-lomdip: Nuli utamsup o kal-bomdip kanum-unbip. Yale, God ami fan tituun eng ayo uktansip kemin, kabi imi kanumin weng kuu daang ukuwa-somdapla yo kala-somla ko.

Kemin, God ayo nak-tunum kusal ibi disa masiim kawu tambal tambal ma kamayin-bam tiin mola biliwa yi!