1 Ka Yakuub da/arki gwo ki pos ishki’d mo e bampa/ Masir mo tani a’di oki iya/m piti gwo mo ki: Atinta i’kona um mmohili e ka rem’kup̱ kan mo? 2 Dhali a’di oki gwo mo ki: Hili mo mo ma, aha/ ciḵkina gwo mo ki pos ishki’d mo e bampa/ Masir mo. Iiku/ ka luŋgu’b mo dhali yoli pos ’peni mun gom ana mo ki ana mina ’ko ki e mo dhali ’koki wu mo be. 3 Wakan ikam ma Yuusup̱ kun ’koni ’kume’d uni iikin ka luŋgu’b mo mmoyoli pos ’peni bampa/ Masir mo be. 4 Hila Yakuub diki hasha Benyamiin mo a’di jin ta’da kam ma Yuusup̱ mo nyaḵki ikam mo haali/ a’di ḵo/ki is mo oki tonthusa kamu/ midi ’taki biṯ a’di ap̱o/ mo be. 5 Wakan iya/ ma Israyiil p̱u’dkin mo mmoyol to mo nyaḵki ’kwani kun p̱u’dkin mo gom gwon ṯe/ ’peni bampa/ Kanaan mo be.

6 Dhali aYuusup̱ a’di itaki’da mudhiir mo ap̱o/ pa ’baar mo. A’di iyolki to goma ris ’kwanim bampa/ ’baar mo. Dhali ikam ma Yuusup̱ uni p̱u’dkin mo dhali goŋ is buni ka ’cesh mo ibwambori a’di mo ki jis/em buni kun ’dokina uni ka luŋgu’ba ’cesh mo. 7 AYuusup̱ mishki ikam mo dhali nyiṯẖ uni mo hili a’di miiki uni ka jin thus me’d ’kwanin tiya kun ’kona e ki she/ mo dhali a’di ṯorki’da ṯor nyaḵki uni ki ’twany ’cwar mo mmo/o ki: Um iiyin ’peni mana mo? A’di oki’d kan mo. Uni thoḵki a’di gwo mo ki: ’Peni Paŋ Kanaan mo mmoyol tonṯe/ mo be. 8 Wakana Yuusup̱ nyiṯẖki ikam mo ihili uni i’koki mish a’di mo be. 9 Dhala Yuusup̱ kakina gwony jan piti e mo a’di jin shu’bkina a’di gom uni mo dhali a’di oki uni gwo mo ki: Um ta ’kwani kun parkina mee mo, um p̱u’dkin mo mmop̱ar bampa/ e mo ki a’di ’ka’da is ki ’ka’d mo. 10 Uni thoḵki a’di gwo mo ki: Yisa tap̱am bam hili mmoyol tonṯe/ mo a’di ip̱u’dkina c̱iŋkinam pini mo. 11 Aman ’baar mo tana iya/ gi wathin ’de/ mo. Aman tana ’kwaniŋ ḵar/e mo, c̱iŋkinam pini gwansan ’koki ta ’kwani kun parkina mee mo. 12 A’di oki uni gwo mo ki: Yisa mo ti mmo’ka’da bampa/ yan is ki ’ka’d mo ti. A’di ti ip̱u’dkina um mo mmop̱ar mo e mo. 13 Dhali uni thoḵki gwo mo ki: Aman kun tana c̱iŋkinam pini mo aman kun tana ikam kun ’kon jasi i’kume’d i’ce’dka su/ mo kun ta iya/ gi wathin ’de/ mo e bampa/ Kanaan mo dhali hili mo mo ma, ara gwa’dgaŋ gana/ ka tee yan mo tani a’di idiyi’di nyaḵka babam bam mo dhali jaŋ kamu/ yisa di’d doḵ/eya. 14 Hila Yuusup̱ thoḵki uni gwo mo ki: Me’d gwo jin okika/ um mo tani aha/ ona um ki um ta ’kwani kun parana mee ka jiŋ gana/ mo. 15 Gom mii yansan mo tani um minu pal mo ki mondiki/e ma P̱irawn mo, um mini mish ii ’peni mo yan yisa ntagi um mini sus ara kam bum jin ta’da ṯu/u imahan mo. 16 Hashi jan ’de/ ’peni um mo dhali dhalki a’di susi’da kam bum mo ki um ’kon ka yiha/ eya sijin mo ki gwom bum minu nyo/ mo, mishki gwoŋ gana/ di’d e um mo walla isi’da/ ki mondiki/e ma P̱irawn mo, um ka jiŋ gana/ ta ’kwani kun parkina mee mo. 17 Dhali a’di dhuki uni ’baar mo mmonṯal ’de/ eya sijin mo ka cimi kwara mo.

18 ’Ko’da cimi kwara mo tani aYuusup̱ oki uni gwo mo ki: Miiyi mii yan mo a’di i’kona um ki e mo haali/ aha/ ḵo/kina Arumgimis mo be. 19 Waḵki/ um ta ’kwaniŋ ḵar/e mo tani dhalka kam buma kamu/ diki’da sijin mondeḵ is mo dhali dhalki kun tiya ki ii mo dhali ḵal pos gom ṯe/ mo gom kuŋ gu’bi ’baar mo. 20 Dhali susi ara kam bum jin gwa’da’d i aha/ mo wakan ki gwom bum minu ’da’b ’pen mo dhali um mini ’koki wu mo be. Dhali uni miikin wakan mo be. 21 Dhali yan’ko’d uni oki gwo ka rem’kup̱ mo ki: Ka jiŋ gana/ ana ’kona mii i’ba/ isi gwo goma kam bana mo me’d jin mishkina ana mii ma ḵashiram piti jin diki’d e mo ma c̱is mo ki a’di suski ana gwo sho’k mo dhali ana ’konaki ciḵ gwom piti mo. Gom gwo gi wakan mo tani a’di biṯa mii ma c̱is ap̱o/ ana mo be. 22 Dhali aRa/ubiin thoḵki uni gwo mo ki: Dika/ ki o um gwo mo ki: Dhalku/ miinthus ki mii ap̱o/ ari dhuru’c wathi/ mowa? Hili um ’koki ciḵ gwo mo. Wakan shwane/ mo jin ri/u ari/ gom abas piti mo tani a’di ip̱u’dki’d mo be. 23 Uni yisa mishi gwo ’bana ka Yuusup̱ ciḵki gwom buni mo haala manluḵ ’twa/ a’di idiki’d e bwaman uni mo be. 24 Dhali yan’ko’d a’di ṯu’kki ’ban ’peni uni mo dhali ko mo be. Dhali a’di doḵki’di uni ka nyaŋ’ko’d mo dhali ṯorki’da ṯor ki uni mo. Dhali a’di bu’thki’da Shim/uun ’peni uni mo dhali deḵ a’di mo ibwambori jis/em buni mo be. 25 Dhala Yuusup̱ ḵanki gwo mo mmo’tu’da wolgwap̱im buni ki pos mo dhali ro’dki uniya guurush buni e ’twamana wolgwap̱im buni ka ’deṯe/ ’deṯe/ mo dhali thosonki uni tonṯe/ kun mina uni mii ishwa e bway iim buni mo. Yan a’di imiikunu gom uni mo be.

26 Dhali yan’ko’d uni su’kki thuluny buni to ap̱o/ mo dhali ship̱iṯi ii mo be. 27 Dhali ki jan ’de/ ’peni uni ḵa’dki’da wolgwap̱i/ ’twa/ mo mmo’taki c̱i thuluny piti to mmoshwa e mo jin ishkina uni mo tani a’di mishki’da guurush e ’twaman ma wolgwap̱im piti mo be. 28 Dhali a’di oki ikam gwo mo ki: Aguurush pem doḵkunu aha/ i is ka nyaŋ’ko’d mo. A’di a’dihe/ e ’twaman ma wolgwap̱im pem mo. Gom mii yan mo tani adum buni ushki uni me’di e mo dhali uni ṯu’kkin ka rem’kup̱ mo mmode ki bir bir mo mmo/o gwo mo ki: Atinta a’dan mo? a’di jin miikin ma Arumgimis ana mo.

29 Ki uni p̱u’dkina Yakuub jin ta’da babam buni e bampa/ Kanaan mo tani uni ṯorki a’di aris to kun miikin ki uni mo mmo/o gwo mo ki: 30 Wathi/ jin ta tap̱a ap̱o/ bampa/ yan mo tani a’di ṯorki’da ṯor ki aman ki ’twany ’cwar mo dhali bu’th aman mo, o ki aman tana ’kwani kun parkina mee mo ap̱o/ bampa/ mo. 31 Hili aman thoḵkina a’di gwo mo ki: Aman tana ’kwaniŋ ḵar/e mo dhali aman yisa tana ’kwani kun parkina mee mo. 32 Aman tana ikam kun ’kon jasi ’kume’d i’ce’dka su/ mo, iya/ ma babam bam mo, jan ’deŋ kamu/ yisa diyi’da dhali ara ṯu/u shwane/ yan a’di idiyi’d nyaḵka babam bam e bampa/ Kanaan mo. 33 Dhali yan’ko’d wathi/ jin ta tap̱a gom bampa/ yan mo oki aman gwo mo ki: Gom kan mo tani aha/ mina mish um ki um ta ’kwaniŋ ḵar/e mo. Dhalka kam buma kamun ’de/ nyaḵki aha/ mo dhali ḵali pos mo gom ṯe/ gom kuŋ gu’b bumi ’baar mo dhali iiku/ mo e bway bum mo. 34 Susi ara kam bum jin gwa’da’d e aha/ mo dhali yan’ko’d aha/ mina mish um ki um ’koki ta ’kwani kun parkina mee mo hili um ta ’kwaniŋ ḵar/eŋ gana/ mo dhali aha/ mina ’cuḵki uma kam bum mo dhali um mini yol to e bampa/ yan mo be.

35 Me’d jin wolkina uni arisa wolgwap̱im buni to mo ’peni bwaman mo tani hili mo mo ma, arisa guurush buni kun deḵkunu is mo tani gamkunu e bwaman ma wolgwap̱im buni ki she/ ki she/ mo dhali uni dhala babam buni uni p̱arkina guurush buni e mo kun deḵkina uni mo, uni merkina ijamasa/. 36 Dhala Yakuub jin ta’da babam buni oki uni gwo mo ki: Um bu’thki uc̱i ’peni aha/ mo dhala Yuusup̱ yisa di’da dhali aShim/uun si’da/ a’di p̱iki’d mo adhali um shwane/ mini susa Benyamiina? Aris mii gwansan uni p̱u’dkina p̱o/ aha/ mo. 37 Dhali yan’ko’da Ra/ubiin oki’da babam piti gwo mo ki: ’Koshi iya/m pem su/ gwan jwa mo waḵki/ aha/ dinaki doḵi a’di pa i /e ka nyaŋ’ko’d mo. Kari a’di e me’d pem mo ma dhali aha/ mina doḵi a’di pa ka nyaŋ’ko’d mo e /e mo be. 38 Hili a’di thoḵki gwo mo ki: Ya/m pem midi mol ya ka luŋgu’b nyaḵki um mo haali/ akam a’di iwuki’d mo dhali a’di idiki’d jasi ’de/ mo. Waḵki/ tonthusa kamu/ midi ’taki biṯ a’di ap̱o/ e bway iim bum yan jin mura umi kar mo tani um mini raḵa wuum pem yan jin ’kayaa/ mmodiṯ bwa ntaga Haawiya mo be.