1 Ta jtsꞌibaboxuc talel scꞌoplal ti Buchꞌu tey xa onoꞌox oy cꞌalal lic ayanuc talel scotol ti cꞌusitic oye. Ti vuꞌuncutique laj quilcutic ta jsatcutic. Laj caꞌibecutic ti scꞌopojele, yuꞌun laj quilcutic, laj jpiccutic. Taje, jaꞌ ti Buchꞌu yichꞌoj ta sventa ti cuxlejale. 2 Ti Buchꞌu yichꞌoj ta sventa ti cuxlejale laj yacꞌ sba ta ojtiquinel. Laj quilcutic. Jech o xal ta jvinajesbecutic scꞌoplal. Ta xcalcutic avaꞌiic scꞌoplal ti Buchꞌu yichꞌoj ta sventa ti cuxlejal sbatel osile, ti tey to ox xchiꞌinoj ti Dios Totile. Avi tana liꞌe, laj yacꞌ sba ta ilel ta jtojolcutic. 3 Jech o xal un, jamal ta xcalcutic avaꞌiic ti laj xa quilcutique, ti laj xa caꞌibecutic ti scꞌopojele, yoꞌ jech jun avoꞌntonic ta jtojolcutic jech chac cꞌu chaꞌal ti vuꞌuncutique ta melel jun coꞌntoncutic ta stojol ti Jtotic Diose schiꞌuc ti Snichꞌone, jaꞌ ti Jesucristoe. 4 Jaꞌ yuꞌun un, ta jtsꞌibaboxuc talel taje, yoꞌ jech xamuyubajic ta jꞌechꞌel.

5 Jaꞌ jech laj xchanubtasuncutic ti Jesucristoe ti jaꞌ jech ta xcalcutic avaꞌiique: Ti Diose sac jaman xojobal ti stuque. Mi jaꞌuc jutebuc oy icꞌal osil ta stojol. 6 Mi ta xcaltic ti junotic schiꞌuque cꞌalal oyotic ta icꞌal osile, jutbil ti cꞌusi ta xcaltique, ti cꞌusi ta jpastique. 7 Pero mi oyotic ta saquilal osil jech chac cꞌu chaꞌal ti Dios ti oy ta saquilal osile, jaꞌ yuꞌun umbi, jun coꞌnton jcotoltic. Jaꞌ jech xtoc schꞌichꞌel ti Snichꞌone, jaꞌ ti Jesucristoe, ta spoc ti cꞌusiuc noꞌox mulil ti oy ta jtojoltique.

8 Yan mi ta xcaltic ti muꞌyuc ti jmultique, ta jloꞌla jba jtuctic, jecheꞌotic. 9 Pero mi jamal ta xcaltic ti jmultique, ta jpat coꞌntontic ta stojol ti Dios ti ta spas ti cꞌusi lec ta xile. Jech o xal un, ta xijyacꞌbotic perdón yuꞌun ti jmultique. Jaꞌ jech xtoc ta xispocbotic scotol ti jchopolaltique. 10 Pero mi ta xcaltic ti muꞌyuc jtaoj jmultique, ta jbistic ta jutcꞌop ti Diose ti cꞌalal ta xal ti jsaꞌmulilotique.