51
Kari Kaem noko memek siwurok ale gomang tuokko wosenga
(David Uriah ko imet Bathsheba tam, se Yawe ilak tuatara ko kari Nathan ko David maonam se David den imi batogam.)* 2 Samuel chapters 11 nama 12.
1 O Kaem, nika kua nangara ko munan mu te gemang lila aisuko;
nika gemang bataga biya mu te aga memek siwu waruko.
2 Aninga paguwura suen la siwu waru ale aninga memek anup nunguruko.
3 Aninga bita paguwura mu angamin te aniso,
ale aga memek mu wetang te aniso.
4 Ani memek beterem mu ni ari saperem,
ani munan memek nika motam te beterem;
se ni den te aga betesam mu ni diram la betesam,
ale aga memek wetang sapasam mu am diram.
5 Ani kuriang gue te la memek ago,
se memek mu karogo aga ayam kumik te bilangerem.
6 Ni ani kuriang gue te la munan diram karo tuekko gemang anikaso;
se nang tuagu ningi la ikia sinar aga kausem.
7 Ni hyssop kower te aga bilinguru se aninga memek menarukko;† Hyssop kower mu gue karogo: Exodus 12:22; Leviticus 14:1-7; Numbers 19:1-6,16-19; Hebrews 9.
aga memek suen la anu waru se nika metam te nikim la bagarikko.
8 Ni aninga angimik asokel menawurem,
bare aitak ni aninga sangaru se aking amilmil te bagarikko.
9 Ni aninga betera memek mu biring tui ale aga memek siwu waruko.
10 O Kaem, angamang motam nikim iru tuiko;
ale sokel iru angamang motam ningi bitar se ani ni kerak la bagarikko.
11 Ni ka motam te me aga kau sarumu saparko;
ale ka Bur Laili aninga ningi mu me tagi bataguru toko.
12 Aga sangaru tata ko amilmil mu
akingtala angamang motam ningi bitarko;
aninga ikia sangam aisu, se ani te ni bowa ningi la baga se lagarikko.
13 Mu te ani memek betera kariimet alo mu nika munan nunga kausek
se giris palagamon kiring karo tumonko.
14 O Kaem, ni aninga Saonga Kari,
gue agiting te aniso imi siwur se
ani amilmil te nika munan ningo dirkiriyam mu ko wur iluwekko.
15 Kari Biya, aga sangaru se ka nip biya patawurikko.
16 Ani te tama bita kisa ko sipsip mel ta kete karogo tairik, bare ni mu ko me uririkisam;
ani tama bita kisek ta, bare nika gemang motam tawun biya te me aniso tala.
17 O Kaem, tama bita kisa ko munan ni ko kuesam mu iwita:
kari ko memek ari ko ikiso ale ko gomang ninguru batagoso;
munan o ta umutang ni ko kuesam ale me biriruwusam.
18 O Kaem, nika amilmil ningo te wonong Zion gemang tui ale sangaruko;
Jerusalem ko por lautam umu sokel tuiko.
19 Mu te ka kariimet nongomang motam
ningo diram la te tama bita kisimonko,
mel altar te lilim la kai sapara iwita bita kisimon se ni ko amilmilerko;
asele aking bull nunga momon ale altar te aking tama bita kisimonko.