1 “Netuenan nu ve ke keenu ed-anak is leew he menge kambing? Nekevantey ke ve te ked-anak te menge selazeng? 2 Ebilangen nu ve is menge vulan te keǥingayan dan taman te ked-anak dan? Netuenan nu ve ke keenu sikandan ed-anak? 3 Edleku zan is ebeliliten taman te ebpekaanak dan. 4 Emun edekelè en is anak dan diyà te sibsivayan, edhipanew heini ne kenè en edlikù. 5 Hentei is nengelintau wey mekeuyayà is leew he asnu? 6 Iyan a mibeǥey kandin te sibsivayan he egkeubpaan din; ibpeubpè ku ziyà te tanà he mibey-anan en. 7 Ebpekeziyù heini te meǥurub he inged ne kenà egkesuat he ebuǥawen. 8 Edriǥuriǥu heini ziyà te menge vuntud is ebpen-ahà te egketabtab din.

9 “Igkepeterebahu nu ve is baka he simadun? Kenè be heini ed-awà diyà te tudil nu emun mezukilem? 10 Egkehiketan nu ve heini ne igkeeradu nu ziyà te vevesukè nu? 11 Ebpekesarig ke ve te zesen din para egketerebahu zin is meveǥat he terebahu nu? 12 Ebpekesarig ke ve kayi he edtiǥumen din wey edhekuten din is neraǥun pehendiyà te gunasà?

13 “Utew mekempet he ed-ahaan is pakpak te ustrits emun edseripakpak, piru kenà heini ebperepeng te kekempet te pakpak te tulabung. 14 Ed-ewaan te ustrits is impis din diyà te tanà su para meinit heini. 15 Kenè din igkeipeng is kegkeǥieki etawa kegketekutaki zuen te leew he menge langgam. 16 Mesipala sikandin te menge pispis din he henduen be te kenà kandin. Kenà sikandin egkeipeng he kela ke mehimu he wazà pulus te midheǥuan din. 17 Su wazè ku sikandin beǥayi te ketau wey kedsavut. 18 Piru emun lumbà te kebpelelaǥuy ne và din dà ed-engiti is kudà wey is ed-untud kayi.

19 “Job, iyan ke ve mibeǥey te kudà te zesen? Iyan ke ve mibeǥey te keburey ziyà te lieg din? 20 Iyan ke ve nengelintau wey mekelingketew he iring te terapan ne wey zaan mekeherìhì te igkahandek te menge etew? 21 Meviserviser heini he egkahiskahis te tanà, he ebpaahà te zesen din. Ne ebpelelaǥuy pehendiyà te edtebekan. 22 Wazè din igkahandek ne kenè din ebpeleǥuyan is tebek. 23 Edleletingkik wey edsinew is menge ǥumaan te ed-untud kandin. 24 Ebpengelivegbeg is eliyavuk tenged te keǥaan te kebpelelaǥuy zin. Ne kenè en egkesanggen emun ibpezaǥing is budyung. 25 Edherìhì emun egkezineg din is daǥing te vudyung. Minsan meziyù pa heini egketuusan din is tebek, ne egkezineg din is kulehian te edtetebek wey is mandar te menge peremandar.

26 “Iyan ke ve nenurù te dapay te kedlayang wey kedhendiyà te zivavà? 27 Iyan ke ve midsuǥù te kulaǥu te kedlayang wey kebaal te salag diyà te metikang he lugar? 28 Diyà ed-ubpà te zempilas is kulaǥu; is metikang he menge vatu ne iyan elesè din. 29 Dutun sikandin ebpememantew te egkehimu he edewiyen din, ne egkeehè din haazà minsan diyè dà sikandin te meziyù. 30 Emun duen egkeehè din he minatey ebeyaan din heini, ne edsupsupen te menge pispis din is lengesa kayi te minatey.”