1-2 Stiben ende waramari uma munon Sol eng wo gor uber qamarei. Ne munon qomon uberet igour eng Stiben mumun bis tumuni wogub borusi toubet eab igurei. Qen end qas munon Yisast oabig igour eng ginam aib Yerusalem igour eng wuriba sumungasiari qei iua Yudia Samaria wurinou ai end isumirei. Ne Yisas wonou imbigau yurau eng ger me qoau, gugum Yerusalem eng igurei. 3 Ne munon Sol eng wo der munon yurau Yisas toat igour eng wurinou munai gari-gari end isub wuriba sumungasi ne wuribaab uyort wuribig ende at igoai.

4 Ende aba ne munon Yisas qenunget igour eng der ginam-ginam iua Yisas qob wurinob qamb qib igurei. 5 Ende abari ne munon ger Pilip wo der ginam aib Samaria end isub ne Qenu Yisas init maribiga der inubersier eng wurinob qamb igoai. 6 Pilip ende wurinob qamb ne wurinou toar munon qei wurimusia ne munon yamangar gugum wot yar qob igub igurei. 7 Ende abari ne munon qei ai bigau igaramor eng wuriwegib qamb atag ab wogub iua qiyo goten amamir a goten iam nob qiyo toar wes-wes eng gagar wuriwaga uberetriamirei. 8 Ende at ginam Samaria eng borusi mismisir igurei.

9 Ginam aib end munon ger unum Saimon eng end igoai. Wo munon wuri dumi qiyo qomon wes-wes eng gar ebet igoai. Ende aba ne Samaria munon wot yari igurei. Wo igo ete qamb igoai: ‘ye gari aib” ende qamb igoai. 10 Saimon wo qomon eng aba ne munon baraitari qiyo munon ar qei der wo qob qamara borusi qenunget ne mingongir qamamir: “Wa, munon e Qenu gagam eng wot igama igo ebet igo,” ende qamamirei. 11 Qamb ne apand qamb wo qob qamara igub igurei. 12 Saimon eng ende aba ne munon misir ubura ne wuri song igamari ne Pilip diab Qenu Yisas inubersi qamb imuriamor eng qanam musub qamara igub wogub ne Pilip toat abari wo der wurimaragansi ya obotarerei. 13 Ende abari ne Saimon wo gor Pilip qob qamara igub aba ne wo gor yat maragansiarei. Ende aba wogub Saimon Pilip wogub mug me qoau, nob ten qib igoai. Nob qib ne Pilip qomon wes-wes aba gab borumisir igorei.

14 Ende abari ne Yisas wonou imbigau yurau Yerusalem umo igour eng Samaria munon Qenu qob igub uberet igour qamarari igub Pita Yon nob wuriimuriamirei. 15-17 Pita Yon nob isi weib yarab Samaria munon Yisast oabig igour eng ibagamirei. Ibag ne Qenu Igomurur qau der wurit isi qamb Qenu qebi qamamirei. Eng qoan Samaria munon qomon boru mogirt wagari Pilip Yisas unumt qas wurimaragansi ya obotarerei. Qen end Igomurur qau se me wurit isau. Ende gab ne Pita Yon nob is ubent wuribeari ne Igomurur qau der wurit isub nonogursiarei.

18-19 Munon Saimon eng wo Pita Yon nob is munon wuribeari Igomurur qau der wurinonogursia abari ibag ne wo nomon qur bis wurisab qamar: “An qer gagam eng oboumon eng ye bo yesari ye bo munon qei ye wuribine Igomurur qau wurit isa nonoguretorunor.”

20 Ende qamara Pita der taui qamar: “Qenu Igomurur qau ne nomon qurt taui baib quran? Ne ende ebet eng nomon qur nob mom umb isiban. 21 Ne gor ende ebet eng ne ininob me qirinenei Qenu nonou misir soageni eng qo gab imbigai. Ne qomon boru noopurima outet qib igoan. 22-23 Eng gab ne ne misir boru eng bo mogirt wab wogub ne Qenut misir gari big wot qamara ne neubersieriba.” 24 Ende qamarari Saimon wo der Pita Yon nob wurinob qamar: “An ombur yet Munon Aib nob qamarari mi eng quraumon eng yet wab ariraminer.”

25 Ende qamara ombur der nomon qur wonou bo utab wogub qamamir: “In mi e oboun eng Munon Aib Yisast baub ebet igoun.” Ende qamb wogub bo Yerusalem umo isub qamb isub munai ginam qamaaman Samaria qani-qani igo eng Qenu qob wurinob qamb isub igurei.

26 Ende isari wogub Munon Aib wonou enger der Pilip nob qamar: “Ne is Yerusalem wogub tap eng toat isi munai ginam Gasa end isi. (Ai tap eng qo wogomirei.) 27-28 Ende qamara ne Pilip girinet der isorei. Is qataben gar ego Itiopia munon ger isub igama is garei. Munon eng Itiopia wurinou yamangar baraitari Kandasi wonou sarau munon nomon qur qoat igour eng wurinou gigit igoai. Wo Yerusalem qite diab Qenu munai end isub wot simot eab wogub bo wonou munait isib qamb qart bugab igama wai aib ger ubumot isub igoai. Ende bugab isub igo ne Qenu wonou qob qoan Aisaia nob qamara gumater eng wanunger-wanunger isub igama garei. 29-30 Ende gea ne Qenu Igomurur qau Pilip nob qamar: “Ne qar isub igo eng qani isub ge.” Ende qamara Pilip qand munon eng qani isub igor eng wo qob qoan Aisaia gumater eng wanunger isub igama igub nob qamar: “Barai, qob eng wanungerman eng qanam bais imbigan qiyo?” 31 Ne munon eng nob qamar: “Munon ger qanam birisi me yiimbigour. Yonou ar wanunger qas gab qanam sir me iotoroum. Ne diab qanam bais yiimbiginen qiyo?”

32 Ne Pilip munon eng bugab igoar eng nob ir bugama ne munon eng Aisaia qob ete gumater eng wanunger isub igoai:

34 Munon eng qob eng ende wanunger wogub ne Pilip nob qamar: “Munon eng qob eng at qamar eng mai wonomit qamarei qiyo yourt qamarei?” 35 Ne Pilip taui nob qamar: “Qob e Yisast qamb gumaterei.” Ende qamb ne qanambig Yisas qob Aisaia gumater eng qanam musub nob qamara iga-iga isub igurei. 36 Isi yarab ya qubirt ger isub ne munon eng Pilip nob qamar: “Yag e doroun e, mai ya ba ye yemaragansieriban qiyo?” 37 Ende qamara Pilip nob qamar: “Git uber quran ego, nonou qas misir qerei igu. Ne mom Yisast oabig qamara gab eng nemaragansieribam.” Ne munon eng qamar: “Io, ye Yisast mom oabigoum, wo Qenu wonou wau ten.”

38 Ende qamb ne wai aib eng wurinob qamara qar ubumot isub igour eng nagari ne ombur ag der yag et is naget Pilip munon aib eng ya ubetet maragansiarei. 39 Ende at wogub ne ombur daan diab ne Qenu Igomurur qau Pilip aba umangerma me gab wogub wo mismisir wonou ginamt isorei. 40 Pilip bo qand munai ginam Asdot end weib isorei. Isub ne tumbigi tap eng toat isub munon ginam-ginam eng qob uber wurinob qamb is-isi ginam Sisaria end weib isorei.