1 Dhali ka cim Ḵamsiin p̱u’dki’d mo tani aris uni ’baar mo tulki is mo mmonṯal ’de/ mo. 2 Dhali ki jahanne/ ise/ to goyina is mo ’peni momis mo jin wana e ki ’tham jin guski’d mo dhali jin poshki’d kagahara mo. A’di ’tu’d gu’bi ’baar mo jin ’kona uni nycine/ mo. 3 Dhala le’d yayi’d pi uni i is mo mmowa e ki ji o’d mo mmoḵwa/ bwa mo dhali mmo’ko uni i’kup̱ ka ’deṯe/ ’deṯe/ mo be. 4 Dhali uni ’baar mo ’tu’dkunu mo ki Shi/in Dheleladhelel mo dhali ṯel gwo ’pen mo mmowal ’twan tiya mo mmo’bitha Shi/in uni is mo mmowal ’twa/ ki she/ ki she/ mo be.

5 Dhali ’Kwani Yahuuda/ kun ’kon e Pa Urushaliim kun iiyin ’peni bampan tiya ’baar mo ki ’beles kun ’kon ’baame’da ’ceshi momis mo. Uni ta ’Kwani Yahuuda/ kun ḵo/kina Arumgimis mo. 6 Ki to yan ciḵkunu mo tani awaambuhany ’kwani tulki isi monṯal ’de/ mo dhali dumbulkin kagahara mo haali/ aris ’kwani ’baar mo ciḵki uni ’twa/ mo mmowala uni ’twam buni ki she/ ki she/ ka ’deṯe/ ’deṯe/ mo. 7 Dhali uni ’baar merkin kagahara mo dhali kulum gwo ibwa mo dhali o gwo mo ki: Hili ma. ’Kona uni ki ta ’Kwani gi Pany Jaliil ’taa aris uni ’baar kun o gwo kana? 8 Dhali ana ciḵa gwo, aris ana ’baar ka ’deṯe/ ’deṯe/ ki ’twam bana ki she/ ki she/ uni kun dhotha ana manakan? 9 ’Kwani gi Pam P̱arṯiya mo dhali ’peni Pa Maadi mo dhali Pa Iilaam mo dhali ’kwani kun ’kon e pa ma uḵa ’cesh jin tana dhan yi’deya ḵara’b mo dhali Pa Yahuudiyya mo dhali Paŋ Kappadukiyya mo dhali Pam Punṯus mo dhali Pan Asiyya mo. 10 dhali Pam P̱arijiyya mo dhali Pam Pamp̱iliyya mo dhali Pam Masir mo dhali ushi bampa/ gi Pa Libiyya mo kun ’kon is ’ko’d ’peni Paŋ Kerawaan mo dhali yilkina/ ’peni Pa Ruumiya mo kun ta ’Kwani Yahuuda/ mo dhali kun ’koki ta ’Kwani Yahuuda/ mo tani hili gwo ma Arumgimis butha uni mo. 11 ’Kwani gi Paŋ Kariiṯ mo dhali ’Kwani gi Pa Arab mo. Ana ciḵa gwo mmoṯora uni gwo ki ’twam bana ki dhan mii ma Arumgimis kun caaca mo. 12 Dhali uni ’baar mo merkin dhali mol toŋ kamu/ mii mo dhali mmo/o gwo mo ka rem ’kup̱ ki: Ata yan wakan mo? 13 Hili kun tiya miikin ka maḵ mo mmo/o gwo mo ki: Uni ’tu’du/ mo ki yimana mura’th jin ta jin this jin ḵa/u ki ŋah ŋah mo be.

14 Hila Buṯerus doshki’d ki mis nyaḵki uniŋ ’kume’d i’ce’dka ’de/ mo dhali a’di ’de’k ’twa/ mo dhali ṯor uni gwo mo mmo/o gwo mo ki: Um ’Kwani gi Pa Yahuudiyya mo dhali um ’baar mo kun ’kon e Pa Urushaliim mo. Dhalki a’di yan mishu mo e bwam um mo dhali dhuyi ’cem bum mmociḵ gwom pem mo ma. 15 Haali/ gwahan ’kon ma su ki ’kosh mo me’d jin ṯosha um mo haali/ mo ta’da tente/ jin aṯẖa’d naskina/ mo. 16 Hili yan ta a’di jin okin ma manc̱i gwo ma Arumgimis kadhamo/ jin yuḵu ka Yu/iil mo ki:

22 Um ’Kwani ma Israyiil, ciḵi gwo gwansan mo ma. Yesus gi Pa Naasira jin maŋ ma Arumgimis ibwam um ki mii kun ’bitha’bi’th dhali ka dhan mii gun caaca mo dhali momer kun miikin ma Arumgimis e a’di e bwam um me’d jin mishkina um mo. 23 Yesus yan mmoc̱inu a’di ki bwa ma Arumgimis ka ḵar/eŋ gana/ mo dhali mmomishkin ma Arumgimis nṯwa/a/ mo tani um ’koshki a’di jwa mo ki cwany’ciṯẖan dhul mo dhali a’di ’koshkina um jwa mo ka dun ṯorony ki jwam ’batha’d me’d ’kwani gun ush gwoŋḵan jin c̱inu mii mo. 24 Hili Arumgimis ki ’de’k a’di imis mo mmo’cuḵa a’di a’di ’pena nyor wu mo haali/ a’di molkunu bu’th mo e mowu kan mo. Haala Dawuu’d o gwo gom a’di ki:

29 Awaḵ pema, aha/ mina ’taki o um gwo ki nyanye/ goma Dawuu’d jin ta’da dhana baban dhamo/ mo, a’di jin wuki’d mo dhali kankunu si’da/ mo dhali moŋ’kup̱ajem piti di’di ana ntaga cim yan mo be. 30 Mmotana a’di amanc̱i gwo ma Arumgimis kadhamo/ mo tani dhali mmomisha a’di gwo jin on ma Arumgimis mmothul a’di me’da p̱o/ ki a’di midi kar emen pitiŋ kamu/ e ḵursin tap̱am piti mo tani 31 a’di mishki’d iṯwa/a/ mo dhali oki gwo si’da/ gom mompinu ma Ḵrisṯẖos ki a’di yisa dhalkunu ’pen mo eya Haawiya yisa dhali shuman is piti yisa p̱arki momp̱u/ e yisa. 32 Yesus yan ’de’kkin ma Arumgimis imis mo tani ana ’baar tana iman/o gwo gom a’di mo be. 33 A’di mmokaru a’di ki ca e me’da bim poros ma Arumgimis mo tani dhali mmobutha a’di gwo ’peni Com jin onu is gom Shi/in Dheleladhelel mo tani a’di gac̱ki’da pije/ mo a’di yan jin misha um mo dhali jin ciḵa um si’da/ mo. 34 Haala Dawuu’d yisa seki momisa. Hili a’di o gwo mo ki is piti mo ki:

37 Dhali ki uni ciḵki gwo yan mo tani uni suka gwo adum buni mo dhali owa Buṯerus mo dhali imandhun ma Yesus ki shen tiya gwo mo ki: Ikam bamma, am mina miiya ta mo? 38 Dhala Buṯerus ki o uni gwo mo ki: Rici adu is mo ma dhali miiyi ki yi’de/ ki gway ma Yesus Ḵrisṯẖos mo, aris umi ’baar mo ki ’beles gom miinthus bum minu gwam um mo. Dhali um mini buṯẖ Shi/in Dheleladhelel jin ta a’di jin c̱inu ki me’d mo. 39 Haali/ gwo jin onu is mo tani, a’di onu gom um mo dhali uc̱im bum mo dhali goma ris uni ’baar mo kun si’dkin mo be, aris uni ’baar mo kun mina Tap̱a Arumgimis bana iyuḵ i a’di mo be. 40 Dhali gwon tiya ka ris ṯora a’di uni mo dhali mmomalas uni mo mmo/o gwo mo ki: Woṯẖi/ is bum ’peni ’kwani kun tana nyaḵum yil bum kun ta thus ki thus mo. 41 Yan’ko’d uni si’da/ kun bu’th gwom piti mo, uni miikunu ki yi’de/ mo dhali uni maru is ka cim yin mo ’kwani ka ris wari wana e ka alaap̱i kwara mo. 42 Dhali uni ’kon mmoroc̱ sho’k ki sule/ e gwo kun ṯora imandhun ma Yesus ki she/ mo dhali e mombuṯ si’da/ mo, mmo’ce’d maaŋḵuthu’d mo be dhali e mon’tho si’da/ mo be.

43 Dhali moŋḵogu di’da p̱o/ aris uni ’baar ki ’beles mo. Dhali miimer dhali mii kun caaca kun tana ris mo tani miikina imandhun ma Yesus ki she/ mo be. 44 Dhali uni ’baar mo kun gam gwo is mo nyaḵki ’ko mo dhali nyaḵ to dhu ’baar mo. 45 Mom buni yola uni mo dhali tom buni yola uni si’da/ mo dhali ḵwa/ uni bwa mo ki uni ’baar mo me’d jin mina uni mii ta gi to ka ’deṯe/ ’deṯe/ mo be. 46 Dhali ka yempa/ yempa/ mo tani uni roc̱ki sho’k ki sule/ mo e gwon ṯal ’de/ mo e gu’b gi mondheleladhelel mo dhali mmo’ce’d maaŋḵuthu’d e gu’b buni si’da/ mo. Uni ki bu’th tonṯe/ ki bwam ’boron mo dhali ki bwan ṯal ’de/ mo 47 mmomaŋa Arumgimis mo dhali ’kwanin tiya ’baar maŋ uni si’da/ mo. Dhali ka yempa/ yempa/ mo tani Tap̱a mar uni is ki uni kun woṯẖkunu mo be.