1 Yakuub c̱a’bki’d mo e mony’cesh jin takina coma c̱a/ ap̱o/ mo e bampa/ gi Paŋ Kanaan mo. 2 Yansan a’di ita gwo jin beledhu goma waḵ ma Yakuub mo.

Yuusup̱ a’di ’kona yili ’kume’d i’ce’dka pesu/ ap̱o/ mo me’d jin urkina a’di ama’diny ḵa’bal nyaḵki ikam mo. A’di ta’da ’ci nyaḵki iya/ ma Bilhah dhala Silp̱ah mo uni kun ta up̱ ki com mo, dhala Yuusup̱ ḵalki’da ris gwon thus kun thama ikam a’di imii mmoṯor ababam buni mo. 3 Dhala Israyiil a’di enki’da Yuusup̱ kagahara mmobol uc̱im pitin tiya e mo haali/ a’di ta ya/m piti jin tana a’di ka dhan piti mo. Dhali a’di shoki a’di burrinyen turga/ jin tur ma bi ki tur mo. 4 Hili ki ikam p̱arki mo e ka babam buni enki a’di kagahara mo mmobol ikam piti e mo tani uni shi/ki a’di i e mo dhali ’te bwa mmoṯora ṯor nyaḵki a’di ki moŋḵu’th is mo be.

5 Dhala Yuusup̱ shu’bki jan mo dhali ki a’di ṯorki ikam gwo mo tani uni ki thisi ’cur ’pen ishi/ki a’di i e ki nyanye/ mo. 6 A’di oki uni gwo mo ki: Ciḵi gwony jan jin shu’bka/ mo ma. 7 Hili mo mo ma, ana ’kokina mmodeḵ deḵken pos e bwam bunto mo dhali hili mo mo ma, deḵken pos pem a’di icuki mis mo dhali dosh ka ji sho’k mo dhali hili mo mo ma, deḵken pos bum uni tulki isi monṯal ’de/ ijim pem mo dhali goŋ is ka ’cesh mmoluŋ deḵken pos pem mo. 8 Ikam piti o a’di gwo mo ki: A/e ka jiŋ gana/ mini ji/a ji ap̱o/ aman mowa? Walla a/e mini ta tap̱a ap̱o/ aman mowa? Wakan uni shi/ki, a’di i e ki nyanye/ mo gom gwony jan piti mo dhali gom gwom piti mo. 9 Dhali yan’ko’d a’di shu’bki jana kamu/ mo dhali ṯorki a’di ikam mo dhali o gwo mo ki: Hili mo mo ma aha/ shu’bkina jana kamu/ mo dhali hili mo mo ma, atente/ dhali appe mo dhali acul kun ’koni ’kume’d i’ce’dka ’de/ ap̱o/ mo tani uni ’kokin mo mmogoŋ is ka ’cesh mo mmoluŋ aha/ mo be. 10 Hili ki a’di ṯorki ’pemen jan yan ki com mo dhali ikam piti mo tani ababam piti a’di iḵucurki a’di mo dhali o a’di gwo mo ki: Jan yan ta’da ta mo jin shu’bkina /e mo? A/aha/ dhali kwan dhali ikam pini ka jiŋ gana/ mina iiku/ mo dhali ’ko is bam ki goŋgo/ ibwambori /e mowa? 11 Dhali ikam piti uni ṯaca bwa gom a’di mo hili ababam piti a’di idhuki gwo gwansan ibwa mo.

12 Dhali ikam iikin mo mmoc̱iya ma’diny ḵa’bal gi com ashon dhii/i’d mo mmo’dish Pan Shakiim is mo. 13 Dhala Israyiil oki’da Yuusup̱ gwo mo ki: Ikam pini ’koki ura ma’diny ḵa’bal mo mmoc̱iya shon dhii/i’d mmo’dish Pan Shakiim is mo ’taa? Yayu/ mo, aha/ mina hash /e i uni mo. Dhali a’di thoḵki a’di gwo mo ki: Aha/ dina imahan mo be. 14 Wakan a’di oki a’di gwo mo ki: Yayi mo shwane/ dhali p̱ar mo e mo waḵki/ ikan ’kon ki ’bore/ mo dhali nyaḵka ma’diny ḵa’bal mo dhali ḵalaa/ gwo ka nyaŋ’ko’d mo. Wakan a’di hashki a’di mo ’peni embul wosh ma Habruun mo dhali a’di p̱u’dki’d mo e Pan Shakiim mo. 15 Dhali wathiŋ kamu/ gamki a’di mo mmomaŋaskina a’di mo e mombwaasho mo dhali wathi/ doṯki a’di gwo mo ki: /E ŋap̱kina tinta mo? 16 Aha/ ŋap̱kina ikam pem mo. A’di oki gwo kan mo mmo/o ki: Ṯoraa/ mo ma, aha/ ’thona /e mo, mane mom buni jin c̱ina uni ama’diny ḵa’bal ashon dhii/i’d mo? 17 Dhali wathi/ thoḵki a’di gwo mo ki: Uni iikin mo haali/ aha/ ciḵa ṯor jin ṯorkina uni mo mmo/o gwo mo ki: Dhalki ana iina mo e Pan Duṯẖan mo. Wakana Yuusup̱ baṯẖki ikam isho’k mo dhali gam uni e Pan Duṯẖan mo.

18 Uni mishki a’di ’pena dhana/ ki si’d si’d mo dhali nṯwa/a/ ki a’di p̱u’dki’d mo mmo’dish uni is mo tani uni gamki ’twa/ ’kup̱ mo mmo’kosh a’di jwa mo. 19 Uni oki gwo ka rem’kup̱ mo ki: Amanshu’b jana ac̱aan a’di ip̱u’dki’d mo. 20 Iiyu/ mo shwane/ dhalki ana ’kosha a’di jwa mo dhali biṯ a’di mo e jis ’deŋ kamu/ mo dhali yan’ko’d ana mina o gwo mo ki: A’di ’kosha toŋgwap̱i/ jin shwan ma nyor jwa mo dhali ana mina p̱ar mo e mo ’pemen jan piti yan midi wakata mo? 21 Hila Ra/ubiin ciḵki gwo yan mo tani a’di ’cuḵki a’di mo ’peni me’d buni mo dhali o gwo mo ki: Dhalkina ki ’kosh mondiki/em piti mo. 22 Dhali Ra/ubiin oki uni gwo mo ki: Dhalki a’diya bas ki p̱o mo. Biṯi a’di e jis yi’de/ gwan kun ’kon e mombwaasho mo hili dhalki me’d bum ki dhu ap̱o/ a’di mo, ki a’di midi ’taki ye a’di mo ’peni me’d buni mo mmowar a’di is mo goma babam piti mo be. 23 Wakana Yuusup̱ me’d jin p̱u’dkina a’di e ikam piti mo tani uni ’cuḵki a’di burrinyen turga/ ’peni is mo a’di jin ta burrinyen turga/ jin tur ma bi ki tur jin hi’thkina a’di mo. 24 Dhali uni bu’thki a’di mo dhali biṯ a’di e jis yi’de/ mo. Jis yi’de/ yan a’di idi bwa ’te/ mo, yi’deŋ kamu/ yisa di’d nycineya.

25 Dhali uni ’kokina ’cesh mo mmoshwa to mo dhali uni ’de’kki em buni ’kup̱ ki mis mo tani uni p̱arkina dhana ŋul’kup̱ ’Kwani ma Isma/iil e mo mmop̱u’du/ mo ’peni Pany Jil/aad mo nyaḵka ris kalman buni mo mmoḵala ’bi’c mo dhala ’bi’c ’peni cwa jin yuḵu ka balsam mo dhali cwa jin yuḵu ka murr mo mmo/iikina uni mo mmo/ii e bway buni bway Pa Masir mo mmoḵal uni ka luŋgu’b mo. 26 Dhala Yahuuda oki ikam gwo mo ki: Miim ’boro’d jana mina ana gam mo waḵki/ ana mina ’kosh a’di jwa mo dhali diḵa bas piti e mo. 27 Iiyu/ mo dhalki ana yola a’di mo e ’Kwani ma Isma/iil mo dhali dhalku/ me’d bana ki dhu ap̱o/ a’di mo haali/ a’di ita’da kam bana mo, a’di jin ta buŋgwar is bana mo. Dhali ikam piti c̱ikina hirdhe/ ki gwom piti mo. 28 Dhali ’Kwani Midyaan kun ta imanyol to mo si’da/ iikin ki iimpe mo dhali dirkina Yuusup̱ ka pije/ mo dhali ’de’k a’di ka pije/ ’peni jis yi’de/ mo dhali yolki a’di mo e ’Kwani Isma/iil mo ka guurush jin ’koni iss ’de/ mo a’di jin ta ’dolkon kush mo dhali uni suskina Yuusup̱ bway Pa Masir mo be.

29 Ka Ra/ubiin doḵki’d ka nyaŋ’ko’d e jis yi’de/ mo tani dhali p̱ara Yuusup̱ e ki a’di diki di ijis yi’de/ mo tani a’di dherki burrinyem piti bwa mo be. 30 Dhali a’di doḵki’d ka nyaŋ’ko’d e ikam piti mo dhali o gwo mo ki: Ari dhuru’c wathi/ a’di p̱iki’d mo dhali aha/ mo mane mo jin miga/ ya mo? 31 Uni bu’thki burrinye/ ma Yuusup̱ mo dhali ’kosh mi jwa mo dhali biṯ burrinyen turga/ yan eya bas mo. 32 Dhali uni ki hash burrinyen tura bi yan mo dhali ḵali a’di eya babam buni mo dhali o gwo mo ki: A’di yan gamkina aman mo. P̱ari a’di e mo shwane/ waḵki/ a’di ta ji gi ya/m pini mo walla yisa. 33 Dhali a’di nyiṯẖki a’di mo dhali o gwo mo ki: A’di ta burrinyen turga/ gi ya/m pem mo. A’di be ’koshkina toŋgwap̱i/ mo ’te/ be. Gwo jin minu dhaŋ goma Yuusup̱ p̱iyi’d mo haali/ a’di idherkina to bwa ka gwap̱i/ mo. 34 Dhali yan’ko’da Yakuub dherki burrinyem piti bwa mo dhali deḵ burrinyen shawaal e empa’d piti mo dhali ko gom ya/m piti acim ka ris ris mo. 35 Aris iya/m piti dhali aris i’bwa/m piti cuki mis mo mmomalas a’di mo tani hili a’di ushki’d mo ki a’di minu malas mo dhali o gwo mo ki: Yisa. Aha/ mina ya ka luŋgu’b eya Haawiya mo gom ya/m pem mo. Koŋ gana/ jin gwona ki kony jwa mo a’di idosh ’peni o’d kan mo. Wakan com gwoki’d gom a’di mo be. 36 Ki ari embul mo ari’ceenne/ mo tani ’Kwani Midyaan yolki a’di mo e Pa Masir mo eya P̱uthip̱ar a’di jin ta wathi/ jin cil ma askar goma P̱irawn mo a’di jin ca’d ki ’kwani ma mee kun jina ji mo be.