1 Dhali yan’ko’d a’di ḵanki wathi/ jin ta’da manhil tom piti gwo mo ki: ’Tu’dki ’kwani awolgwap̱im buni ki tonṯe/ ki nyanye/ mo me’d mii jin mina uni imish a’di ḵal mo dhali dhuka guurush buni e ’twamana wolgwap̱i/ gi ’kwani ka ’deṯe/ ’deṯe/ mo. 2 Dhali kari aḵubbaayam pem a’di jin ta’da ḵubbaayan ’dolkon kush mo e ’twamana wolgwap̱i/ a’di jin gwa’dagwa’d mo nyaḵka guurush pos piti mo. Dhali a’di miiki a’di mo me’d gwo jin ḵankin ma Yuusup̱ a’di mo be. 3 Me’d jin ḵalkina mo kush mon’thamo/ mo tani ’kwani uni idhukunu ’pen mo nyaḵki thuluny buni mo be. 4 Ki uni iikin mo ari is ’ko’d ari’ceenne/ mo ’peni ’peŋkuman bampa/ mo tani aYuusup̱ oki’da manhil tom piti gwo mo ki: Cuyi mis mo dhali ur ’kwani gwan isho’k mo dhali ki /e mini siri’c uni ap̱o/ ki sho’k mo tani oyi uni gwo mo ki: Atinta iraḵkina um tom ’boro’di bway mo mmowar ki to shigga/ mo? Atinta iḵwalkina uma ḵubbaayan ’dolkon kush pem mo? 5 A’di diki ta ji gi p̱ina tap̱am pem to mowa dhali gom mii yan mo tani a’di inyiṯẖa a’di to kun mini mii yilaŋkamu/ moyi? Um thamki mii mo mmomii wakan mo be.

6 Ki a’di siri’cki uni ap̱o/ ki sho’k mo tani a’di ṯorki’da ṯor ki uni ki gwo gwansan mo be. 7 Uni thoḵki a’di gwo mo ki: Atinta i/okina tap̱am bam gwo gi wakan mo? Gwo midi mii si’dasi’d ’peni aman kun tana c̱iŋkinam pini mo ki uni mini ’taki mii to gi wakan mo. 8 Hili mo mo ma, aguurush kun gamkina aman ’peni ’twamana wolgwap̱im bam uni ḵalkina aman /e ka nyaŋ’ko’d mo ’peni bampa/ Kanaan mo, dhali mii jin midi ’taki ta ata ’te/ imina aman ḵwal ’dolkon kush walla ’dolkon gana/ ’peni gu’b gi tap̱am pini mo? 9 Dhali e bwaman c̱iŋkinan ’de/ yin jin minu gam to nycine/ mo tani dhalki a’di iwu’d mo dhali aman si’da/ mina ta c̱iŋkina/ jin yolu gom tap̱am bam mo. 10 A’di thoḵki uni gwo mo ki: Dhalki a’di miinu mo me’d gwo jin okina um mo ki: Ki a’di yin jin minu gam to nycine/ mo tani a’di imidi ta c̱iŋkina/ jin yolu pem mo dhali um kun boc̱kin mo tani mini ta ’kwani kun mini dar gi mii i’ba/ mo be. 11 Dhali yan’ko’d aris ’kwani thulkina wolgwap̱im buni ka ’cesh ki jahanne/ mo dhali aris ’kwani uni ḵa’dkina wolgwap̱im buni ’twa/ mo be. 12 Dhali a’di ŋap̱ki to mo mmoṯel ’pen ’peni a’di jin ca’d mo dhali daḵ ’kup̱ ki a’di jin gwa’da’d mo dhali aḵubbaaya a’di gamkunu e ’twaman ma wolgwap̱i/ ma Benyamiin mo be. 13 Dhali yan’ko’d uni dherki burrinyem buni bwa mo dhali aris ’kwani deḵki thuluny buni to ap̱o/ ka nyaŋ’ko’d mo mmodoḵ bway ’peŋkuman bampa/ mo.

14 Ka Yahuuda dhali ikam p̱u’dkin e gu’b ma Yuusup̱ mo a’di di’d naskina/ imun mo dhali uni ṯa’kkina ibwambori a’di a’cesh mo be. 15 Yuusup̱ oki uni gwo mo ki: Mii gi wakatinta imiikina um mii gi wakan mo? ’Kona um ki misha wathi/ me’d aha/ mo mina nyiṯẖ to kun mini mii yilaŋkamu/ mowa? 16 Dhala Yahuuda thoḵki gwo mo ki: Atinta a’di i mina amani o e tap̱am bam mo? Dhali aman mina o katinta mo? Walla am mina dhu is bam athiṯẖin thiṯẖ kata mo? Arumgimis a’di gamki mii jin thamu ap̱o/ c̱iŋkinam pini mo. Hili mo mo ma, aman takina c̱iŋkina/ tap̱a kun yolu mo amani ’baari monṯal ’de/ dhali a’di si’da/ jin gamkunuwa ḵubbaaya e me’d piti mo. 17 Hili a’di si’da/ oki gwo mo ki: Mii yan midi si’dasi’d ’peni aha/ mo ki aha/ mina diki ’taki mii wakan mo. Hili jasi e me’d jin minu gama ḵubbaaya mo tani a’di imidi ta c̱iŋkinam pem jin yolka/ mo hili gom um mo tani iiku/ ki moŋḵu’th is eya babam bum mo.

18 Dhali yan’ko’da Yahuuda yaki’di a’di mo dhali o a’di gwo mo ki: Ayy tap̱am pem. Dhalki c̱iŋkinam pini mo, aha/ ’thona /e mo, ṯora ṯor ki tap̱am pem e bwany’cem piti mo dhali dhalka nyor pini ki pur ki o’d ap̱o/ aman kun tana c̱iŋkinam pini mo haali/ /e wana e ka P̱irawn ki is pini mo. 19 Tap̱am pem doṯki c̱iŋkinam piti gwo mo dhali oki: A/um tan ga babam bum mo dhali akam buma? 20 Dhali aman okina gwo e tap̱am bam mo ki: Aman tana ka baba wathin dhan mo dhali ara kam bam jin gwa’dagwa’d mo jin ta’da ’cim piti ka dhan piti mo dhali akam piti a’di iwuki’d mo dhali a’di idhalkunu a’di ’de/ ’pena ’ciŋ kum mo dhali ababam piti enki a’di kagahara mo. 21 Dhali yan’ko’d /e oki c̱iŋkinam pini gwo ki susu/ a’di ka luŋgu’b i /e mo ki aha/ mina ’thos a’di em pema is mo. 22 Aman okina gwo yan e tap̱am bam mo ki: Ari dhuru’c wathi/ midi mol dhal com ’pen mo haali/ waḵki/ a’di midi dhal com ’pen mo tani ababam piti a’di imidi wu mo. 23 Dhali yan’ko’d /e ki o c̱iŋkinam pini gwo mo ki isi ciki/ waḵka kam buma gwa’dga/ diki yayu/ ka luŋgu’b nyaḵki um mo tani um mini ’koki mish jis/em pem p̱ar e doḵ/e mo. 24 Ki aman doḵkina e pa gi c̱iŋkinam pini jin ta’da babam pem mo dhali ṯor gwon tap̱am pem mo, 25 dhali ka babam bam oki aman gwo mo ki: Iiku/ doḵ/e mo dhali yolu/ ari tonṯe/ mo tani, 26 aman thoḵkina a’di gwo mo ki: Aman mola ii ka luŋgu’b mo. Waḵki/ ara kam bam jin gwa’da’d midi nyaḵ ya ki aman mo tani aman mina ii ka luŋgu’b mo. Haali/ aman mola p̱ar wathi/ jis/em piti e mo isi ciki/ ara kam bam jin gwa’da’d midi mii nyaḵ di ki aman mo. 27 Dhali yan’ko’d c̱iŋkinam pini jin ta’da babam pem ki o aman gwo mo ki: Um mishin ka ’bom pem dho’thki aha/ iya/i su/ mo. 28 Jaŋ kamu/ thiska/ e mo dhali aha/ okina gwo ki: A’di ka jiŋ gana/ dherkina toŋgwap̱i/ bwa ka gwap̱i/ ki ruṯ ruṯ mo dhali aha/ dinaki mish a’di ’pena cim yin ki sule/ sule/ mo. 29 Waḵki/ um mini sus jin ṯal ’de/ yan si’da/ ’peni aha/ mo tani dhali tonthus ki biṯa p̱o/ a’di mo tani um mini raḵa awuuŋ kush pem yan isi bwan diṯi’d mo dhali ya mo eya Haawiya mo. 30 Dhali gom gwo gi wakan mo tani ki aha/ yakina e c̱iŋkinam pini jin ta’da babam pem mo dhali ari dhuru’c wathi/ diki nyaḵ yayu/ ki aman mo haali/ mondiki/em piti a’di deḵkunu mo nyaḵki ji gi ari dhuru’c wathi/ mo. 31 Ki a’di p̱arki mo e ki ari dhuru’c wathi/ diki nyaḵ di ki aman mo tani a’di midi iwu mo be dhali c̱iŋkinam pini mini raḵa awuuŋ kush piti isi bwan diṯi’d mo dhali a’di midi ya ka luŋgu’b eya Haawiya ki bwan diṯi’d mo a’di jin ta c̱iŋkinam pini jin ta’da babam bam mo. 32 Haali/ c̱iŋkinam pini a’di warki’d ka manmish mo ki isi mish gana/ gom ari dhuru’c wathi/ goma babam pem mo mmo/o gwo mo ki: Waḵki/ aha/ dinaki susi a’di pa i /e mo tani dhalki aha/ a’di iḵala mo jin diluwa dil mo e jis/e ma babam pem ki mondiki/em pemi ’baar mo. 33 Dhali gom gwo gi wakan mo tani dhalki c̱iŋkinam pini mo, aha/ ’thona /e mo, mmoc̱a’bku/ mo e embul ma ari dhuru’c wathi/ mo mmota c̱iŋkina/ gi tap̱am pem jin yolu mo. Dhali dhalki ari dhuru’c wathi/ doḵ bway pa nyaḵki ikam piti mo. 34 Haali/ aha/ mola doḵ bway pa ababam pem mo waḵki/ ari dhuru’c wathi/ diki nyaḵ ya ki aha/ mo haali/ aha/ ḵo/kina is mo mmop̱ar tonthus gi wakan e mo mmop̱u’da p̱o/ ababam pem mo be.