1 Migkaǥi si Elihu te, 2 “Sikiyu is egkaǥi te uluwanen kew wey zekelà is netuenan niw, purungi a keniyu pemineǥa. 3 Su iring te egketuenan te zilà ke hengkey is metaam wey kenà metaam he keenen, is telinga egketau zaan ke hengkey is hustu etawa kenà hustu he menge lalag. 4 Umbe, edsevuten tew ke hengkey is hustu; ed-istudyuwan tew ke hengkey is meupiya. 5 Su migkaǥi si Job te, ‘Wazè ku salà piru wazà a beǥayi te Megbevayà te kukuman he kenà a egkevintahaan. 6 Minsan metazeng a, ed-isipen a he teruen. Minsan wazà salà he nehimu ku, mibeǥayan e zin te zaru he kenà egkeulian.’

7 “Wazà etew he iring ki Job te utew egkesuat he edsudien. 8 Metaam diyà te kandin is kebpekiduma te menge lalung wey mekesesalà he menge etew. 9 Su ke sikandin te, ‘Wazà egkekuwa te etew emun edtinguhà sikandin te kebpenunuat te Megbevayà.’ 10 Umbe, pemineg kew kedì, sikiyu is egkaǥi he ebpekesavut kew. Kenà ebaal te mezaat is Mekeǥeǥehem he Megbevayà. 11 Ebelesan din is etew sumalà te vineelan din; edhimuwen din diyà te kandin is sungkad te vetasan te etew. 12 Kenà egkehimu he ebaal te sayep is Mekeǥeǥehem he Megbevayà. Kenè din ebulegkuen is hustu he kukuman. 13 Duen be midsuǥù kandin te kedumala te tivuuk he kelibutan? Wazà! 14 Emun egkesuat is Megbevayà he egkuwaan din is gehinawa he imbeǥey zin te etew, 15 ebpematey is langun he menge etew ne ebpekelikù dan diyà te tanà.

16 “Emun duen nu kedsavut, Job, pemineǥa nu is egkeǥiyen ku: 17 Ebpekezumala ve is Megbevayà ke kenè din egkesuatan is metazeng he kukuman? Maan is ed-isipen nu he mezaat is metazeng wey mekeǥeǥehem he Megbevayà? 18 Kenè be ke mezaat wey wazà pulus te menge hadì wey menge upisyal edewayen te Megbevayà sikandan? 19 Wazè din ibpelavi te menge pengulu; wazè din peburi is menge sepian lavew te menge pubri, su pudu zin sikandan linimbag. 20 Minsan is gemhanan he menge etew edtik-ew ebpatey ke mezukilem, he wazà etew he midhilavet kandan. 21 Ebpekeventayan te Megbevayà is langun he ebeelan te etew. 22 Wazà merusirem he lugar he egkehimu he ed-elesan te menge lalung. 23 Kenè en kinahanglan he edtewaǥen din pa is etew he medhendiyà te etuvangan din su ed-imbistigahan din su wey zin mehukumi. 24 Kenè en kinahanglan he ebpenginginsà sikandin ke ereg be he ibpaawà diyà te kegkelavew zan is gemhanan he menge etew ne ed-ilisan te zuma. 25 Su netuenan din is menge vaal zan, id-awè din is gehem dan wey edèdeetan din sikandan minsan mezukilem. 26 Edsilutan din sikandan diyà te etuvangan te menge etew tenged te kelelalung dan. 27 Ebeelan din heini su ǥeina te mid-engked sikandan he edsunud kandin, wey wazè dan seǥipaa is menge paaǥi zin. 28 Edèdaaǥen dan is menge pubri, ne nezineg te Megbevayà is kebuyù dan te tavang. 29 Piru minsan ebpereremek wey ed-eles is Megbevayà, ne wazà ebpekekaǥi he kenà hustu is ebeelan din. Piru is tutuu, ebentayan te Megbevayà is menge etew wey is menge nasyun, 30 su wey zin meeǥen is kedumala te menge etew he wazà medtuu kandin he ebpekezezaat te menge etew.

31 “Job, maan is kenè ka ed-uvey ziyà te Megbevayà is egkaǥi te, ‘Nekesalà a, piru ed-engked ad he ebaal te salà’ 32 etawa egkaǥi ka te, ‘Ipeteuni nu kedì is salè ku. Emun nekesalà a ne kenè ku en ed-umanan te ebaal.’ 33 Kenà ibeǥey te Megbevayà is hangyù nu emun kenè nu ed-engkezan is mezaat he vaal nu. Diyan te kenikew is disisyun ne kenà dini te kedì. Umbe keǥiya nu kedì ke hengkey is egkekaǥi nu. 34 Is menge etew he uluwanen wey ebpekesavut, he nemineg kedì, 35 ebpekekaǥi he is egkeǥiyen nu, Job, ne wazà mezumahi te ketau wey wazè din pulus. 36 Ereg ka he ebpurungan egezami su is menge lalag nu iring te menge lalag te lalung he etew. 37 Mid-umanan nu pa is salè nu pinaaǥi te kebpekidsukulè nu te Megbevayà. Edsudien nu wey ed-insultuwen nu is Megbevayà diyà te etuvangan dey.”