1 Dhali ’ko’da cim ma pesu/ mo tani ki mo ḵali kush mo ka cim jin ṯwa/a/ ka dhas mo tani aMariyam Magdaliyya dhala Mariyama kamu/ uni iikin mo mmop̱ar moŋ’kup̱aje e mo be. 2 Dhali hili mo mo ma, adhan mony’cesh yiḵinki is mo kagahara haala man’doyu gwo gi tap̱a thulki’d mo ’peni momis mo dhali p̱u’du/ mo dhali ḵa’c wosh ka nyaŋ’ko’d mo dhali a’di ki c̱a’ba po/ a’di mo be. 3 Jamas piti jin piyina a’di mo tani a’di wana e ka wara sho’k mo dhali burrinyem piti c̱a’bki bany bany mo me’da wasaŋ gana/ mo be. 4 Dhali gom is jin ḵogu a’di mo tani imanji mo mo uni deekina is mo dhali uni wakina e gi ’kwani kun wukin mo be. 5 Hila man’doyu gwo ki o up̱ gwo mo ki: Dhalku/ is ki ḵo/ mo ma, haali/ aha/ misha ki um ŋap̱kina Yesus jin ’koshkunu jwa mo ki cwany’ciṯẖan dhul mo be. 6 A’di yisa di’di mahana, haali/ a’di cuki mis mo me’d gwo jin ona a’di mo. Iiyu/ mo ma, mmop̱ar mo e mo jin ishkina a’di nycine/ mo. 7 Dhali yan’ko’d iiyi ki jahanne/ mo dhali ṯor imanciḵ a’di gwo gwo mo ki a’di cuki mis mo ’peni mowu mo. Dhali hili mo mo ma, a’di midi ya nṯwa/a/ ki um mo e Pany Jaliil mo be. Dhali e mun mo tani um mini gam a’di mo. Hili aha/ ṯorkina um gwo mo be. 8 Wakan uni iikin ki jahanne/ mo ’peni mony jis jwa mo ki moŋḵo/ is mo dhali ka dhan bwaŋ ’kunyga/ mo, dhali uni sokin mo mmoṯor imanciḵ a’di gwo gwo mo be. 9 Dhali hili mo mo ma, aYesus gamki uni ’kup̱ mo dhali o gwo mo ki: Hayy. Dhali uni p̱u’dkin mo dhali bu’th a’di i sho’k piti mo dhali luŋ a’di mo be. 10 Dhali yan’ko’d Yesus ki o uni gwo mo ki: Dhalku/ is ki ḵo/ mo ma. Iiku/ mo ma, dhali ṯor iwaḵ pem gwo mo mmo/ii mo e Pany Jaliil mo dhali uni mini p̱ar aha/ e i mun mo be.

11 Ki uni ’kokin mo mmo/ii mo tani hili mo mo ma, kun tiya ’peni uni gun ta imanji mo mo tani uni iikin mo e ’peŋkuman bampa/ mo dhali ṯor igasiis kun can gwo mo goma ris to gwansan kun bu’thki embul mo mo be. 12 Dhali ki uni tulki is mo mmonṯal ’de/ mo nyaḵki ’kwaniŋ gwanyjaḵa/ mo dhali gam ’twa/ ’kup̱ mo tani uni ki c̱iya dhana guurush ki i/askar mo be 13 mmo/o gwo mo ki: Ṯori ’kwani gwo mo ki: Imanciḵ a’di gwo p̱u’dkin mo mon’thiny mo dhali ḵwal a’di mo ki aman ’kokina mmo/ish e mo be. 14 Dhali waḵki/ gwo yansan midi p̱u’du/ mo e bwany’ce ma mudhiir mo tani aman mina lal a’di sho’k ki gwo mo dhali buḵ um ’ba/ mo ’peni monṯo’c bwa mo be. 15 Wakan uni bu’thkina guurush mo dhali mii a’di me’d jin ḵankunu uni gwo mo. Dhali gwo lolop̱ yansan a’di ḵalu ki lala’th mo e bwaŋ ’Kwani Yahuuda/ ’baar mo ntaga tee yansan mo be.

16 Dhali imanciḵ a’di gwo kun ’koni ’kume’d i’ce’dka ’de/ mo tani uni iikin mo e Pany Jaliil mo e ’kuwosh jin ḵankin ma Yesus uni gwo mo. 17 Dhali ki uni p̱arki a’di e mo tani uni luŋki a’di mo. Hili kun tiya ’koni modhaŋ gwo mo be. 18 Dhala Yesus p̱u’dki’d mo dhali o uni gwo mo ki: Aris moshirri ’baar mo e momis mo dhali apo/ mony’cesh mo tani uni c̱ikunu aha/ mo be. 19 Wakan iiku/ mo ma, dhali waraa ris kal gi ’kwaniny’cesh ki imanciḵ aha/ gwo mo. Miiki uni ki yi’de/ ki gway ma Ababa mo dhali ki gway gi Ya/ mo dhali ki gway gi Shi/in Dheleladhelel mo be. 20 Ṯori uni gwo mo ma, mmodhu aris gwo gwansan uni gun ḵankika/ um mo, dhali hili mo mo ma, aha/ mina nyaḵ di e um isa yempa/ mo ntagi yil gi mony’cesh yan midi di ’kup̱ mo be.