1 Kulaa, Jon nayo asuk lom tap ma duuli uyo utamila, Alokso tawaal so, abiil so, dotula kiita, tiltam tabamnip o. Siin kaami tawaal so, abiil tikiin so, yol ok so, iyo talalulala bombi disapsu usiik maaklo kebu kemin, kulaa utami. 2 Kemin, kuno nali talaalila, God almi kama alokso abip Jerusalam uyo abiil tikiin kaptamu kutal-daak tawaal diila utamile, alokso abip uyo disa akal ma kutookso kiit kon tiibi ke-umbip kaali, unang ilim tambal mikilu tunum ket dabuulon o, kalalu imak liip fenbu tap ke; 3 God ami abiin baan tiin-laamin sia diim bombe kawu, weng dukum ma bakaba ayo weng seniya ayo boko-lom: Kipyo, weng san bom-iliwa, kamala kula tabup uyo, God almi unang tunum iso, bomda almi mepso kulu suunkup bom tiin molaya, unang tunum iyo tal almi miit tem unipla, ata imi God keya-lom tiin moyokoma. 4 Kemin, God ata mafek mafek mafak tal unang tunum imi diim aben-umbu uyo, alik kukan-tiiyokoma kemin, aket uluum ke-mokomip disa; ama-mokomip dinim. Kemin, tawaal kala disapsu kaami mafek mafek mafak kuluu disa ke-lokomu. Kemin, taan-laamin so, angtiil yol tabemin kulaaso, aket uluum dukum so, amamin aye, kiiyo asuk maso ma tiltam talokomip dinim; atin disa. Ili ti atin alik maaklo disa ke-lokomip o, kema ko.

5 God almi sia diim kabaaku bombe weng boko-lomda: Kipyo, weng selin! Kamala kulu, nali mafek mafek alik kaa talaluli ukol kusnum ma kelon o, kalu, kalba-kup, kulaa fal-siki taba nami bokop-na-lomda: Weng kala weng senap kaa, fan ti tituun weng kemin, kabi utam-ilom, Alik kii bokoyapla, weng sandip kala, utamipla, U fan, kalokomip kala-somdapya kawu, tunum kaami weng uyo kuyak sukon tem kabaku dolnan o! kalba-kup, 6 asuk bokop-na-lomda: Nali kaa kanolokomi kayi! kalasi uyo, alik noli disa kelu kewi kemin, sawaayak uyo nali bombii le, aa kamala kalawaakal bii, aa bii kaptoop kaakal ti kano ilokomi; ti maakup nata-kup, alik kanolin mafek mafek miit kayaakim ale, nata-kup mafek mafek alik iyo mafiing mafiing dotuli disa kelip keyokomi le, nata-kup suunkup ilokomi. Kemin, kawanta ma ok del dap-tiiyimbu namti, nata suunkup ilin kaami ok miit kayaak kemin, nata laa-yim-bili inokomip kaa, saanokomip disa, masiim nata kukaayim-bili, im-bom suunkup ilokomip. 7 Tunum kanta ma ita ita ke, Setaan ayo dabaalip kulaak banala kela, titil-fak-daa nami kukup kaata kutal-fukulin-kup ke-lom bii taanip namti, nami kanolokomi namti kalabe kemin, nata imi God kelile, ita nami man alik-daap kep-nip ke-lokomip. Lale, 8 kawanta fatom dap-ten-bam ale, suun-bam nami weng uyo tunum unang imi bakayin disa kema aye, kanta God ami aket fukunin tambal uyo kutal-fukuli daa yo, kalala ayo daang ukup-na aye, kanta kukup mafak ayo kutal-fuku-bomda ban bomin aye, kanta tunum yemin, aa kanta sadikimin aa, kanta usong falela yokoop daka-bam ale, yokoop waka-bam kemin, kanta awem men so, mafek mafek kiimi sinik dotu kutii-lomdip, kiimi fiyaap umi duu-bam aman dakaalin aye, kanta ibakamin kasen-kasenmin aye, iyo kanuma namti, nata mep kanun-umbip imi abip kaa talal-yimbi kemin, foko-yim-baali daak ok kumun alalnin tap ke-lomdu, suunkup as almi ti kano kiin-bam awon win butup kaami ninin tap kuyak daalin-kup ilin kabaak-ami tem un-ilom, kano ti kiinin-kup ke-bam suunkup angtiil yol daka-bam ilokomip kemin, imi dum alep diim taan-laamin namti kaa bombu ko.

9 Ensel fet ata atin kabas mafiing mafiing kaami angtiil yol tiltam tabokomu kaami kabas fetkal sing-daabip imi iipyak tem kulu ensel ma tal bokop-na ko: Talawa, nayo unang Sipsip Man Yesus kuluula ami kalel ke-lokomu uta kukup-ton o, naka ko. 10 Kemin, God ami Sinik ata kukup-nam-balaya, lom tap ayo dakaan-um-bom talaali, Ensel kaali, nam-tamala umbitam amdu tikiin batbat ma kaa daala kalile, ensel ayo kukup-na utamila, God almi alokso abip Jerusalam kuu abiil tikiin kawu kutal-daak tawaal diila atam kemile, ensel ayo bokop-na: Kawe! abip kutamali Sipsip Man ami kalel ultap te! naka. 11 Kemin, uyo God ali abip Jerusalam kaptamu bom-balaya, ami dawang uta taba-lomdu atan ami tik-daala kulaala talaba yak am umi glas diim aba-lom am kaptam-ali alik wii falala-kup kala-laabu tap ke, abip ayo alik falala-kup kala, kali kemin, abip uyo tifan tuum win sokan isakfulut Jaspa o, kalbip taasip umi lamlaam uta kelula, 12-13 abip kaptam tuum uti fokosip uyo titil-kup tabale, batbat miinok tuum uti kaali, abip ayo alik falala kuyak mosip. Uti kaami daam atalingkal kawu, amitom asuumano e kala, kalu kalu kem falala kuyak mosip kemin, amitom talangkal kiili, ensel iyo amitom maakup e kala tiin mosala tiin mosala kemsip; imi tip lo kaptam-ali win ma dolsip uyo, Israel kasel imi tunum miit talangkal imi win kiita kuyak daa-daa kesip. 14 Uti umi minlo tem kawu tuum dukum dukum ulmi ku-titil-diimin-kup talangkal kiimi diim kawu win ma dolsip uyo, Sipsip Man ami kalaan tunum talangkal imi win kiita dola-dola kesip kala utami. 15 Ensel ayo tola-lom nami weng bakap-nam bokoba ata, as daang o, kala mafek mafek siksimin ma kutal-fukuba, ali gol ta mafek mafek siksimin dotusip kemin, as daang kaata kuluu-lomda abip so, abip daam so, amitom so, iyo tiila ko. 16 Abip kaptam-ami daam daam atalingkal iyo ti, kanolin atalingkal alik maakup. Ensel ayo ami as daang siksimin ayo dabuu-lomda, abip kaptam banemin uyo kuyaku-som ale, abip balang balang atalingkal uyo kuyaku-som ke-lom, siksiila umi kilomita 2,400 kelula, umi siksimin kaa ti maakup kalale, 17 uti daam kaali, iing kela-lom fokosip kemin, ensel ali uti iing dukum uyo tiila yi, mita ayo 60 kelula, ami siksimin kukup kaali, tawaal diim tunum numi siksimin kukup ultap ke-lomdala, kano-lom siksila ko.

18 Kemin, tuum uti fokosip kaa dawang tangbal ke-lom falala-kalin, tuum fiingim bak-daa as kon wiis bak-daa kelin Jaspa ale, abip dukum kaptam ali gol tambal kaata-kup kuluu dotuliwa, atin kutookso yaap ma kelula, glas lamlaam ultap kesu. 19 Uti umi minlo tem tuum dukum dukum talangkal iyo kiit kon tangbal kawo! kala-lom, disa tuum akal kusnum tangbal dawang sokan, uta kuluu-lom kuyak daam minlo tem diim kabaku tabuu fewa-fewa-kebi kulaasip. Tuum kuuli, ukol ulmi angtiil kusnum akal alik, akal alik, falala-kalin tuum kuuta kuluu kuyak kabak mo fewa-fewa-kensip kemin, tuum ukol ma kuuli isakfulut bak-daa, as kon wiis bak-daa kelin umi win kaa Jaspa o, ke-bam ale; tuum alep abiilkun dik-daalin umi win kaa sapaya o, ke-bam; kuno tuum asuumano imuul ke namaal ke umi win kuu aaget o, ke-bom ale; tuum ataling as kon wiis dik-daalin umi win kaa emeral o, kal-bom ale; 20 tuum awak isakfulut ukol alik ma umi win kaa boko-lom sadonikis o, kal-bom; tuum bukup fingim kusnum umi win kaali konilian o, kal-bom; tuum fet titak umi win kaali krisolait o, kal-bom; tuum oklung as kon wiis dik-daalin ukol alik ma uta beril o, kal-bom; tuum beti titak ukol alik ma uta boko-lom topas o, ke-bam; tuum nakal as kon wiis dik-daalin ukol alik ma uta krisopres o, kal-bom; tuum kum abiilkun dik-daalin ukol alik ma uta boko-lomdip ayasin o, kal-bom; kuno, tuum talang abiilkun dik-daalin ukol alik ma uta ametis o, ke-bam 21 ken-umbip. Kemin, uti daam kabak-ami amitom talangkal umi amitom maakup maakup uyo tuum namaal titup-kup sipying-sipyang-tabasu, dukum uta tem kalu kalu ke, kuyak mo kela yakyak kesip kemin, tuum kanosip kaami win kaa pel o kem-yaabip. Abip kaptam-ami liip ken-unsip uyo tuum gol tambal-kup kaata dikela kulii-tal maltin un-bomdipla, liip kaa ken-unsip kanolipla, liip kaa, dawang ayo glas ami lukluk tap kesa ko.

22 Kanolin abip dukum kemin, abip kaptam-ali lotu am so ma utamami disa. Kaa dok kata naa kalolip: Abip kasel alik imi aket fukunin kaali, God Dukum Titil Miit Kayaak sole, Sipsip Man Yesus aso, alim ili numi mepso kulu suunkup laabip uta uta ke-lom, numi tam lotu am lotu kemin, kuluuli kabaak banula, kulaasu no, kalaliwa, abip kulu alim imi lotu ke-bam ilokin o. 23 Kemin, God so, Sipsip Man so, alim imi dawang dukum kaata kulaalip taba-lom abip uyo iilfo falala-kup kalula, abip kasel imi mafek mafek iyo talalu uta-mokomip. Abip kaptam-ali atan dinim, kayoop dinim. La, abip kasel ili alim imi dawang diim kawu mafek mafek iyo soko talalu uta-mokomip. 24 Kemin, am bokon alik kalawaami unang tunum ili, alim ilmi falala-kalin kulaata, dotu utamdiwa, tal-une-bam mafek mafek ayo nuu-bam kemip kemin, tawaal kala dik-daa kulaasu kiimi kamok kamok ili, God ami fiyaap kaata duumum o, kala-lom mafek mafek tambal uyo kulii-tal abip fak-tii-lom God ami kukaalokomip. 25 God ami yokon dawang kaa kama alokso tawaal uyo ma fal-siki-lom kuu kaldaak ulu malang tinilokomu disa; ti suunkup ti, kano ilokomu. Kemin, am tiinala kaata, tawaal diim kalawaami abip uti fokosip kaami saal kaa lii-yaabip. Lale, God ami alokso abip kaami saal utale, lii-mokomip disa; uli ti suunkup saal ayo busuu kuno ilokomu no. 26 Am bokon kala dik-daa kulaasu kaami abip ma ma tunum unang alik, God ami fiyaap kaata-kup duumum o, kalaliwa, mafek mafek tambal dukum so, katip katip so, yaapkan iyo kulii-tal abip fik-tii-bi-lomdip, God ami kukaalokomip. 27 Kemin, ili mafek mafek mafak ma kulii tiltam abip kaltam kulii tiltam talokomip dinim. Dok kanolin unang tunum ita fatom tabin kaami kukup aye, kasen-fakamin kukup aa, kutal-fukulin kiili, abip kaptam tam unokomip disa. Atin disa; unang tunum tituun-kup tabasip imi win kiita Sipsip Man ami buk tem kabaku dol-yinsa ita-kup tam atamiple, aso maakup suunkup ilokomip o.