1 Iyan heini impaahà te Nengazen he MEGBEVAYÀ kediey: Neehè ku is revan he zuen din taǥù he nelutuan he menge prutas. 2 Mid-insà is Nengazen kayi te kedì te, “Amos, hengkey is neehè nu?” Ne midtavak a te, “Sevaha he revan he zuen din taǥù he nelutuan he menge prutas.” Ne migkaǥi is Nengazen kayi te kedì te, “Neume en is ketepusan te menge etew ku he menge tig-Israel. Kenè ku en sikandan egkehizuwan. 3 Dutun he andew te kedsiluti kandan, is melipayen he kegkanta ziyà te valey ku egkehimu he sineǥawan su mahabet is ebpekepeyapat diyà te minsan hendei he ebpemematey. Ne zutun wazè en egkezineg he keǥurub. Iyan a, is Nengazen he Megbevayà, is migkaǥi kayi.”

4 Pemineǥa niw heini, sikiyu is edlislisezen dan is menge pubri wey edtinguhà te kedezaat kandan. 5 Ima niw ke metapus en is Pista te Kebpuun te Hayag etawa Andew te Kedhimeley su wey kew mekepemelegyè en te trigu ne wey kew mekepenlimbung pinaaǥi te kedsukud, kedtakes, wey kedtimbang niw. 6 Egaangaan kew ebelegyà te trigu he nesehuǥan te ukap, su wey kew mekepemasa te pubri he etew he mid-uripen su kenà ebpekevayad te utang din, minsan senge paris dà he sandalyas is utang din. 7 Umbe, nenangdù is Nengazen, kes Megbevayà he impahambug niw te menge kevuwazan ni Jacob, ke sikandin te, “Kenè ku edlipatan is langun he kelelalung he mibeelan niw. 8 Tenged kayi ibpelinug ku ziyà te tanè niw ne ebpemekesineǥew kew. Egkepurung egkeyunggat is tanè niw, he iring te kedlapey wey kegkemezahi te Wahig he Nilo ziyà te Ehipto. 9 Dutun he andew te kedsiluti ku keniyu, ibpesanlep ku is andew ziyà te udtuwan, umbe ebmerusirem minsan maandew pa. Iyan a, is Nengazen he Megbevayà, migkaǥi kayi. 10 Edhimuwen ku he sineǥawan is kedlipey niw emun timpu te pista, ne edhimuwen ku he hulùhulù is menge kegkanta niw. Ebpevistiyan ku sikiyu te saku wey edsuǥuen ku he mebpevangul su wey niw ikepaahà is kedlalew niw, iring te menge ǥinikanan he edsineǥew tenged te kebpatey te vudtung he anak dan. Piru edhuna pa he mesakit is ketepusan kayi he menge silut.”

11 Migkaǥi pa is Nengazen he MEGBEVAYÀ te, “Egkeuma is timpu he ibpaaǥi ku is bitil ziyà te tanè niw. Piru kenà heini vitil te keenen etawa kegkemezahi te wahig, kekenà, bitil heini wey kegkemezahi te kebpemineg te menge lalag ku. 12 Ebpekeziregdireg kew tenged te kegkeveley niw te kebpen-ahà te etew he ebpekepenudtul ziyà te keniyu te menge lalag ku, piru kenè niw egketuredu heini minsan hendei kew ebpevayà. 13 Dutun te andew te kedsiluti ku keniyu, minsan is kezegwayan he vetan-en he menge vahi niw wey vetan-en he menge maama niw, egkengevidtawan tenged te kegkemezahi. 14 Sikiyu is ebpenangdù pinaaǥi te ngazan te menge ed-ezapen diyà te Samaria, Dan, wey Beersheba, edezeetan kew ne kenè kew en ebpekeenew pa.”