4
Piyɛlɛ ta Zan ti lo fai tukpɔɠaaleʋe nu wolaiti kakalaʋɛ
1 Siɛgi zu Piyɛlɛ ta Zan ti ɠɛni dɛ ɓɔɛzu la nuɓusɛiti pɔ, zalaɠa ɠula nuiti ti ʋaani, ta GALA sei ʋɛlɛi maaɓɛɛ ɠundiɠii, naa ʋɛɛ Saduseyɛinti ba. 2 Ti wola yiiɠaawanaa ɠɛni de, tɔɔzei ti naati kaani, ti ɗa nuɓusɛiti kala ga tɛi Yesu wuzeɠeai, é ɠula saai ya, gɔvɛiti ɓalaa ta wuzeɠe, ti ɠula saai ya. 3 Ti yeeʋɛɛni ti ma, ti ti ʋili kasoi ɠa eyɛsu poluma zobui, tɔɔzei kpɔkɔi ɠɛni de niina. 4 Anɛɛ naa ʋe, nu mɔinmɔin ge ɠidaaleʋeni naati saama, niiti ti woiloni ti-wooi ma, kidaaleʋe nui liegɔi a laazeeli nu waadɔɔlugɔ (5 000) zu.
5 Poluma zobui, ta-ɠundiɠiiti, ta totuɠɔiti, ta tɔ kalamɔinti, ti ɠaalɛɛni ba Zeeluzalɛme. 6 Zalaɠa ɠula ɠundiɠi wolai Ane ɓɔɠɔi ɠɛni ti zaama, ta Kayife, ta Zan, ta Alɛgezandele, naa ʋɛɛ zalaɠa ɠula ɠundiɠi wolai ná-pɛlɛyeɠei wu nuiti pɛ ba. 7 Ti ʋaani ga Piyɛlɛ ta Zan, ti naati to ɠakala, ti ti ɠaazaɠa, ti ɠɛ ti ma: «Ɓɛ ná-zɛbɛ ɓa ɓɛ laasei ka wo niima vai ɠɛai la?» 8 Naazu tɛi Piyɛlɛ laaveni ga Zɛnvu Ɲadegai, é ɠɛni ti ma: «À woilo nii ma, wɔi wo ga nuɓusɛiti ta-ɠundiɠiiti, ta totuɠɔiti. 9 Tɛi wo gi ɠaazaɠasu za faa ʋagɔi ma, nii kɛai seeɓɛ nu ɠila bɛ, wo ɠɛ gi dɛɛ, ʋelei baloai la, 10 wo pɛ à kwɛɛ, Izelayɛle nuiti pɛ ti kwɛɛ ɓalaa, ga Nazalɛte nui Yesu Kilista, nii wo kpadɔni saa wului ma, GALA ge buzeɠe, é kula saai ya, naama ʋele ɠa zunui nii ɠɛdɛgai da, é loni wo ɠakala. 11 Tɔ ɠa é ga:
‹Kɔtui nii pɛlɛ lo nuiti wo ɠɛlɛai ba,
tama tɔ ɠa kɛai ga kɔtu ɓiingi.›
12 Yesu ɠila nɔ ɠa kizogi ɠa zoo zɔlɔɔsu saɓui zu, mazɔlɔɔ GALA ge la nu ɠili nɔpɛ daasei feeni eteai zu nuiti saama, nii da zoo ɠizosu ga tɔun maaʋele.»
13 Ti laavɔɔni gola siɛgi zu ti Piyɛlɛ ta Zan ɠaani la, ti ɗa ɓɔɛ ga ladalai, mazɔlɔɔ ti ɠɛni kwɛɛni ɓalaa ga naati ta ga kalatala nuiti. Ti kwɛɛni ga naati ta ga Yesu ziɛɲɔɠɔ ʋɔlɔmaiti. 14 Kɛlɛ tɛi ti ɠɛni zunui ɠɛdɛgai ɠaazuloni ti ɠoba, ti la ɠɛni zooni ti ʋa faa nɔpɛ bo ga gooɠaaʋote. 15 Ti ɠɛni ti ma naazu, ti ɠula tukpɔɠaaleʋe ʋɛlɛi wu, ti tɔɔzei ga ti ɗa ɓɔɠɔ ɠaazaɠa kpɔgi zu, 16 ti ɗa ɠɛ ma: «Leeni ɠa ada kɛ ga zunui niiti? Tɔɔzei Zeeluzalɛme nuiti pɛ ti kwɛɛni ga ti laavɔɔ vaa wolai nii ɠulaʋɛ kɛlɛma, nii ade la zooga ade ʋa maaɠaali. 17 Kɛlɛ kɛni ade pele leʋe tuɠɔ ga su mina ɓaaɠo nuɓusɛiti saama, ade tɔ sei ti ma, ade ti maalua ga ti mina mɔ ɓɔɛ daaseigi naa zu nu nɔpɛ gaazu.»
18 Ti naati tolini ʋolu, ti tɔgi zei ti ma, ti ɠɛ ma: «Eyɛsu pɛ wo mina mɔ ɓɔɛ, ɓa wo ʋa kala bo, Yesu laaseigi zu.» 19 Kɛlɛ Piyɛlɛ ta Zan ti ɠɛni ti ma: «Ɓɛgele ɠa soloogai GALA gaazu, gi ɠolo wo ʋɛ, ɓa gi ɠolo GALA bɛ? Wa ɓɔɠɔi à naama lukpɔɠaaleʋena! 20 Kɛlɛ gɔun, gi la zooga gi ʋa laaɠulu naa ma, nii gi kaai ta gi mɛnigai.» 21 Ti naati maaluani ʋolu, ti ɓe ti ʋa. Ti la ɠɛni naati nimiza ʋele nɔpɛ kaani, mazɔlɔɔ nuɓusɛiti pɛ ti ɠɛni GALA dɛbizu, tɔɔzei laavɔɔ vai naa ʋa, nii é ɠɛɛni. 22 Mazɔlɔɔ zunui nii é ɠɛdɛni ga laavɔɔ ʋoogi, sɔlɔɔ konagi a la leʋe puunaanigɔ (40) ʋa.
Kidaaleʋe nuiti ta-ƓALA falii
23 Ti ti ʋilɛgai ma, Piyɛlɛ ta Zan ti liini ti-wɔɔlaiti pɔ bɛ, ti naama vaiti pɛ suɠula ti ma, niiti zalaɠa ɠula ɠundiɠiiti ta totuɠɔiti ti boni ti ma. 24 Siɛgi zu ti naama vaiti mɛnini da, ti pɛ ti zolooni faa ɠila ma, ti wooɠula GALA ma, ti ɠɛ ma: «Màliɠii, ɗa ɠa è geeɠɔlɔgi ta zooi ɓɛtɛa, naa ʋɛɛ kpoloɗɛi ʋa, ta ti zu aniiti pɛ, 25 ɗa nɔ ɠa è niima wooi ʋuuni ga ɗa-Yɛnvu Ɲadegai maaʋele, ɗa-wotiɠɛ nui gi-mɛmɛwola Davide laaʋɛ, é ɠɛ ma:
‹Leeni vaa zu zii ɠiligiti ti ɠɛɛni unga wuulee?
Leeni vaa zu ziiti pɛ ti kisiɛ ɲakaiti boni?
26 Zou masagiti ti kɔɔi ɓɛtɛni,
kundiɠiiti ti yaavai ɓɛtɛ Maliɠii laalɔɠɔma,
ta ná-zunui nii é gulɔ ɲadegai ziaai ma.›
27 Gaamazu, Elɔde ta Pɔnse Pilate, naa ʋɛɛ Izelayɛle nuɓusɛiti ta zii ɠiligiti ba, ti pɛ ti ɠaalɛɛni ba taai nii zu, ɗa-wotiɠɛ nu ɲadegai Yesu laalɔɠɔma, nii è gulɔ ɲadegai ziaai ma, 28 ti naama vai laazeeliʋɛ nɔ, nii è deveni ma yeeluɠɔ, ɗa-zobogi ta è-yiimai zu. 29 Niima ziɛgi zu, Maliɠii, woilo ta-maalua ɓɔɛiti ma, ti bosu, va bu gɛi gi ga ɗa-wotiɠɛ nuiti gi è-laawooi laazeeli ga ladalai. 30 Ɗa-zobogi ɠula kɛlɛma, naa ɠa a kɛ kɛdɛgi ɗa wo, laavɔɔ ʋoogiti ta maaɓɛlɛ vaiti ti ɗa ɠɛ ɗa-wotiɠɛ nu ɲadegai Yesu laaseigi zu.»
31 Ti ɓegai ma ga GALA fali, ʋɛ ti ɠɛni ná gaalɛbai zu, miná ɓalini, ti pɛ ti laaveni ga Zɛnvu Ɲadegai, ti tɔɔzei ga GALA daawooi laazeelia ga ladalai.
Kidaaleʋe nuiti ta-ɠilibai
32 Zɔiti kpein ti ɠɛni ga kidaaleʋe nuiti, ti ɠilini ɓɔɠɔ ʋa ɠi gila ta zɛnvu ɠila su. Nu nɔpɛ ge la ɠɛni zeaɠɔli seɠezu ga tɔ ɠila nɔnɔ, kɛlɛ ti pɛ ti ɓɔni ti-ɠɔligiti ma. 33 Keelaiti ti ɠɛni zeele wooi wosu ga zɛbɛ wolai ga Maliɠii Yesu wuzeɠeʋɛ, é ɠula saai ya. GALA ná-zaalai ɠɛni botii ɠɛɛzu ti pɛ ba ga zɛbɛ wolai. 34 Ti zaama, nu nɔpɛ ge la ɠɛni ʋalani ani nɔpɛ ma, tɔɔzei zɔiti kpein zooiti ɓa pɛlɛiti ti ɠɛni ti ya, ti ɠɛni pɔdizu, ti ʋa ga ma zɔngɔi, 35 ti fe keelaiti zea, ti gaaɠwɛ ɛsɛ pɛ ba, eɠɛʋelei ma nu maavai la. 36 Leevi mavofodai ta ɠɛni ná, daaseigi ga Zozɛfe, é ɠɛni ga Sipele nu. Keelaiti ti daasei pɛɛni ga Ɓalanaɓase, (nii poluʋɛ ga «nu iɲɔdɔɔ nui»). 37 Zooi ta ɠɛni zea, é pɔdini, é ʋa ga ma zɔngɔi, é fe keelaiti zea.