1 Hein nezineg ni Hadì Jabin he hadì te Hazor is menge kezeeǥan te menge Israilihanen, ne mibpeuwit sikandin te lalag kayi he menge hadì: diyà te ki Hadì Jobab he hadì te Madon, diyà te menge hadì te Shimron wey Acshaf, 2 diyà te menge hadì diyà te menge vuvungan he zapit te zizaya, diyà te menge hadì te Suǥud te Jordan diyà te zivavà te Ranew te Galilea, diyà te menge hadì te menge mibuntud-buntud diyà te edsenlepan, diyà te menge hadì diyà te veyvey te Dor he zapit te edsenlepan, 3 diyà te menge hadì te menge Canaanhen diyà te edsilaan wey edsenlepan te Wahig he Jordan, diyà te menge hadì te menge Amunihanen, diyà te menge hadì te menge Hitihanen, diyà te menge hadì te menge Pirisihanen, diyà te menge hadì te menge Jebusihanen he meǥinged diyà te menge vuvungan, wey ziyà te menge hadì te menge Hivihanen he menge meǥinged diyà te lugtenaan te Buntud he Hermon he ziyà te tanà he Mizpa. 4 Mibpeteltelevukà heini he menge hadì duma te menge sundaru zan. Iring sikandan kahabet te pantad diyà te veyvey, utew zaan mezakel is menge kudè dan wey menge kerwahi zan. 5 Midsevaha heini he menge hadì ne migkampu zan diyà te veyvey te Wahig he Merom su edtebeken dan is Israel.

6 Migkaǥi is Nengazen diyà te ki Josue te, “Kenè kew mahandek kandan, su keeselem te iring kayi he uras, ne egeraan ku sikandan is langun para te Israel. Penlepui niw is menge kudè dan wey peminsuli niw is menge kerwahi zan.” 7 Umbe, midtik-awan sikandan surunga ni Josue duma te menge sundaru zin dutun te Wahig he Merom. 8 Mibpengelinteuwan te Nengazen he mezaag te menge Israilihanen haazà is menge kuntada zan. Midal-as dan is menge kuntada zan taman diyà te Zekelà he Sidon wey ziyà te Misrefot Maim, wey taman diyà te Suǥud te Mizpa ziyà te edsilaan, taman te naamin dan mepatey is menge kuntada zan. 9 Mibeelan ni Josue ziyà te kandan is insuǥù te Nengazen: Mibpenlepuan din is menge kudè dan ne mibpeminsulan din is menge kerwahi zan.

10 Kegkepasad kayi midlikù ensi Josue ne mid-aǥew zan is Hazor ne midhimetayan dan is hadì kayi. (Is Hazor iyan utew mekeǥeǥehem he ginhedian dutun he timpu.) 11 Mibpenhimetayan dan daan is langun he meǥinged diyà te Hazor, ne wazà nesamà he uuyag. Ne mibinsulan dan haazà is inged.

12 Naaǥew eni Josue heini is langun he menge inged. Migerè dan is langun he menge meǥinged kayi, ragkes is menge hadì dan, su iyan heini insuǥù te suluǥuen te Nengazen he si Moises. 13 Iyan, wazà mulà binsuli te menge Israilihanen is menge inged he menge vuvungan, gawas te Hazor he mibinsulan ni Josue. 14 Mibpenguwa te menge Israilihanen is langun he menge azen wey menge uyaǥen kayi he menge inged. Piru mibpenhimetayan dan mulà is langun he meǥinged kayi, ne wazà nesamà he uuyag. 15 Iyan heeyan insuǥù te Nengazen ki Moises, ne insuǥù daan heini ni Moises diyà te ki Josue. Ne midtuman ni Josue is langun he insuǥù te Nengazen ki Moises.

16 Nekuwa ni Josue haazà is tivuuk he tanà: is menge vuvungan, is tivuuk he tanà te Negev, is tivuuk he tanà te Goshen, is menge mibuntud-buntud diyà te edsenlepan, is Araba, wey is menge metikang wey mevavà he menge vuntud diyà te Israel. 17 Is lugar he nesakup din, ne ziyà ebpuun te Buntud he Halak petekezeg diyà te Seir taman te Baal Gad he ziyà te Suǥud te Lebanon diyà te lugtenaan te Buntud he Hermon. Midakep din wey mibpenhimetayan din is menge hadì kayi he menge lugar. 18 Meluǥayad he timpu is kebpekidtebek dan ne human nepasad. 19 Wazà duma he mibpekid-emiǥu te menge Israilihanen kayi he lugar gawas te menge Hivihanen he meǥinged diyà te Gibeon. Is duma nezaag dan te tebek. 20 Su mibpekubalan te Nengazen is gehinawa zan su wey zan sukuli te tebek is menge Israilihanen. Ne pinaaǥi kayi egkepurung sikandan egkezeeti ne ebpenhimetayan he kenè ne egkelizuwan, su iyan insuǥù te Nengazen ki Moises.

21 Dutun daan he timpu, midsurung ni Josue is menge kevuwazan ni Anak he meǥinged diyà te menge vuvungan te Hebron, Debir, Anab, wey is diyà te langun he menge vuntud he nesakup guntaan te Juda wey Israel. Midèdeetan ni Josue sikandan is langun ragkes is menge inged dan. 22 Wazà kevuwazan ni Anak he nesamà diyà te lugar te menge Israilihanen gawas te ziyà te Gaza, Gat, wey ziyà te Ashdod.

23 Umbe, migkuwa ni Josue heini is tivuuk he tanà su iyan heini insuǥù te Nengazen diyà te ki Moises. Impemeǥey zin heini he tanà diyà te menge Israilihanen su wey zan mepengevilin. Ne mibehinan dutun is kada tribu.

Ne zutun mibmelinew en haazà is tanà.