Kayëte ndënkwëryënkw mba Piyer
Wade yehëhna kayëte Piyer
Piyer afaƴik Yesu Këris yeho. Yesu macëkawo wati nte pëlaɗëhëhniw̃o wëỹis ŋa. (Lik 5.1-11; Matiye 4.18-22) Wati rac Simo macëɗeho. Ahwëhn a Yesu nkwëcëtëkawo w̃ac ỹa Simo maca Sefas (San 1.42), umë fëhnëtanëk taka (gë watëvav ŋa, «pierre»).
Wati nte ndokuŋëɗëho Yesu ŋa, Piyer ɗarël lëw̃u nkeho kwëlëkwël. Mama nkehahnëko rac, anjahëtakawo Ahwëhn a wahwënta warar, gante ntehnëkawo Yesu ka ani gë pëlahnënde ỹa. Ankentahniko hnë viyary vëryënkwëryënkw g'iƴag nte pëƴayiniho iɓëhn Yesu ŋa do, ga ndëcëk watac, nkoko kahnënda hnë pëƴahn Wanës Wakasëk hna.
Ntiyahnëkëfu paryi Piyer Rom hna nkeho ga cëmëk Afaƴik Pol hnë bëhn wafëhw imbëɗ g'iryaw̃ gë warar ma bëhn wafëhw imbëɗ gë ryaw̃ gë wahnah (63 gë 64) ga ndëcëk hnagi Yesu ỹa.
Piyer kerëhnëkëhniwo kayëte ntëw̃u ŋa vële hwëtahnëk ye hnë vankol imbëɗ vambë Asi Toƴ hn'ile macik gaki Tirëki hna. Andënkwëtehnëɗëhëhni waƴëhw nuỹani hnë Këris hna do kamënaỹehnëhni fëna maw̃ëhnëniha W̃ënu ŋa paɓ gë wahorot do iɓërehn soŋe ikwëtahn ntëw̃ hni Këris ŋa.
Piyer tëƴëɗëhëhni fëna ntënënëlëni: ale-wo-ale paɓ gë vësankaf va, vëryonkuŋ va paɓ gë vële hwëhnëkëhni, vësëval va paɓ gë vësan hni, do vësan va paɓ gë vësëval hni.
Wëlin wanës wakwëhn nafa hn'iŋi kayëte: uhorot, imaw̃ëhn, wameh, iƴir.
Wëlin gante nke kayëte ka:
Simpaỹi (1.1-2)
Itama g'imac njasa pacah (1.3–2.3)
Itaka nte yënëɗ gë ɓulunda le rëhnayik (2.4-12)
Imaw̃ëhn (2.13–3.7)
Uhorot lakënde alind ufërën (3.8-22)
Itav wameh do ɗemal (4.1-11)
Mbetani vële horotëɗ had Këris (4.12-19)
Vicër gë vële hahnëndak va (5.1-11)
Simpaỹi rëkwa (5.12-14)
1
Simpaỹi
1 Ami Piyer, afaƴik Yesu Këris ỹa, herëhnëryiɗëhu w̃uhnë vële tëhnak do ye vëhneh sampëk hnë wayal Pon gë Galasi gë Kapaɗos gë Asi do gë Bitini vi. 2 W̃ënu ŋa Rëm ỹa tëhnaku had gante njëtëko koɓëri ka; gë Iƴir Ipacah ŋa pitirun soŋe lëw̃u. Ha, tëhnaku ɗanko aw̃aw̃ëhnahnuna Yesu Këris do pacënahnu g'icëlëvahn sat lëw̃u ỹa.
Araɓi ipërëna ŋa gë ƴam ỹa nkwënawu ɗus!
Itama nte wok cëmëɗina
3 Cëmbënëfuna ale ye W̃ën gë Rëm Ahwëhn fu ỹa Yesu Këris: hnë ikaỹëhnahn cankaf ntëw̃u hna, anagëkëfu g'ahaw̃ary g'imat Yesu Këris fagant vësëm, soŋe nuỹayin itama nte wok cëmëɗina, 4 do soŋe nuỹayin intëw̃ inte wok ɓëvëɗina muk, tonkëɗina, do igwam ntëw̃u ŋa cëvëɗina. Irac kwëtëhnëku mbin hna, 5 w̃uhnë vële keryëɗ gë fanka falëw̃u fa, gë fere ikwëtahn soŋe ipeh nte fëhwëtak tufëhna wati rëkwa hna. 6 Soŋe umë pëɓëryiw̃u uhnatah w̃a, lakënde soŋe wati roƴ tëfëka ahoroteyehniw̃u gë fop wasifa wayëkëhnahn. 7 Iỹi horot tufahnëɗ ikwëtahn hun ŋa paryi nke. Sanu ỹa koɗe përëkani, ɓare hwëɗëh hna nuɗe bi nkwamëk. Aki fëna ikwëtahn hun ŋa le ỹak hnëfak gë sanu ỹi njëkëhnahnik hnë fop wasifa wahorot hna, soŋe njëtahni njaw̃ëk. Tac fac le mbokajëɗ Yesu Këris ỹa, gë fere ikwëtahn hun ŋa nkeɗ iɗëwan, icëmb do idënën. 8 Ŋahnërunëha hara nulunahna, gaki kwëtahnërunëha hara nulunahna, do uhnatah hun w̃a camëk hafo le nkoyik koɗena tëfëtayi gë wanës, 9 kaɓi tëkën ŋa rëkënëɗun ile njëkëlehnëɗ ikwëtahn hun ŋa: umë ye ipeh walaw̃ary hun w̃a.
10 Koɓëri ŋa, wakila W̃ënu ŋa njëkëlehnëni paryi nuni hak W̃ënu ŋa pehëtëɗëhëhni vahnë va. Apëƴahnëniho soŋe iŋi peh nte njëɗaɗëhu W̃ën. 11 Wakila watac njëkëlehnëni njëtëni guve do hak ntiyaɗ irac. Iƴir Këris ŋa hnë vëhni nkeho, do pëƴahnëko koɓëri ŋa wahorot wale rëfëkawo nuỹa Këris ŋa do g'icëmb inte rëfiɗëha ŋa. 12 W̃ënu ŋa njëtëndanëkëhni waŋi wanës gena soŋe lëw̃ hni dënk, ɓare soŋe hun yëɗahnik. Doliỹi vëfëƴahn Wanës Wakasëk ŋa nësëhnënihu watac gë Iƴir Ipacah nte yëɗahnijik ambin ŋa. Do wamëleka ŋa dënk ñaɗëni ɗus njëtëni rac.
Imac njasa pacah
13 Soŋe umë ye, naharyin ile rëfëka aliwu ỹa, nëgaryin do kwëtëryin fop tama hun ŋa hnë uyëɗ ipeh nte yëɗaɗerun fac le mbokajëɗ Yesu Këris ỹa. 14 Maw̃ëhnëryina W̃ënu ŋa had vutah vupërën: Ant'arëfu viña vimeh waɓë koɓëri ŋa, wati nte nkorunëho ƴëtëluhna toña ŋa. 15 Ɓare had gante pacëk ale w̃acëku ka, w̃uhnë fëna geryin vëfacah hnë fop vankeya hun hna, 16 kaɓi kerik: «Geryin vëfacah, kaɓi ami pacëɓu.»✡ 1.16: Soŋe Walevi 19.2
17 Hnë wayëfa hun hna, macëɗunëha «Apa» ale hitiŋëɗ ale-wo-le ile ntik ỹa hara dëbëndëlehnëlihëhnihna vahnë va. Soŋe rac ye, geryin vëlënën W̃ën, wati le yehahnërun nkal li. 18 Ankeya nte hnuỹarun gë vacërakëlo hun vi ƴiryeryëɗina karyënkw. Ɓare njëtërun, W̃ënu ŋa cosahnëk icos cankaf soŋe pehëtahnu hnë aŋi sifa nkeya. Dinahna gë viỹë vile fërëkaɗ, had sanu ma kori. 19 Ɓare pehëtëku gë sat fërën Këris ỹa, umë ale ye had fape fante wok kwëhnana dahëse w̃eh do ñoñ nuɗena ile wek. 20 W̃ënu ŋa tëhnakawo ani gë ntihahnënd ɗuniỹa ỹi, atufahnëka gaki hnë waỹi wawati wale ye warëkwa, soŋe hun. 21 W̃uhnë, paɓ gë Këris kwëtahnërunëha W̃ënu ŋa, umë ale vëhnëndanëka fagant vësëm do yëɗaka icëmb; aki kwëtëɗun ikwëtahn hun ŋa do itama hun ŋa W̃ën hna.
22 Maw̃ëhnërun toña ỹa do koyëna pacënërun vintaw̃ary hun va, alihahnu iŋahnël catah vëỹënta hun. Ŋahnëlëryin ɗus gë vëỹënta hun gë ntaw̃ary hun fop. 23 Nagirun hnë uwám hasëk, ule wok matina hnë uhnëɗa ule fuɗ ɓare ule w̃atik hnë uhnëɗa ule wok cëmëɗina: Wanës W̃ën waɓë kantëm. 24 Kaɓi,
«Mbahn ŋi nke had dël,
do fop icëmb dëwu ŋa had ufëtel dël;
dël ŋa kankëɗ do ufëtel ulëw̃u w̃a njoɗ;
25 ɓare unës Ahwëhn a nkoɗ kantëm.»✡ 1.25: Esayi 40.6-8
Uw̃i nës, Wanës Wakasëk wante fëƴayirun ye.