Ⅰ Yĩ Paulo kĩ ĩyadani Kristo Yesu fɔtɔ ɔnyanɛ nɛ Baguma kawɛ onukpɛ̃, lɛtsɛlɛ ovoli kĩĩ mamɛna mi Baguma bati nɛ Efeso a kĩ miadi ɔnɔkɔali nɛ mi kadzi kamɛ, mikɛna ɔmɔa mɔ Kristo Yesu a. Ⅱ Baguma boe Ɔlɛga, mɔ boe Ɔlate Yesu Kristo bɛmɔ mi kɔnya bɛkpa mi lukudɔ lɛmɛ.

Ⅲ Mifɔ̃ bɔnyɛ Baguma boe Ɔlate Yesu Kristo Ɔlɛga a kɔlɛ, kitonɛkĩ nɛ ayekĩ bɔkɛna ɔmɔa mɔ Kristo sũ ni, ɛkpa boe hũhũ kamɛ nhila adi nyɛ adi kĩ edeĩ nɛ ode katinya a kamɛ a. Ⅳ Fɔmɔ Baguma labɔa katinya malo ni, ɛpau boe eyi kɔkɔɛ kĩ bɔ́anya ye bade fɔtsã ɔmɔa kakɛna mɔ Kristo akũ, ayekĩ bɔ́akɛna bati kpalɛwa kĩ nfumusu adima lɛláa be akũ nɛ ye anɛ. Ⅴ Ayekĩ Baguma awɛ boe kalɛ sũ ni, ehihiɛ kɔkɔɛ kĩ fɔ́atsã Kristo akũ yaakɛna boe ye babi. Ade fukĩĩ koũ nyɛ ye kakɔna mɔ kawɔlɛ a. Ⅵ Nɛ foesũ mifɔ̃ bumu Baguma, nɛ kɔnya baũ a kĩ ɛmɔ boe faa ɛtsãmɛna ye Obi kĩ yaátunɔ kalɛ a akũ! Ⅶ-Ⅷ Kitonɛkĩ fɔtsã Kristo babɔanɛ kawula kamɛ sũ ni, bɔna katɛ, ade foe nyɛ kĩ Baguma kɔa boe tɔkpa ete boe. Midã ayekĩ Baguma kɔnya a kĩ ɛmɔ́ boe, ɛkpa boe nyansã mɔ fɔtsa kayɔkanu a pɔnɛ! Ⅸ Baguma fɔ̃ bunyi nhihiɛ a kĩ ɛkɛna ɛkɔla eyi anɛ kɔkɔɛ, kĩ yaawũna ɛtsãmɛna Kristo akũ a. Ⅹ Nhihiɛ a nyɛ kĩ ntɛ lɔkɔ a wo ɔtɔ ni, Baguma aakpɔta lɛtsa nyɛ lɛtsa a kĩ ɛbɔa nɛ tite mɔ ode a ɛkɔa edo nɛ Kristo kayɔ.

Ⅺ Baguma fɔ̃ bɛkɛna lɛtsa nyɛ lɛtsa nɛ ye kawɛ mɔ nhihiɛ onukpɛ̃. Ade ɛpau boe kĩ bɔnya ye mɔawɛ bati nɛ ɔmɔa kakɛna mɔ Kristo kamɛ, nɛ ye kawɛ mɔ kalɛkayi, nɛ kayɔkayi a onukpɛ̃. Ⅻ Nɛ foesũ mifɔ̃ boe a kĩ bɔnya lɔtɔ bɔadã Kristo anɛ a, bumu Baguma kukũkpalɛ a. ⅩⅢ Ade mi malo, kĩ minu ɔnɔkɔali kalɛ a kĩ kɛnyɛ Kalɛ Wĩ a, kĩ kɛma mi nkpã katɛ a, midani Baguma bati. Ayekĩ mitɛ Kristo mido sũ ni, Baguma kɔa Hũhũ Kpalɛwa a kĩ ɛlɛ eyi a eyi mi ɔsũ kĩ minya ye bade. ⅩⅣ Hũhũ Kpalɛwa kĩĩ nyɛ kasipi kĩ bɔ́atɛ lɛtsa a kĩ Baguma lɛ eyi ɛkpa ye bati a. Kasipi kĩĩ akpa boe anɛ kate kĩ Baguma aakpa bati a kĩ bɛnyɛ ye bade a akũ akũ kadzi. Mifɔ̃ bumu ye kukũkpalɛ a!

ⅩⅤ Nɛ fukĩĩ sũ, kito anɛ kĩ nnu kĩ mitɛ boe Ɔlate Yesu mido, miawɛ Baguma bati a flee kalɛ a, ⅩⅥ ntáfɔ̃ Baguma kɔlɛ kanyɛ nɛ mi lɔlɔ. Mate anɛ nɛ mi akũ nɛ yĩ mpaɛbɔ kamɛ, ⅩⅦ ade mawã Baguma, boe Ɔlate Yesu Kristo Ɔlɛga, kĩ ɛnyɛ kukũkpalɛ flee a, kĩ ɛkpa mi Hũhũ a kĩ yaakpa mi nyansã, ɛnyɛ Baguma ɛtsa mi ayekĩ míanyi ye kanyi wĩ.

ⅩⅧ Make Baguma aduli kĩ ebinya mi anɛ mipuli mimɔ ye ɔhaĩ a, ayekĩ míanyi lɛtsa a kĩ de akũ ɛvɛ mi ɛkpa kĩ midã anɛ a. Ye awãwã nhila a kĩ ɛlɛ eyi kĩ yaakpa ye bati a kĩ bɛkpalɛ be akũ a atɛ kɔya paa. ⅩⅨ Midã ayekĩ ye kɔbɛ̃ kpale a akɛna adzuma nɛ boe a kĩ bɔtɛ ye budo a kamɛ. Kɔbɛ̃ kĩĩ kĩ kɔakɛna adzuma nɛ boe kamɛ a, ⅩⅩ ketimɔ kɔbɛ̃ a kĩ Baguma kɔa ɛdzɛla Kristo etomɛna kanɔkpa, ɛkɔa ye edzina nɛ ye sɔmɔna nɛ ode flee a. ⅩⅪ Ade awã Kristo anya lɛgã nɛ ode fɔgã flee, bati kĩ bideĩ otumi flee, bati kĩ bideĩ kɔbɛ̃ flee mɔ balate flee akũ a. Ye lɛgã kadzakɔ̃ bɛ̃ lɛgã nyɛ lɛgã kadzakɔ̃ nɛ katinya kĩĩ mɔ kikĩ kaaya a kamɛ. ⅩⅫ Baguma kɔa lɛtsa nyɛ lɛtsa edo nɛ Kristo abɔa kayɔ ade ɛkɔa ye ɛkpa asɔli a ndɛ ye lɔlɔ nɛ fɔtsa flee kamɛ a. ⅩⅩⅢ Asɔli kĩĩ nyɛ Kristo sukɛna, kĩ sɛfɔ̃ asɔli a kpɔla, ade Kristo mɔawɛ lɛmɛ afɔ̃ lɛtsa nyɛ lɛtsa akpɔla nɛ kakɔ nyɛ kakɔ a.