16
Jesús masãmʉãrigue
(Mt 28.1-10; Lc 24.1-12; Jn 20.1-10)
1 Cʉ̃́ã yeerisãri bʉreco sábado netõã́ri siro, María Magdalena, María (Santiago paco), Salomé sitiaãñúre sãĩyíra. Teeména Jesuyá õpʉ̃ʉ̃rẽ píopeora wáara tiimíyira. 2 Ʉ̃sã yeerisãri bʉreco síro macã bʉreco niirĩ, ñamisãñurõgã Jesuré cṹũri tutipʉ wáayira. 3 Cʉ̃́ã toopʉ́ wáara, cãmerĩ́ sãĩñáyira:
—¿Noã tuunécobosaadari tiituti biaríquicare? jĩĩyira.
4 Toopʉ́ jea, ĩñacora, tiiquicare aperopʉ́ nucũrĩ ĩñayira. Pairíquica peti niiyiro. 5 Tiitutipʉ sããwara, wãmo diamacʉ̃́niñape sĩcʉ̃ mamʉ duiri ĩñayira. Cʉ̃ʉ̃ sutiró butiró yoaroca sãñayigʉ. Cʉ̃́ã cʉ̃ʉ̃rẽ ĩñarã, bayiró ʉcʉáyira. 6 Cʉ̃ʉ̃ cʉ̃́ãrẽ jĩĩyigʉ:
—Ʉcʉárijãña. Mʉ́ã Jesús Nazaret macã macʉ̃rẽ cʉ̃́ã curusapʉ páabiatu sĩãã́rigʉre ãmaãrã tiia. Cʉ̃ʉ̃ masãtoaawĩ. Ãnorẽ́ maniĩ. Cʉ̃ʉ̃rẽ cṹũãrirore ĩñarã atiya. 7 Cʉ̃ʉ̃ bueráre, Pedrore wedera wáaya: “Cʉ̃ʉ̃ mʉ́ã sʉguero Galileapʉ jeatoagʉdaqui. Cʉ̃ʉ̃ jĩĩrirobirora toopʉ́ cʉ̃ʉ̃rẽ ĩñaãdacu”, jĩĩwa, jĩĩyigʉ.
8 Tiitutipʉ niiãrira ʉcʉá ñapõpirara dutijṍãyira. Cuira, ãpẽrãrẽ́ wederiyira.
Jesús María Magdalenarẽ bauásʉguerigue
(Jn 20.11-18)
9 Yeerisãri bʉreco niirĩ, Jesús cʉ̃ʉ̃ masããri siro, María Magdalenarẽ bauásʉgueyigʉ. Coorena too sʉgueropʉ siete wãtĩãrẽ cõãwionecoyigʉ. 10 Jesuména wáanetõrirare wedego wáamiyigo. Cʉ̃ʉ̃rẽ booritua, utira tiiyíra.
11 —Jesús catiawĩ; yʉʉ cʉ̃ʉ̃rẽ ĩñaãwʉ̃, jĩĩmiyigo.
Padeoríyira.
Jesús pʉarã́ cʉ̃ʉ̃mena wáanetõrirare bauárigue
(Lc 24.13-35)
12 Too síro Jesús pʉarã́ cʉ̃ʉ̃mena wáanetõãrirare bauáyigʉ cã́pũpʉ wáarare. Cʉ̃ʉ̃ ãpĩbíro biigʉ́ bauáyigʉ. 13 Cʉ̃́ã ãpẽrã́ Jesuména wáanetõãrirare wedera wáamiyira. Cʉ̃́ãcãrẽ padeoríyira.
Jesús cʉ̃ʉ̃ bueráre dutirigue
(Mt 28.16-20; Lc 24.36-49; Jn 20.19-23)
14 Too síro Jesús cʉ̃ʉ̃ buerá oncere bauáyigʉ cʉ̃́ã mesapʉ duiráre. Cʉ̃́ãrẽ jĩĩyigʉ:
—¿Deero tiirá cʉ̃́ã wederi, yʉʉ masãré quetire tʉopacára, padeoríarĩ? Pairó wãcũtutuare cʉoría mʉ́ã, jĩĩyigʉ.
15 Cʉ̃́ãrẽ jĩĩnemoyigʉ:
—Niipetiropʉ niipetirare yʉʉ basocáre netõnére quetire wedera wáaya. 16 Yʉʉre padeó, wãmeõtinogʉ̃no netõnénogʉ̃daqui. Yʉʉre padeohégʉno ñañarõ tiinógʉ̃daqui. 17-18 Yʉʉre padeorá yʉʉ dutirémena wãtĩãrẽ cõãwionecomasĩãdacua. Ãpẽrãyére wedesemasĩripacara, wedeseadacua. Cʉ̃́ã ãñaãrẽ ñeerĩ, teero biiri pũniré sĩnirĩ́, merẽã wáaricu. Diaráre ñaapeóri, netõã́dacua. Yʉʉre padeorá cʉ̃́ã padeorére ẽñorã́, teeré tiimasĩ́ãdacua, jĩĩyigʉ.
Jesuré néemʉãrigue
(Lc 24.50-53)
19 Marĩ Õpʉ̃ Jesús cʉ̃́ãrẽ wedeari siro, ʉ̃mʉã́sepʉ néecomʉãnoyigʉ. Cõãmacʉ̃ya wãmo diamacʉ̃́niñape jeanuãyigʉ. 20 Cʉ̃ʉ̃ buerá niipetiropʉ cʉ̃ʉ̃ netõnére quetire wedera wáawa. Cʉ̃́ã wederi, Jesús cʉ̃ʉ̃ basirora cʉ̃́ãrẽ tiiápurigʉ niiwĩ. Cʉ̃́ã wederére “diamacʉ̃́rã niiã” jĩĩgʉ̃, ãñurére cʉ̃́ãrẽ tiiẽ́ñorĩ tiirígʉ niiwĩ.* Ate versículos apepṹ bʉcʉpũpʉ baurícu; apepũpʉ́ baucú.