1 Dhali uni p̱u’dkin ki ’ban ma gap̱ ma ala kamu/ mo e bampa/ gi Paŋ Gadara mo be. 2 Dhali ki a’di piki’d ka pije/ ’peni bwam ma ḵur mo tani a’di gamki ’kup̱ ki wathi/ jin piki’d mo ’peni moŋ’kup̱aje jin taki’d ga rum thus jin nyo/o’d mo be. 3 A’di jin c̱a’bki’d e moŋ’kup̱aje mo dhali wathin ’deŋ kamu/ yisa di’da jin mishki a’di deḵ ki sule/ mo isi ka jindhiir ilu/ mo. 4 Haali/ a’di deḵkunu me’d ka ris ka maḵḵiya mo dhala jindhiir mo, hila jindhiir bene’dkina a’di bwa mo dhali maḵḵiya si’da/ ’ce’dkina a’di ka ’ci’cimi’th mo. Dhali wathiŋ kamu/ yisa ta gi ’bitha mmo’te a’di mii ’twa/ mo. 5 Mon’thiny dhali montee a’di diki’d mo e moŋ’kup̱aje mo dhali e moŋ’kuwosh si’da/ mo a’di cuuki gwo ki ’twa/ jin caaca mo dhali ṯẖa’th is piti ki wosh mo be. 6 Dhali ki a’di p̱arki’da Yesus e mo ’pena dhana/ mo tani a’di guski’d mo dhali luŋ a’di mo be 7 dhali a’di cuu gwo ki dhan ’twa/ jin caaca mo mmo/o gwo mo ki: Ki /e mini miiya tinta ki aha/, Yesus, /e jin ta Ya/ gi a’di jin Cayaa/ e ki Ca jin ta’da Arumgimis mo? Aha/ ḵana /e gwo mo ka Arumgimis mo ki: Dhalku/ ki ’kosh aha/ is ka nyor mo. 8 Haali/ a’di ki o a’di gwo mo ki: Piyi ka pije/ ’peni wathi/ mo, /e jin tana rum thus jin nyo/o’d kan mo. 9 Dhala Yesus ki doṯ a’di gway mo mmo/o gwo mo ki: /E yuḵu gway kaja mo? A’di ki thoḵ gwo mo ki: Gway pem yuḵu Karis mo haali/ aman ’kona ka ris mo be. 10 Dhali a’di ki doṯ a’di gwo ka daran du mo mmohash uni ka pije/ ’peni bampa/ mo be. 11 Dhala dhana waambuhany ḵuthar uni shwakin mo e ’bambala wosh mo be. 12 Dhali uni doṯki a’di bway mo mmo/o gwo mo ki: Hashki aman mo e bwaŋ ḵuthar mo ma. Dhalki aman ciḵa e uni mo. 13 Wakan a’di ki dhal uni bway mo mmo/ii mo be. Dhala rum thus kun nyo/on p̱u’dkin ka pije/ mo dhali cic̱ mo e bwaŋ ḵuthar mo. Dhala dhana buhany ḵuthar deŋkunu e ka alaap̱i su/ mo, mmosokina uni ka luŋgu’b eya gap̱ yi’deŋ ’kulga/ mo e bwam yi’de/ mo dhali uni loskina yi’de/ mo be.

14 Dhali imanhil ḵuthar uni sokin mo dhali ṯor gwo e ’peŋkuman bampa/ mo dhali e pa ’baar mo. Dhali ’kwani p̱u’dkin mo mmop̱ar a’di e mo a’di jin miiki’d mo be. 15 Dhali uni p̱u’dkina Yesus mo dhali uni ki p̱ar wathi/ jin bu’thkin ma ruma ’cesh e mo mmoc̱a’b mo ki burrinye/ i is mo dhali ka dum piti jin ’boro’d mo be dhali wathi/ jin taki’d ga ruma ’cesh ka ris mo tani dhali uni ḵo/ki a’di mo be. 16 Dhali uni gwansan kun mishki a’di mo tani uni ṯorki gwo mo gom a’di jin miikunu mo gom wathi/ jin bu’th ma ruma ’cesh mo dhali gwo gom ḵuthar mo. 17 Dhali uni ṯelki mii ’pen mo mmoyuḵa Yesus mo mmoya mo ’peni mom buni mo be. 18 Dhali me’d jin jithirkina a’di mo e bwam ma ḵur mo tani wathi/ jin bu’thkin ma ruma ’cesh a’di doṯki a’di ’twa/ mo ki a’di midi ’taki nyaḵ di ki a’di mo be. 19 Hila Yesus ushki’d mo dhali o a’di gwo mo ki: Yaku/ bway pa mo e imugum pini mo ma dhali ṯor uni gwo gom to jin miikina Tap̱a gom /e mo dhali gom momiimii jin miikunu ap̱o/ /e mo be. 20 Dhali a’di yaki’d ka pije/ mo dhali ṯel mii ’pen mo mmoṯor gwo eya tente/ e Bampa/ gi Pan Deḵap̱olis mo gom dhan to jin miikin ma Yesus gom a’di mo, dhali aris ’kwani ’baar mo merkin mo be.

21 Dhali ka Yesus ’ciṯẖki’da gap̱ doḵ/e eya ḵur ki ’bana kamu/ mo tani awaambuhany ’kwani caaca tulki isi a’di mo. Dhali a’di diki’d e shemen ma gap̱ ma al mo. 22 Dhali yan’ko’d tap̱aŋ kamu/ gi gu’b gi montul is pu’dki’d mo, a’di jin yuḵkunu gway ka Yaa/irus mo. Dhali ki a’di p̱arki a’di e mo tani a’di biṯki’da ’ceshi sho’k piti mo be. 23 Dhali mmoŋap̱ a’di mo mmo/o gwo mo ki: Ari ’bwa/m pem a’di ’ba’thki’d mo mmomuri wu mo. Yayu/ mo ma dhali kar me’d pini ap̱owa yim mo. Wakan ka yim mina isi ’bor mo dhali di ki e mo be. 24 Dhali a’di yaki’d mo nyaḵki a’di mo.

Dhala dhana waambuhany ’kwani caaca baṯẖki a’di mo dhali uni ki ’kam a’di ki deḵ mo. 25 Dhali a’boma kamu/ diki’d si’da/ mo, a’di jin guskin ma bas ki yil ’kume’d i’ce’dka su/ mo be. 26 Dhali a’di ’koshkina is ka nyor kagahara mo gom mii jin yakina a’di i ihakiim ka ris mo. Dhali a’di ki ’baara ris to ’baar mo kun takina a’di mo be dhali isa kamu/ yisa ’borki’da, hili isa nyor ’curki ’pen ki shi/ mo kagahara mo be. 27 Dhali ayim ciḵki gwo kun okunu goma Yesus mo dhali a’di p̱u’dki’di ’ko’di a’di mo e bwaman ma waambuhany ’kwani mo dhali ta a’di burrinyem piti is ki me’d mo. 28 Haali/ ayim ki o gwo mo ki: Waḵki/ aha/ mina ’taki ta isi burrinyem piti is ki me’d mo tani aha/ mina isi ’bor mo be. 29 Dhali ki jahanne/ abas jin guski a’di daḵki’d mo, dhali ayim mishki’d ki is piti mo ka yim wac̱kunu mo ’peni ’ba’th jin ’koshki a’di mo be. 30 Dhala Yesus nyiṯẖki’d ki is piti ki mom’bi’th yaki’d ’peni a’di mo dhali ki jahanne/ a’di ki ṯuka bor mo e bwaman ma waambuhany ’kwani mo dhali o gwo mo ki: Kaja ta aha/ burrinye/ is ki me’d mo? 31 Dhali imanciḵ a’di gwo ki o a’di gwo mo ki: /E p̱arkina waambuhany ’kwani e yap̱kina yap̱ ki is mo mmo’kam /e mo dhali ata ona /e ki: Kaja ta aha/ is ki me’d mo? 32 Dhali a’di ki hil mo ki e mo mmop̱ar a’di jin miiki’d kan e mo be. 33 Hila ’bom a’di mishki a’di jin miikunu mo gom a’di mo. A’di p̱u’dki’d ki moŋḵo/ is mo dhali mondee is mo dhali a’di ki biṯa ’cesh ibwambori a’di mo dhali a’di ki ṯor a’di gwoŋ gana/ ’baar mo. 34 Dhali a’di ki owa yim gwo mo ki: ’Bwa/m pem, moŋgam gwo is pini a’di wac̱ki /e mo. Yaku/ mo ki moŋḵu’th is mo dhali wac̱i mo ’peni ’ba’th pini jin ’koshki /e mo.

35 Dhali ki a’di di’d mmoṯor gwo mo tani ’kwanin tiya p̱u’dkin mo ’peni gu’b gi tap̱a mo, uni gun o gwo mo ki: ’Bwa/m pini wuki’d mo. Atinta ṯu/ulkina /e amanṯor gwo ki gwo ki rash rash kan mo? 36 Hili a’di toŋki’d mo gom gwo jin okina uni mo. Dhala Yesus ki o tap̱a gi gu’b gi montul is gwo mo ki: Dhalku/ is ki ḵo/ mo ma. Hili gami jasi gwo is mo. 37 Dhali a’di diki dhal jan ṯal ’deŋ kamu/ bway mo mmobaṯẖ a’di mo, hili isi ciki/ jasa Buṯerus mo dhala Yakuub mo dhala Yohaan jin ta’da kam ma Yakuub mo be. 38 Ki uni p̱u’dkin mo e gu’b gi tap̱a gi gu’b gi montul is mo tani a’di p̱arki’da dulaṯṯ e mo jin miikunu mo dhali ’kwani mmoko mo dhali mmomiiya c̱inthar kagahara mo. 39 Dhali ki a’di cic̱ki gu’b mo tani a’di ki o uni gwo mo ki: Atinta miikina uma dulaṯṯ mo dhali ko mo kan? A’ci a’di yisa wu’d mowa, hili a’di ishki e mo be. 40 Dhali uni ki p̱e’th a’di mo. Hili a’di ki dhu uni ’peni ’baar ka pije/ mo dhali a’di ki sus jasi com ma ’ci mo dhali kum mo dhali uni gwansan kun nyaḵki ’ko ki a’di mo dhali ii bway bwaŋ gu’b e mo jin din ma ’ci mo. 41 Dhali a’di ki butha yim ki me’d mo dhali a’di ki owa yim gwo mo ki: Ṯaliṯẖa kumi, a’di jin ta ’pemen gwo jin onu ki: Ari nyara/, aha/ ona /e gwo mo ki: cuyi mis mo. 42 Dhali ki jahanne/ ari nyara/ cuki mis mo dhali ya ki sho’k mo. Haala yim ’kona yili ’kume’d i’ce’dka su/ mo. Dhali ki jahanne/ uni ’baar mo ’kokunu mo mmotash ki momer mo be. 43 Dhali a’di ki ḵan uni gwo ki ’bi’th mo ki wathiŋ kamu/ midi ’taki diki mish mii yan mo. Dhali a’di ki ṯor uni gwo mo mmoc̱i ka yim tonṯe/ mmoshwa mo be.