1 Dhali ki a’di doḵki’d ka nyaŋ’ko’d mo ’peni Paŋ Kap̱ranahuum ’ko’da cim ka hony/e mo tani gwo ṯoru mo ki a’di di’di pa mo be. 2 Dhali ’kwani ka ris tulki is mo mmonṯal ’de/ mo. Wakan, mo p̱iyi’d gom uni mo. Moŋkamu/ yisa di’da shan’tamo/ si’da/ mo. Dhali a’di di’d mo mmoc̱i uni gwo mo be. 3 Dhali uni p̱u’dkin mo dhali ḵali wathi/ jin muṯṯa/ is mo e a’di mo, jin ḵalkina ’kwaniŋ gwasi doŋon mo be. 4 Dhali ki uni mol a’di ’dish is mo goma waambuhany ’kwani mo tani uni ḵa’cki ’kuŋgu’b mo ’peni ’kup̱i a’di mo. Dhali ki uni tup̱ki mo i e mo tani uni ki dhala ci me’d ki wathi/ i e jin muṯṯa/ is mo be. 5 Dhali ka Yesus p̱arki moŋgam gwo is buni e mo tani a’di ki o wathi/ jin muṯṯa/ is gwo mo ki: Ya/m pem, miinthus pini gwamkunu /e mo be. 6 Dhali iman’kwar ton tiya, uni ’kokin mo mmodoṯ gwo mo eya dum buni mo ki: 7 Katinta sa/ i/ona wathi/ yansan gwo gi wakan mo? A’di walki gwo sor mo. Kaja a’di midi mish gwam ’kwani gom miinthus mo, hili jasa Arumgimis a’di ’de/ mo be. 8 Dhali ki jahanne/ Yesus nyiṯẖki’d e is piti ki uni tan gi gwondoṯ wakan e is buni mo dhali a’di ki o uni gwo mo ki: Atinta doṯkina um gwondoṯ eya dum bum kan mo? 9 Ki ji gi ’ka’da mii mane ti, mmo/o wathi/ jin muṯṯa/ is gwo mo ki: Miinthus pini gwamkunu /e mowa? walla mmo/o gwo mo ki: Cuyi mis mo dhali ’deka cim pini mo dhali yayi mo? 10 Hili ki um mini mish ki Ya/ gi ’Kwani ta gi moshirr mo e mony’cesh yan mo mmogwam miinthus gi ’kwani mo, a’di ki o wathi/ jin muṯṯa/ is gwo mo ki: 11 Aha/ ona /e gwo mo ki: Cuyi mis mo dhali ḵala cim pini mo dhali yayi bway pa mo. 12 Dhali a’di cuki mis mo dhali ki jahanne/ a’di ki ḵala cim piti mo dhali ya ka pije/ mbwambori uni ’baar mo. Wakan aris uni ’baar mo merkin mo dhali karkina Arumgimis ki ca mo mmo/o gwo mo ki: Ana ’konaki p̱ar ji gi wakan e me’d ’de/ ki sule/ mo be.

13 A’di yayi’d ka pije/ mo doḵ/e e shemen ma gap̱ ma al mo, dhala dhana buhany wathimpa tulki is i a’di mo, dhali a’di ṯorki uni gwo mo be. 14 Dhali ki a’di yaki’d ki yampe mo mbway mo tani a’di p̱arki’da Lawi e mo a’di jin ta ya/ ma Halp̱a mo mmodikina a’di mo e mo jin teruwa thulp̱a/ mo, dhali a’di ki o a’di gwo mo ki: Baṯẖi aha/ nsho’k mo ma. Dhali a’di cuki mis mo dhali baṯẖ a’di nsho’k mo be.

15 Dhali ki a’di c̱a’bki’da tharabeesa e gu’b piti mo tani imantera thulp̱a/ ka ris dhali imanmii miinthus ’kokin nyaḵḵa Yesus mo dhali imanciḵ a’di gwo mo, haali/ ’kwani tana ris ka ris kun baṯẖki a’di nsho’k mo be. 16 Dhali iman’kwar to dhali ’Kwani P̱arisiyiin ki uni p̱arki a’di e ki a’di shwaki to nyaḵki uni gun ta imanmii miinthus mo dhali imantera thulp̱a/ mo tani uni ki doṯ imanciḵ a’di gwo gwo mo ki: Atinta ishwana a’di to nyaḵki imantera thulp̱a/ mo dhali nyaḵki uni gun ta imanmii miinthus kanni? 17 Dhali ka Yesus ciḵki a’di yan mo tani a’di ki o uni gwo mo ki: ’Kwani gwansan kun ’kon ki ’bore/ mo tani uni mini ’koki mii ta ga hakiim mo, hili uni gwansan kun ’ba’thkin mo be. Aha/ p̱u’dkina mo yisa mmoyuḵ ’kwani kun mii miiŋḵar/e hili gom imanmii miinthus mo be.

18 Dhali imanciḵa Yohaan gwo dhali ’Kwani P̱arisiyiin uni ga/ki to mo dhali ’kwani p̱u’dkini a’di mo dhali o a’di gwo mo ki: Katinta si’da/ imiina imanciḵa Yohaan gwo mii mo dhali ’Kwani P̱arisiyiin mmoga/ to mo, hili imanciḵ /e gwo uni ’koki ga/ to mo be. 19 Dhala Yesus ki thoḵ uni gwo mo ki: Mina ’kwani yilkina/ gwansan, uni kun yuḵu mo e momiimash mo mish to ga/ mo ki wathinyaŋa’b diki’d nyaḵki uni naskina/ mo ’taa? Me’d jin dikina wathinyaŋa’b e bwam uni mo tani uni moli to ga/ mo be. 20 Atee midi p̱u’du/ mo ki wathinyaŋa’b minu susu/ ’peni uni mo tani dhali yan’ko’d uni ki ga/ to ka tee c̱aan mo be. 21 Wathiŋ kamu/ yisa di’da jin sho burrinyen this ap̱o/ sharkin burrinyen dhamo/ mo. Waḵki/ a’di midi mii kan mo tani mo jin ’dap̱u midi dher bwa ’peni a’di jin ta jin this mo ’peni jin dhamo/ mo, dhali mondhere’d midi war ki shi/ mo. 22 Dhali wathiŋ kamu/ yisa di’da jin midi kar yimana mura’th jin ta jin this mmowol a’di e ḵucaŋ jin wolu yimana muratha dhamo/ mo. Waḵki/ a’di midi mii kan mo tani yimana mura’th midi ’twaḵ ḵucaŋ mo dhali yimana mura’th midi gac̱a sho mo. Dhali wakan ḵucaŋ minu dher bwa mo, hili yimana mura’th this minu mii wol mo e ḵucaŋ this jin daḵa ḵucuru/ mo be.

23 Ka cim ma pesuŋ kamu/ tani a’di yaki’d ki tur mo e bwam bunto mo. Dhali ki uni ṯanki bway buni mo tani imanciḵ a’di gwo ṯelki mii ’pen mo mmo’ce’d pos mo be. 24 Dhali ’Kwani P̱arisiyiin o a’di gwo mo ki: Hili ma, atinta imiina uni to jin dina gwoŋḵan ma cim ma pesu/ ki dhal bway mo? 25 Dhali a’di ki thoḵ uni gwo mo ki: ’Kona um ki deŋ gwo e mo gom mii ma Dawuu’d mo ’taa? ki a’di midi mii ta gi to mo dhali ki a’di ’kosha ṯe/ mo tani a’di dhali uni gwansan kun nyaḵki ’ko ki a’di mo. 26 A’di cic̱ki gu’b ma Arumgimis mo ka Abi/aṯẖaar di’d jin ta’da gasiis jin ca’d mo, dhali shwa tonṯe/ jin di’di buŋ’kus ma Arumgimis mo, a’di jin dina gwoŋḵan ki dhal bway mo gom ’kwanin tiya mo, hili jasi gom igasiis uni ’cena mmoshwa mo be. Dhali a’di si’da/ ki c̱iki uni gwansan kun nyaḵki ’ko ki a’di mo be. 27 Dhali a’di ki o uni gwo mo ki: Acim ma pesu/ karkunu mo gom wathi/ mo, yisa wathi/ goma cim ma pesu/ mo. 28 Wakan Ya/ gi ’Kwani si’da/ a’di ta tap̱a goma cim ma pesu/ mo be.