1 Wakana Yuusup̱ yaki bway gu’b mo dhali ṯorka P̱irawn gwo mo ki: Ababam pem dhali ikam pem nyaḵka ma’diny ḵa’bal buni dhala dhana ŋul’kup̱ bip̱ dhali aris to kun tagina uni mo tani uni ip̱u’dkin mo ’peni Paŋ Kanaan mo dhali uni shwane/ ’kokin e Pan Jaasaan mo. 2 Dhali ’peni bwaman ikam piti mo tani a’di bu’thki ’kwani imudhe’d mo dhali ṯorki uniya P̱irawn i e mo. 3 P̱irawn oki ikam piti gwo mo ki: Miin tom bum ta’da tinta mo? Dhali uni thoḵkina P̱irawn gwo mo ki: C̱iŋkinam pini uni ita imanhil ḵa’bal mo me’d ibabam bam mo. 4 Uni okina P̱irawn gwo mo ki: Aman p̱u’dkina mo mmo’ko ki ’ko ma c̱a/ e mony’cesh yan mo haali/ ashon dhii/i’da kamu/ yisa di’d imun kun mina c̱iŋkinam pini ic̱iya ma’diny ḵa’bal mo haali/ ṯe/ si’da/ a’di ishilki ’kwani is mo e Paŋ Kanaan mo. Dhali shwane/, aman ’thona /e mo, ki /e mini dhal c̱iŋkinam pini bway mo mmo’ko e Pan Jaasaan mo. 5 Dhali yan’ko’da P̱irawn ki owa Yuusup̱ gwo mo ki: Ababam pini dhali ikam pini uni p̱u’dkini /e itan mo be. 6 Bampa/ Masir uni ’koni bwambori /e m’baar mo. Thumi ababam pini dhali ikan moŋ’ko mo e mony’cesha ’borga/ mo dhali dhalki uni ’kon mo e Pan Jaasaan mo. Dhali waḵki/ /e mishi wathi/ jin ’bora she/ ’peni bwaman uni mo tani dhuyi uni mmota imanhil to/em pem mo.

7 Dhali yan’ko’da Yuusup̱ ki susa Yakuub jin ta’da babam piti mo dhali kar a’di ibwambor ma P̱irawn mo dhala Yakuub ’borki’da P̱irawn mii mo be. 8 Dhala P̱irawn oki’da Yakuub gwo mo ki: Atee gi yil gi mondiki/em pini uni ’kokin ekata mo? 9 Dhala Yakuub thoḵki’da P̱irawn gwo mo ki: Atee gi yila c̱a/ pem mo tani uni ’koni iss ’kwanimpa ipe’de/ i’ce’dka ’kume’da p̱o/ mo. Dhala tee gi yil gi mondiki/em pem mo tani uni tana hony/e mo dhali kun p̱u’da tonthus ap̱o/ aha/ mo dhali uni yisa i’thona/ ’tho/ ki me’d goma tee gi yil gi moŋ’koki/e gi ibabam pem ka atee kun iikina uni iinyc̱a/ mo. 10 Dhala Yakuub ’borki’da P̱irawn mii mo dhali ya ka pije/ ’peni buŋ’kus ma P̱irawn mo be. 11 Dhali yan’ko’da Yuusup̱ thumki’da babam piti dhali ikam moŋ’ko mo dhali c̱iki uni mo mmota jim buni e bampa/ Masir mo e mony’cesh jin ’bora’bor mo e bampa/ Ra/amsiis mo me’d gwo jin ḵankin ma P̱irawn mo be. 12 Dhala Yuusup̱ thip̱ki’da babam piti mo dhali ikam piti mo dhali aris ’kwani ’baar mo kun ta kuŋ gu’b gi com mo ki tonṯe/ mo isi ki mii jin mina uni mii ta gi a’di mo be.

13 Dhali tonṯe/ p̱iyi’d eya ris bampa/ ’baar mo haali/ ṯe/ a’di ishilki ’kwani is mo wakan bampa/ Masir dhali bampa/ Kanaan uni shi/ki is mo gom gwon ṯe/ mo be. 14 Dhala Yuusup̱ tulki’da risa guurush is mo uni kun gamkunu mo e bampa/ Masir dhali ’peni Paŋ Kanaan gom pos jin yolkina ’kwani mo. Dhala Yuusup̱ ḵalki’da guurush e gu’b ma P̱irawn mo. 15 Dhali ka guurush ’baarki’d mo e bampa/ Masir mo dhali e bampa/ Kanaan mo tani aris ’Kwani Masir uni p̱u’dkina Yuusup̱ mo dhali o a’di gwo mo ki: C̱iyi aman tonṯe/ mo ma. To jin ta’da tinta imina amani wu mo ibwambori jis/em pini kan mo? Haali/ aguurush bam a’di ’baarki’d mo be. 16 Dhala Yuusup̱ thoḵki uni gwo mo ki: C̱iyaa/ to/em bum mo dhali aha/ mina c̱i um tonṯe/ mo mmowan a’di e ki to/em bum mo waḵka guurush bum ’baarki’d mo. 17 Wakan uni ḵalki to/em buni aYuusup̱ mo dhala Yuusup̱ c̱iki uni tonṯe/ mo mmowan a’di e ki to/em buni kun tana ris, shumarum mo dhali ama’diny ḵa’bal mo dhala ŋul’kup̱ bip̱ dhali aris kuman thuluny mo dhali a’di thip̱ki uni ki tonṯe/ mo mmowan a’di e ki to/em buni kun tana uni ki yil c̱aan mo. 18 Dhali ki yil c̱aan ’baarki’d mo tani uni p̱u’dkini a’di ki yil jiŋ ’ko’d mo dhali o a’di gwo mo ki: Aman yisa mina ba’k gwo ’peni tap̱am bam ka guurush bam i’baarki’d mo dhali arisa ŋul’kup̱ to/e uni ta to gi tap̱am bam mo, toŋ kamu/ yisa boc̱ki’da e jis/e gi tap̱am bam mo hili jasi buŋgwar is bam dhali mony’cesh bam mo be. 19 To jin ta’da tinta i mina amani wu e bwambori jis/em pini mo, aman dhali mony’cesh bam mo? Yoli aman mo dhali mony’cesh bam ki tonṯe/ mo dhali aman nyaḵki mony’cesh bam imina ta c̱iŋkina/ ma P̱irawn kun yolu mo, dhali c̱iyi aman emena ḵa’bany to mo ki aman mina ’ko ki e mo dhali ’koki wu mo dhali mony’cesh si’da/ midi diki ta bwam ma’du/ mo.

20 Wakana Yuusup̱ yolki bampa/ Masiri ’baar mo goma P̱irawn mo haala ris ’Kwani Masir yolkina ris buntom buni mo haali/ ṯe/ a’di ishilki’da shil ki she/ ap̱o/ uni ki ’bi’th mo. Dhali mony’ceshi ’baar mo tani uni ta kuma P̱irawn gana/ mo be. 21 Dhali gom ’kwani mo tani a’di dhuki uni mmota c̱iŋkina/ kun yolu mo ’peni yoḵkam Pa Masir itor karash ntagi ’bana kamu/ mo. 22 Jasi mony’cesh ’kwani kun ta igasiis mo tani a’di dina a’di ki yol mo haali/ igasiis uni ita gi to kun ḵalkina uni ki me’d ’pena P̱irawn mo dhali ’ko ki e mo ’peni to gwansan kun ḵalkina uni ki me’d mo kun c̱ikin ma P̱irawn uni mo. Gom gwo gi wakan mo tani uni ’koki yol mony’cesh buni mo be. 23 Dhali yan’ko’da Yuusup̱ oki ’kwani gwo mo ki: Hili mo mo ma, aha/ ’pena tee yansan mo tani aha/ yolkina um mo dhali mony’cesh bum goma P̱irawn mo. Shwane/ emena ḵa’bany annihe/ gom um mo dhali um mini si uni e mony’cesh mo. 24 Dhali e bwam mondhe’d mo tani um mini c̱ika P̱irawn ’ban ’de/ ’peni uni kun ’kon ma p̱o/i mudhe’d mo dhali ’ban kun ’kon ma p̱o/i doŋon mo ’peni ap̱o/ ma kamu/ mudhe’d mo tani uni imini ta jim bum mo jin midi ta emena ḵa’bany to gom bunto mo dhali me’d tonṯe/ gom is bum mo dhali goma ris kuŋ gu’b bum mo dhali gom tonṯe/ gom ushi uc̱im bum mo. 25 Dhali uni oki a’di gwo mo ki: /E taki mondiki/em bam is is ki me’d mo. Dhalki gwo yan ’bor tap̱am bam bwa mo ki aman mina ta c̱iŋkina/ ma P̱irawn kun yolu mo. 26 Wakana Yuusup̱ a’di karki a’di mmota gwoŋḵan jin bahu mo isi gom gwo gi bampa/ Masir mo dhali a’di ’dishki’d ’pena cim c̱aan ntagi shwanesan mo ka P̱irawn midi bu’th ’ban ’de/ ’peni uni to kun ’kon ma p̱o/i mudhe’d mo. Mony’cesh gi igasiis uni ’cena ’koki ta ku ma P̱irawn mo be.

27 Wakana Israyiil a’di ic̱a’bki’d mo e Pa Masir mo e mony’cesh gi Pan Jaasaan mo dhali uni gamki miiya du is e a’di mo, dhali dho’thki maman mo dhali mara/ amar is ki nyanye/ mo. 28 Dhala Yakuub c̱a’bki’d e bampa/ Masir ki yili ’kume’d i’ce’dka pesu/ ap̱o/ mo. A’di ita’da tee ma Yakuub gi wakan mo dhali yil gi mondiki/em piti ’koni iss ’kwanimpa ipesu/ i’ce’dka pesu/ ap̱o/ mo.

29 Dhali ki mo ’dishkina ’twa/ mo ka Israyiil midi mii wu mo tani a’di yuḵki ya/m piti ka Yuusup̱ mo dhali o a’di gwo mo ki: Waḵki/ aha/ shwane/ mina gam mii ma ’the ’peni jis/em pini mo tani kari me’d pini awum pem mo dhali oyi gwo is mo mmota ga dum paŋ gana/ dhali tayi wathiŋ gana/ gom aha/ mo. Dhalku/ /e ki kanaa/ e bampa/ Masir mo. 30 Dhalki aha/ yana ish nyaḵki ibabam pem mo. Ḵali aha/ ka pije/ ’peni bampa/ Masir mo dhali kani aha/ e mom buni jin kana uniya kan mo. A’di thoḵki gwo mo ki: Aha/ mina mii a’di me’d jin okina /e mo. 31 Dhali a’di oki gwo mo ki: Thuli /e gwo me’da p̱o/ gom aha/ mo. Dhali a’di ithulki gwo me’da p̱o/ gom a’di mo. Dhala Israyiil a’di c̱a’bki’d ki goŋgo/ ki is piti mo ap̱o/ ’kup̱a cim piti mo be.