Primera Carta Del Apóstol San Pablo A Los Corintios
Ja Carta Iti, Ja' Mero Sbajtanil Carta Jecji Yile Ja Suinquil Ja Corinto Yuj Ja San Pablo
1
Ja Pablo stz'ijba ja creyente jumasa ja ba Corinto
1-2 Lec ay quermano jumasa ja janec' huaxa tzoma bajex ja ti ba Corinto, ja janec' sbajex xa ja Diosi. Stzaunejex ba toj xa oj ajyanic yuj ja Cristo Jesusi. Jach ni spetzanil ja quermanotic ja ba spetzanil ja lugari, ja janec' ma' huan xa sc'umajel ja sbiil ja Cajualtic Jesucristo, como yena ni Cajualtic jpetzaniltica. Ja queni Pabloon nia. Ja Diosi sleahuon ba oj secon jastal secabanumil ja Cristo Jesusi. Jach secahuon yuj ja jach ni huas sc'ana ja yeni. Cho ti ni ay jmoc ja quermanotic Sostenesi. Lajan huanticon stz'ijbajel ja carta iti. 3 Sc'an to Dios, huanex xa yiljel ja syajal sc'ujol ja jTatic Diosi soc ja Cajualtic Jesucristo. Laman ni oj ya ajyanica.
Ja jastal huax yaa ja bendición ja Cristo
4 Tola vida huax c'ana yi stz'acatal ja Diosi yuj ja yaunej xa huilex ja yutzil sc'ujoli, como ja' ni yuj ja Cristo Jesusi. 5 Como Cristo ni ya jac ac'ujolex jastal tzamal oj c'umananic. Huan nix cho ya naex lec jas sbej ja scosa sbaj Diosi. 6 Ja jas jeubal ahuilex ja sbaj Cristo, ja' ni mero ahuiojex snihuanila 7 Porque ja Santo Espíritu, jel tzamal ja hua chol yaunej ahuilexi. Jayuj ba ja hua hualtzilexi, mi jas huas sc'ulan ahuilex palta ja tiempo it huanotic to ni smajlajel oj cho jacuc ja Cajualtic Jesucristo. 8 Ja yeni, oj ni yaa huipex ba tzatz oj ajyanic masan to huax c'ot tic'an ja tiempo, jaxa c'ac'u oj cho jacuc ja Cajualtic Jesucristo, mi ni ma' oj bob slee amulexa. 9 Ja Diosi mi ni huas stucbes sbaja y yena ni ja ma' sleahuexi ba oja huil abajex jastal mero moj'alijel abajex soc ja yunini, ja' ni ja Cajualtic Jesucristo.
Ja creyente jumasa c'olan c'olan yiaj sbaje
10 Quermano jumasa, huax c'ana huilex lec pavor yuj ja sbiil ja Cajualtic Jesucristo, que jun ita hua pensarex oj ajyaniqui. Mi sbejuc c'olan c'olan oj ajyanic. Jun xta lajan a ajyuc ja hua pensarexi, pero toj. 11 Porque ja scristiano ja sbaj quermanatic Cloé ch'ac ta yale cab que puro pleito ayex ja huenlex quermano jumasa. 12 Tuctuquil bi juntiro ja hua pensarexi. Ay ma' huax yala huujilex: Ja queni ti ayon soc ja quermanotic Pablo, la chiyex. Soc ay ma' huax cho yala: Ja queni ti ayon soc ja quermanotic Apolosi. Soc ay ma' huax cho yala ti ay soc ja quermanotic Pedro. Ti huax cho yala otro jun c'olei: Ja queni ti ayon soc ja Cristo, la chiyex. ¡Ata huab jas huanex yaljel tac! 13 ¿Yuj ama jach c'olan c'olan huax ec' ja Cristo ba? ¿Yuj ama quen q'ueyon ba cruz yuj ja hua coltajelex ba? ¿Yuj ama jbiil quena ja huiajex ja' ba? 14 Stz'acatal ja Diosi, mi jc'ulanex bautizar ja queni. Es meran, ca yie ja' ja quermanotic Crispo soc ja quermanotic Golo, pero quechan ja yenlei. 15 Siquiera mi ca huiex ja' ja huenlexi, porque mi c'a, oja hualex ja huego: Ja queni quiaj ja' yuj ja sbiil ja quermanotic Pablo, oj chianic. 16 Meran, ay to otro ma' jc'ulan bautizar, ja' ni ja quermanotic Estefanasi soc spetzanil ja suinquil ja snaji. Pero lajan soc quechan ja yenlei. 17 Porque ja Cristo mi secunejucon ba oj c'uluquex bautizar. Secahuon ba oj loilta huabyex ja abal it jel tzamali, pero claro lec. Mi jac ca q'ue jun najtil loil ba oja huilex que jel huax naa. Ja lec jach to jc'ulani, entonces bob ta mi ma' oj yii snihuanil ja jastal cham ja Cristo ja ba cruzi.
Ja Cristo huax yaa quiptic soc huas sea quitic jastal ay ja Diosi
18 Eso sí, ja ma' ch'ayele ni, ja cuando huaxa taa ti' jastal cham ja Cristo ja ba cruzi, lajan soc mi ni jun sbej huax yabye ja yenlei. Pero ja quentic ja janec' ti xa huantic coltajel yuj ja Diosi, huax naatic que ja jastal cham ja ba cruzi, cuando huax cabtic jastal jahui, huax naatic jastal huax atji ja ba jc'ujoltiqui, pero ja' ni ja yip ja Diosi. 19 Jach ni tz'ijbanubal ja ba yabal ja Dios tac.
Ja ma' jel vivoei, oj jom ja svivoile jahui, jaxa ma' jel huas snaahuei, pero ja queni, mi ni huax quiaj snihuanil ja jas huas snaahuei,
como jach ni yala ja Dios tac. 20 Porque ja mero smeranili, ¿jas yatel ja svivoil ja cristiano? Anima huax ochye maestroil, huas snaahue jastal huax och stae ti' jastal ay ja mundo iti, pero ¡mi ni nunca oj slaje jastal ay ja spensar ja Diosi! Ja ma' jel snaa ja ba mundo iti, pero ja Diosi, satq'uinal oj ya pax tontoil. 21 Porque ja Diosi, quechan ni yen vivo leca, jayuj yala ja ma' jel vivo ja ba mundo iti, mi jayuj ja svivoile jahui jayuj ti oj naajuc sbaj ja yeni. Quechan ta huan c'a xa c'uanex ja yabal ja Diosi, quechan único modo oj bob ataa coltajelexi. Eso sí, ja cristiano, lajan soc mi ni jun sbej huax yabyea, pero como jach ni huas sc'ana ja Diosi. 22 Porque q'uelahuil ja jmoj judioili. Ja' sgusto ja yenlei ta huan bix yilahue jun milagro, ti bi oj yile ta meran ay yip ja Diosi. Jaxa cristiano ma' mi judiouqui, como jel ni huas snaahuea, ja' bi sgustoe oj smaclaye jun loil ba najat lec ja yenlei. 23 Pero ja quenticoni, ja jas huanticon yaljel eq'ue, ja' ni quechan huanticon yaljel ec' ja jastal cham ja Cristo cuando aaji locan ja ba cruzi. Jaxa judio jumasa, cuando huax yabye huax calaticon jastal chami, huan bix q'uixhuiye yuj ja huax calaticon ja jastal jahui. Jach ni ja ma' mi judiouqui, mi ni bi t'un sbej huax cho yabyea. 24 Pero ja ma' tzaubal yuj ja Diosi, sea judio, sea ja ma' mi judiouqui, cuando huan xa sc'uane ja Cristo, huane xa ni yabjel jastal ja yip ja Diosi. Huan xa ni snaahue jastal jel nihuan ja spensar ja Dios ja jastal seca ja Cristo ba oj chamuc yuj ja quentiqui. 25 Eso sí, huax yalahue que mi ni jun sbej ja jas sc'ulan ja Diosi pero como ja mero smeranili, como jel tontoe juntiro. ¡Jastal oj slaje ja svivoil ja Diosi! Ja Cristo, cuando aaji locan ja ba cruzi, lajan soc jel coel sea sbaj yi ja cristiano pero ja mero smeranili, yenle ni mero jel coelea. Ja Diosi, jel ni tzatz juntiroa. 26 Quermano jumasa, c'ulanic t'un pensar. Cuando sleahuotic ja Diosi, ¿yuj ama huan sleejel ja ma' jel ja svivoil soc ja cosa ba mundo ba? ¿Ma quechan huan sleejel ja ma' nihuac ja yateli? ¿Yuj ama quechan huan tzaajel ja rico jumasa ba? Ja mero smeranili, jel t'usan huax taajiye ja cristiano jumasa ja jastal iti. 27 Porque ja Diosi huas slea ja ma' jel coel juntiro huax ilji ja ba mundo, ja ma' mi ni jun yatel huax ilji. Jach huas stzaa ja Diosi ba jel oj q'uixhuuc juntiro ja ma' jel huas snaahuei soc ja ma' jel tzatz huax yaa sbaji. 28 Jayuj ja Diosi huas slea ja ma' ch'in huax ilji soc ja ma' lajan soc tz'iilel huax ilji, soc ja ma' mi ni t'un huax aaji caso ja ba mundo iti. Jaxa ma' jel nihuan huax yaa sbaji, pero oj ni c'otuc ja c'ac'u oj aaji ch'ay snaajel yuj ja Diosi. 29 Jach huas sc'ulan ja Diosi. Jachuc, mi ni ma' oj bob stoy sbaj ja ba sti sati. 30 Porque stz'acatal ja Diosi, jayuj cuenta xa ayex yuj ja Cristo Jesusi. Yuj ja Cristo, jayuj jaman xa t'usan ja jsatiqui. Huan xa ni scoltayotic ba toj oj ajyucotic ba mi xa oj to jleetic mas ja jmultiqui. Jac ni yaa sbaj ba libre oj ajyucotic. 31 Jayuj ti tz'ijbanubal ja ba yabal ja Diosi que mi sbejuc huax toyo jbajtic. Sbej ja' oj toytic ja Cajualtiqui.
Ja Pablo sloilta jastal cham ja Cristo