2 TIMOTEO
Jiro Pablo Timoteore cʉ̃ ca owa cojo nemori pũurora, cʉ̃ ca bii yaipe ca cõñacã doorijere majiri, cʉ̃ yeere cʉ̃re cʉ̃ ca cũu yaipere ca owa tʉjagʉre biri wãme owami. Tee tiigʉ cʉ̃re cʉ̃ ca owa cojo jʉori pũuro mena cʉ̃ ca tii niipere cʉ̃re cʉ̃ ca wede majioriquerena jĩcã wãmeri ĩi queno, apeye cʉ̃re ĩi nemo, ĩimi.
Ca nii jʉori tabere peeto añu doti cojo yapano (1.1-2), Timoteo, díámacʉ̃ tʉo nʉcʉ̃ bʉo, Pablore bʉaro cʉ̃re mai, cʉ̃ ca biirijere ĩima ĩigʉ, Ʉmʉreco Pacʉre “Añu majuropeecã” cʉ̃re ĩi, ĩimi (1.3-5).
Tee jiro, tee añurije queti jʉori cʉ̃re cʉ̃ja ca jĩa cõacãpe ca nii pacaro, to birora Pablo cʉ̃ ca tʉo nʉnʉjeecõa niirije añurije quetire bobo jãaricaro maniro to birora tʉo nʉnʉjeecõa niiriquere cʉ̃re wede majiomi. Timoteo cãa jĩcʉ̃ uwamʉ añugʉ Jesucristo yʉʉre birora, tʉgoeña bayirique mena to birora ñañaro cʉ̃ ca tamʉo peera niiro bii (1.6—2.13).
Díámacʉ̃ ca niitirijerena ca buerã menare cʉ̃ ca bii niipere cʉ̃re wede majiomi. Wederique ñeeacã pee ca tiitirije jʉorira, ca tʉorã peera añuro nii majiña maniro tii, ameri tutiricaro tii, ca tiirijerena cʉ̃ menara cʉ̃ ca ĩi ñaajua nucũ yujutipere biro ĩigʉ cʉ̃re wede majiomi. To biro ĩicã, añuro cʉ̃ ca biirique cʉti niipere, wimagʉ niigʉpʉra Ʉmʉreco Pacʉ wederique cʉ̃ ca bue ecorique ca ĩirore biro to birora cʉ̃ ca tʉo nʉnʉjeecõa niipere, cʉ̃re wede majiomi. Tee jiro, cʉ̃ ca tii niipere jĩcã wãmeri cʉ̃re wede majio, ñucã cʉ̃re ca biirijere cʉ̃re queti wede, ĩimi (2.14—4.18).
Ca tʉjari tabepʉra añu doti yapanorique mena ĩi yapano eami (4.19-22).
Pʉati Timoteore Pablo cʉ̃ ca queti owa cojorica pũuro
1
Añu dotirique
1 Yʉ Pablo, Ʉmʉreco Pacʉ cʉ̃ ca boorore biro Jesucristo yeere wederi majʉ, Cristo Jesús jʉori catirique bʉarique niirucu cʉ̃ ca ĩirique ca niirore birora, wede dotigʉ cʉ̃ ca tiicojoricʉ, 2 yʉ macʉ̃re biro yʉ ca maigʉ Timoteore, mʉ yʉ añu doti cojo. Mani Pacʉ Ʉmʉreco Pacʉ, mani Wiogʉ Jesucristo, cʉ̃ja ca añurijere, cʉ̃ja ca ĩa mairijere, cʉ̃ja yee jĩcãri cõro niiriquere, mʉre cʉ̃ja tiicojojato.
“Añu majuropeecã,” ĩirique
3 Ñamiri, ʉmʉrecori, yʉ ca juu buerije cõrora mʉre tʉgoeñari, Ʉmʉreco Pacʉre “Añu majuropeecã,” yʉ ĩi, yʉ ñicʉ̃ jãa niiquĩricarã cʉ̃ja ca tii niiquĩricarore birora tiigʉ, añuro tʉgoeña yeri cʉtirique mena, yʉ ca tii nʉcʉ̃ bʉogʉre. 4 Mʉ ca otiriquere tʉgoeñari, mʉre yʉ ĩarʉgami, ʉjea niirʉgʉ. 5 Díámacʉ̃ra, díámacʉ̃ mʉ ca tʉo nʉcʉ̃ bʉorijere yʉ maji. Mʉ ñicõ Loida, to biri mʉ paco Eunice, díámacʉ̃ tʉo nʉcʉ̃ bʉo jʉoupa.* 1.5 Hch 16.1. Mʉ cãare, “To birora biimi” yʉ ĩi.
6-7 To biri yʉ amori mʉre yʉ ca ñia peori tabere, mʉ ca tii maji niipere Ʉmʉreco Pacʉ mʉre cʉ̃ ca tiicojoriquere, “Uwitigʉra teere tiicõa niiña,” mʉre yʉ ĩi. Ʉmʉreco Pacʉ uwi tʉgoeña yeri cʉtirique méére, manire tiicojoupi. Mani ca ĩi bayipere, mani ca ameri maipere, tʉgoeña bayiriquere, manire tiicojoupi. 8 To biri mani Wiogʉ yeere wede niigʉ boboeto. Ñucã cʉ̃ yee jʉorira tia cũurica wiipʉ yʉ ca niirije cãare boboeto. Mʉ cãa añurije queti jʉori ñañaro tamʉogʉ, Ʉmʉreco Pacʉ tutuarique mʉre cʉ̃ ca tiicojorije mena, to birora tʉgoeña bayicõa niiña. 9 Ʉmʉreco Pacʉ manire ametʉene, ca ñañarije manirã mani ca niiro manire tiirʉgʉ, manire jʉoupi. Añurije mani ca tii niirije jʉori méé, mee ati ʉmʉrecorire cʉ̃ ca tiiparo jʉgueropʉra Cristo Jesús jʉori, atere to biro manire tii bojaupi. 10 Mecʉ̃ra Cristo Jesús manire Ca Ametʉenegʉ, bii yairiquere tii yaio,† 1.10 Jesucristore ca tʉo nʉnʉjeerã, ñañaro bii yairica tabepʉre waatirucuma. añurije queti mena to birora caticõa niirique ca peti nʉcãtirije peere añuro ca boeropʉ ami bau nii, ca tiiricʉ cʉ̃ ca doorique mena bii bau nii eaupa.
11 Ate añurije quetire, yʉre wede dotiwi Ʉmʉreco Pacʉ. Cristo yeere wederi majʉ, ñucã bue majiori majʉ, yʉre tiicojo cojowi. 12 Tee jʉorira ate niipetirijere ñañaro yʉ tamʉo. To biro yʉ ca biirijere yʉ boboti, díámacʉ̃ yʉ ca tʉo nʉnʉjeegʉre ca majigʉ niiri. Teere yʉre ca wede dotiricʉ ca tutuagʉ niiri, tii rʉmʉ ca earopʉ yʉre cʉ̃ ca ĩa nʉnʉjee yerijãapere yʉ maji.
13 Díámacʉ̃ bue majiorique yʉre mʉ ca tʉoriquere wajoatigʉra, tee ca ĩirore biro tii nʉnʉjeecã nʉnʉa waagʉja. Ñucã Cristo mena niirã díámacʉ̃ tʉo nʉcʉ̃ bʉo, ameri mai, mani ca bii niirije mena niiña. 14 To biri Añuri Yeri manipʉre ca niigʉ cʉ̃ ca tii nemoro mena, díámacʉ̃ bue majioriquere mʉre cʉ̃ ca dotiriquere añuro ĩa nʉnʉjeeya.
15 Mee niipetirã Asia yepa macãrã, ñucã Figelo, Hermógenes jãa menapʉra yʉre cʉ̃ja ca waa weocoariquere mʉ maji.
16 Wiogʉ, Onesíforo yaa wii macãrãre cʉ̃ ĩa maijato. Cʉ̃ pea paʉ tiiri, yʉ ca tʉgoeña tutuaro tii, tia cũurica wiipʉ ñañaro yʉ ca bii duwi yujurije cãare bobo tʉgoeñati, biiwi. 17 To biro biitigʉra, Romare eacãgʉpʉa ama yerijãaricaro maniro yʉre ama, yʉre bʉacãripʉ yerijãawi. 18 To biri Wiogʉ, tii rʉmʉ ca earo, cʉ̃ ca ĩa mairijere cʉ̃ ca bʉa earo cʉ̃re cʉ̃ tiijato. Mee añuro mʉ maji, paʉ tiiri Éfesopʉre manire cʉ̃ ca tii nemoriquere.