1 Ango-keme, ononga genu sene ulu-pulu-kiri se sembá kinia kanokole ono ⸤Pulu Yemonga⸥ Minimuni nilimú mele pilku liku molko kondolemele yombomane kanu yombomo ‘Konopu topele topa kelepa Pulu Yemo kinia manda molopili.’ ningu liku tapondongendo yu kondo kolko taka leko, liku tapondayo. Ono kepe yu-mele-mele ‘Na aku sipa kondi-ka sembá kinia i sekemo mele sembone naa sembone?’ ningu pilkuli kanu yombo ulu-kiri se sembamo iri naa toko taka leko liku tapondaa. 2 ‘Karasini ungu-mane sipa “Saa.” nirimu aku mele samili.’ ningu onone genalinga umbuna we wendo omba pemba uluma ono pea mendaa. 3 Yombo sene yu imbi ola naa molemo kinia ‘Na imbi ola molemo akumunga ⸤nanga genu naa lipu tapondombo⸥.’ konopu lemó yombomo yu yuyu kolo topale ‘yunga imbi sika ola molemo.’ nimba konopumuni pilielemo. 4 Aku sipa konopu lemba manda naa sembá kene yombomane yu-mele-mele konopu leko ulu selemelema manda manjiku apuruku ‘Nane imu sepo kondokoro molo imu sepo kinjikiruye?’ ningu ono onono yu-mele-mele piliangi. Yombo sene yuyu mindi kanopa pilipale sepa kondombamanga ‘Paa sekero.’ nimba manda kape nimba konopu simba. Akumu peanga. Yunga uluma kepe yombo lupamanga uluma kepe seluna sere lepa manda manjipa apurupa kanopale ‘Nanga peanga, ononga kiri.’ nimba apurumba akumu kiri. 5 Yomboma yu-mele-mele ulu selemelemonga umbuna wendo ombáma onono yu-mele-mele umbuna menge kene ⸤aku siku sangi⸥.

6 ⸤Karasinga⸥ unguma mane sili yombo senga ungumu pilku molemele yombomane kanu yombomo ‘Lipu tapondamili.’ ningu ononga méle peanga ⸤taltolemele⸥ma moke seko yu siengi.

7 ‘Nane ungu nimbu konopu lepo ulu sembóma Pulu Yemone naa kanomba.’ ningu pilku ononga onono konopumanga kolo toko naa piliayo. Yomboma Pulu Yemone naa pilipa naa kanomba senga manda lopi naa seko, Pulu Yemo manda kolo toko naa singí kanumu. Yombomane kalia-ingina méle-umbu mundulimilimanga mindi mélema tolemo inia toko yando limili aku mele, yombomane selemele mele yuni apurupa pilipale mare sepa kinjipa mare sepa peanga simba. 8 Méle kiri senga umbu kaliana panjilimolanje méle kiri se wendo olka inia toko limola mele aku sipa yombo sene yunga u-we-konopumuni pilipa konopu sipa selemo yombomo aku selemomonga kere-langi kiri purulimú mele aku sipa kanu yombomo yu mini pali molopa kinjimba. Yombo sene ⸤Pulu Yemonga⸥ Minimuni nilimú mele konopu sipa pilipa lipa selemo yombomo aku selemomonga kere-langi umbu peanga se mundulimú mele selemomonga Minimuni yu mini pali konde molopa kondopa mindi puli ulu-pulumu simba.

9 Yombomane kere-langi umbuma panjikuli, ‘Ombá.’ ningu siye naa kolko taka leko nokoko molemele mele olio aku sipu ulu peangama semolondo siye naa kolamili. Kere-langi umbu panjilimili kinia pe sika wendo omba kere-langi tolemo, liku nolemele mele olio ulu peangama semolondo tondolo mundupu sepo u we siye naa kolopo molomulu liemu pe Pulu Yemone pilimba walemo kinia sika yuni méle peangama simba limulú. 10 Akumunga, yomboma lipu tapondomolo aulka se mona lemba kinia kanopole ono pali lipu tapondamili. Aku-sipa na-kolo Karasi ‘Sika.’ ningu kuru mondolemele yomboma kumbi lepo lipu tapondamili.

11 Kiniá i pepámo nanu ya topo imbi paa awili-sepo tokoro mele kanayo.

12 Yemane tondolo munduku ‘Kangi se kopisaa.’ nilimili ye kanumane ‘⸤Juda yombomane⸥ olio kanoko peanga piliangi.’ ninguli aku selemele. Ono pipili kolkole ‘ ‘Karasini sika ⸤olionga nimba⸥ unju-perana ⸤kolondorumu⸥.’ nimbu kuru mondolemolo mele ⸤Juda yombomane pilkuli⸥ pilku kiri pilku olio seko kinjiku mindili naa siengi.’ ningu aku selemele. We naa selemele. 13 Kangi kopisilimili yemane kepe ⸤Mosisini⸥ ungu-mane sirimuma naa pilku liku selemele-na-kolo ‘⸤Juda yombomane⸥ olio semolo mele kanokole olio kape niengi.’ ninguli ono ⸤Karasinga Gallesia yomboma⸥ndo “Kangi se kopisangi.” nilimili.

14 ⸤Aku-sipa na-kolo⸥ nane ‘Nanga imbi ola molopili.’ molo ‘Yombo senga imbi ola molopili.’ molo ‘Ulu senga imbi ola molopili.’ nimbuli paa kape naa nimbú. Ye-Awili Yesusi Karasi olionga nimba kolondorumu unju-peramo mindi na konopu sipu kape nimbu imbi ambolopo paka tondombo. Mélse lupa paa mólo! Yu unju-perana kolondorumu akumuni na ye kololimu mele moliomonga ma-koleamanga ulumane na unguri manda naa selemo; ma-kolea uluma kepe unju-perana kolopa pora sirimu none selemomonga nane kanu uluma naa konopu mondopo moliola. 15 ⸤Juda yombomane⸥ kangi se kopisilimili molo ⸤yombo-lupamane⸥ kangi se naa kopisilimili akumu unguri mólo. ⸤Pulu Yemone⸥ ‘Olio yombo kondema molangi.’ nilimú aku ulumu mindi sika ungu se pelemo. ⸤Aku ulumu mindi Pulu Yemone kanopale yomboma kanopa imbi silimú.⸥ 16 Ya nikiru mele ‘Sika.’ ningu pilku liku selemele yomboma ono Pulu Yemonga ⸤sika⸥ Isirele yomboma molemele. Kanu yomboma konopu pe nipili molangi; Pulu Yemone ono kondo kolopa, u seko kinjeringi mele mundupa kelepa ‘Pundu tangi.’ naa nipili.

17 Ungu se kamu niembo: Na Yesusinga ⸤kongonomo andopo senderindumunga⸥ na toringi úruma nanga kangina pelemo kene yombo sene na sepa kinjipa umbuna se naa sipili.

18 Ango-keme, olionga Ye-Awili Yesusi Karasini ononga minima we kondo kolopa molopili molangi. Aku sipa sika sepili.

⸤Aku pea nikuru.⸥