1 Kimki terbiyini qedirlise, bilimnimu söygüchidur;

Lékin tenbihke nepretlen’gen nadan-hamaqettur.

2 Yaxshi niyetlik adem Perwerdigarning iltipatigha érisher;

Emma Perwerdigar hiyle-mikirlik ademning gunahini békiter.

3 Ademler yamanliq qilip amanliq tapalmas;

Lékin heqqaniylarning yiltizi tewrenmes.■

4 Peziletlik ayal érining tajidur;

Emma uni uyatqa salghuchi xotun uning ustixinini chiriter.■

5 Heqqaniy ademning oy-pikri durus höküm chiqirar;

Yamanlarning nesihetliri mekkarliqtur.□

6 Yamanlarning sözliri qan tökidighan qiltaqtur;

Lékin durusning sözi ademni qiltaqtin qutuldurar.■

7 Yamanlar aghdurulup, yoqilar;

Lékin heqqaniylarning öyi mezmut turar.□ ■

8 Adem öz zérikliki bilen maxtashqa sazawer bolar;

Egri niyetlik kishi közge ilinmas.

9 Péqir turup xizmetkari bar kishi,

Özini chong tutup ach yürgen kishidin yaxshidur.■

10 Heqqaniy adem öz ulighinimu asrar;

Emma rezil ademning bolsa hetta rehimdilliqimu zalimliqtur.■

11 Tiriship tériqchiliq qilghan déhqanning qorsiqi toq bolar;

Emma xam xiyallargha bérilgen kishining eqli yoqtur.■

12 Yaman adem yamanliq qiltiqini közlep olturar;

Emma heqqaniy ademning yiltizi méwe bérip turar.

13 Yaman adem öz aghzining gunahidin tutular;

Heqqaniy adem musheqqet-qiyinchiliqtin qutular.□ ■

14 Adem öz aghzining méwisidin qanaet tapar;

Öz qoli bilen qilghanliridin uninggha yandurular.■

15 Exmeq öz yolini toghra dep biler;

Emma dewetke qulaq salghan kishi aqilanidur.■

16 Exmeqning achchiqi kelse, tézla biliner;

Zérek kishi haqaretke sewr qilar, setchilikni ashkarilimas.□

17 Heqiqetni éytqan kishidin adalet biliner;

Yalghan guwahliq qilghuchidin aldamchiliq biliner.■

18 Bezlilerning yéniklik bilen éytqan gépi ademge sanjilghan qilichqa oxshar;

Biraq aqilanining tili derdke dermandur.■

19 Rastchil menggü turghuzulidu;

Lewzi yalghan bolsa birdemliktur.□

20 Yamanliqning koyida yürgüchining könglide hiyle saqlan’ghandur;

Amanliqni dewet qilghuchilar xushalliqqa chömer.

21 Heqqaniy ademning béshigha héch külpet chüshmes;

Qebihler balayi’qazagha chömüler.

22 Yalghan sözleydighanning lewliri Perwerdigargha yirginchliktur;

Lékin lewzide turghanlargha U apirin éytar.

23 Pemlik adem bilimini yoshurar;

Biraq exmeq nadanliqini jakarlar.■

24 Tirishchan qol hoquq tutar;

Hurun qol alwan’gha tutular.■

25 Köngülning ghem-endishisi kishini mükcheyter;

Lékin méhribane bir söz kishini rohlandurar.■

26 Heqqaniy kishi öz dosti bilen birge yol izder;

Biraq yamanlarning yoli özlirini adashturar.□

27 Hurun özi tutqan owni pishurup yéyelmes;

Biraq etiwarliq bayliqlar tirishchan’gha mensuptur.□

28 Heqqaniyliqning yolida hayat tépilar;

Shu yolda ölüm körünmestur.

■12:3 Pend. 10:25

■12:4 1Kor. 11:7

□12:5 «... oy-pikri durus höküm chiqirar» — yaki: «...oy-pikri durustur».

■12:6 Pend. 1:11,18; 11:9

□12:7 «Yamanlar aghdurulup, yoqilar» — bashqa birxil tejimisi: «Yamanlar aghdurulghanda, yoqilar».

■12:7 Zeb. 37:36-40; Pend. 11:21

■12:9 Pend. 13:7

■12:10 Qan. 25:4

■12:11 Pend. 28:19

□12:13 «Yaman adem öz aghzining gunahidin tutular» — yaki «Éghizdiki itaetsizliktin rezil tuzaq chiqar».

■12:13 Pend. 10:14; 18:7

■12:14 Pend. 13:2

■12:15 Pend. 3:7

□12:16 «...haqaretke sewr qilar, setchilikni ashkarilimas» — ibraniy tilida bu ikki ibare «ikki bisliq» bir söz bilenla ipadilen’gen.

■12:17 Pend. 14:5

■12:18 Zeb. 57:4; 59:7; Pend. 16:27

□12:19 «rastchil» — ibraniy tilida «heqiqetning léwi». «lewzi yalghan bolsa birdemliktur.» — ibraniy tilida «yalghanchi til bolsa birdemliktur».

■12:23 Pend. 13:16; 15:2

■12:24 Pend. 10:4

■12:25 Pend. 15:13

□12:26 «Heqqaniy kishi öz dosti bilen birge yol izder» — bashqa xil terjimiliri: «Heqqaniy kishi öz dostining könglidikini tekshürer», «Heqqaniy kishi dost tutushta segek bolar» yaki «Heqqaniy kishi öz dostigha yol körsiter».

□12:27 «Biraq etiwarliq bayliqlar tirishchan’gha mensuptur» — bashqa birxil terjimisi: «Biraq tirishchan kishi öz teelluqatini etiwarlaydu».