1 Is ikezuwa he neveǥayan te tanà pinaaǥi te kedripa iyan is menge pemilya te tribu ni Simeon. Is kandan he nepengevilin, diyà te teliwazà te tanà he imbeǥey ziyà te tribu ni Juda. 2 Neselakup kayi is Beersheba, Sheba, Molada, 3 Hazar Shual, Bala, Ezem, 4 Eltolad, Betul, Horma, 5 Ziklag, Bet Marcabot, Hazar Susa, 6 Bet Lebaot, wey Sharuhen: ne 13 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.

7 Iyan nekeuman kayi is Ain, Rimon, Eter, wey Ashan: ne 4 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged, 8 taman te Baalat Beer (he iyan is Rama) diyà te Negev.

Iyan heini nepengevilin te tribu ni Simeon he mibahin diyà te kada pemilya zan. 9 Is duma kayi ne kevahin te tanà he imbeǥey ziyà te tribu ni Juda su subra heini para kandan. Iyan heini hinungdan ke maan is diyà te seled te tanà te tribu ni Juda is bahin te tribu ni Simeon.

10 Is iketulu he mibehinan te tanà pinaaǥi te kedripa iyan is menge pemilya te tribu ni Zebulun.

Is dulunà te tanè dan ebpuun diyà te Sarid. 11 Ne puun te Sarid mibpehendiyà heini te edsenlepan pehendiyà en te Marala, te Dabeshet, ne midlaus diyà te zal-ug diyà te edsilaan te Jokneam. 12 Puun te zivaluy he vahin te Sarid, is dulunà kayi mibpehendiyà te edsilaan pehendiyà te zulunà te Kislot Tabor, pelaus diyà te Daberat wey te Jafia. 13 Puun dutun, mibpehendiyà heini te edsilaan te Gat Hefer, diyà te Et Kazin, wey te Rimon, ne mibulegkù heini ziyà te Nea.

14 Is dulunà te Zebulun diyà te zizaya nekevayà te Hanaton, ne midsangkù diyà te Suǥud te Ifta El. 15 Ne 12 he dezekelà he inged is nesakup te Zebulun, ne ebpekeuman kayi is dezeisey he menge inged diyà te peliǥuy kayi he menge inged. Nekeuman pa kayi is menge inged he Katat, Nahalal, Shimron, Idala, wey Betlehem. 16 Iyan heini menge inged wey zezeisey he menge inged he nezawat te tribu ni Zebulun, he mibahin diyà te kada pemilya zan.

17 Is ikeepat he mibehinan te tanà pinaaǥi te kedripa iyan is menge pemilya te tribu ni Isachar. 18 Iyan heini menge inged he nesakup dan: Jezreel, Kesulot, Shunem, 19 Hafaraim, Shion, Anaharat, 20 Rabit, Kishion, Ebez, 21 Remet, En Ganim, En Hada, wey Bet Pazez. 22 Is dulunà nekeuma ziyà te Tabor, diyà te Shahazuma, wey te Bet Shemesh, ne ziyà metaman te Wahig he Jordan: ne 16 he menge inged is nesakup te Isacar, ne ebpekeuman kayi is dezeisey he menge inged diyà te peliǥuy kayi he menge inged. 23 Iyan heini nepengevilin te tribu ni Isachar he mibahin diyà te kada pemilya zan.

24 Is ikelima he mibehinan te tanà pinaaǥi te kedripa iyan is menge pemilya te tribu ni Asher. 25 Iyan heini menge inged he nesakup dan:

Helkat, Hali, Beten, Acshaf, 26 Alamelec, Amad, wey Mishal. Is dulunà kayi ziyà te edsenlepan mibpuun te Carmel wey te Shihor Libnat. 27 Ne mibulegku heini ziyà te edsilaan pehendiyà te Bet Dagon ne nekeuma ziyà te Zebulun wey te Suǥud-suǥud te Ifta El. Ne mibpehendiyà heini te zizaya pehendiyà te Bet Emek wey Neil. Ne midlaus heini ziyà te zizaya pehendiyà te Cabul, 28 Ebron, Rehob, Hamon, Kana, taman te Zekelà he Sidon. 29 Ne mibulegku heini pehendiyà te Rama, ne midlaus heini ziyà te vinerengbeng he inged he Tyre, ne mibpehendiyà te Hosa, ne ziyà metaman te Daǥat he Mediteraneo. Is duma pa he menge inged he nesakup dan iyan is: Mahabal, Aczib, 30 Umma, Afek, wey Rehob: ne 22 langun he inged, ne ebpekeuman pa kayi is dezeisey he menge inged diyà te peliǥuy kayi he menge inged. 31 Iyan heini menge inged he nepengevilin te tribu ni Asher he mibahin diyà te kada pemilya zan.

32 Is ikeenem he mibehinan te tanà pinaaǥi te kedripa iyan is menge pemilya te tribu ni Naftali. 33 Is dulunè dan mibpuun te Helef wey te kayu he ulayan diyà te Zaananim, mibpehendiyà te Adami Nekeb wey Jabneel midlaus diyà te Lakum, ne ziyà metaman te Wahig he Jordan. 34 Puun dutun mibulegkù heini ziyà te edsenlepan, pehendiyà te Aznot Tabor, ne zutun mibpehendiyà te Hukok taman te dulunà te Zebulun diyà te zivavà, diyà te dulunà te Asher ziyà te edsenlepan, wey te Wahig he Jordan diyà te edsilaan. 35 Is duma he vinerengbeng he menge inged he nesakup kayi iyan is: Zidim, Zer, Hammat, Rakat, Kineret, 36 Adama, Rama, Hazor, 37 Kedesh, Edrei, En Hazor, 38 Iron, Migdal El, Horem, Bet Anat, wey Bet Shemesh: ne 19 langun he inged, ne ebpekeuman pa kayi is dezeisey he menge inged diyà te peliǥuy kayi he menge inged. 39 Iyan heini menge inged he nepengevilin te tribu ni Naftali, he mibahin diyà te kada pemilya zan.

40 Is ikepitu he mibehinan te tanà pinaaǥi te kedripa iyan is menge pemilya te tribu ni Dan. 41 Iyan heini menge inged he nesakup dan: Zora, Eshtaol, Ir Shemesh, 42 Shaalabin, Ayalon, Itla, 43 Elon, Timna, Ekron, 44 Elteke, Gibeton, Baalat, 45 Jehud, Bene Berak, Gat Rimon, 46 Me Jarkon, wey Rakon, wey is tanà atbang te Jopa. 47 Edlised is menge kevuwazan ni Dan te ked-aǥew zuen te tivuuk he tanà he imbahin kandan, umbe iyan dan dà dèpa midsurung is Leshem ne migerè dan is meǥinged kayi. Naaǥew zan heini ne zutun dan med-ubpà. Ne mid-ilisan dan is ngazan kayi he Leshem te Dan, he iyan ngazan te kepuun dan he si Dan.

48 Iyan heini menge inged he nepengevilin te tribu ni Dan, he mibahin diyà te kada pemilya zan.

49 Hein nepasad is kebehina zuen te tanà te menge Israilihanen, mibeǥayan dan si Josue he anak ni Nun, te kandin he vahin. 50 Midtuman dan is insuǥù te Nengazen, umbe imbeǥey zan kandin is inged he mibuyù din he iyan is Timnat Sera, diyà te vuvungan te Efraim. Mibangun din umana heini he inged ne mid-ubpà sikandin dutun. 51 Is mibahin duen te tanà iyan si Eleazar he memumuhat, si Josue he anak ni Nun, wey is menge pengulu te kada tribu ni Israel. Mibeelan dan heini pinaaǥi te kedripa ziyà te etuvangan te Nengazen diyà te Shilo, duen te ǥemawan te Tulda he Edtelevukaayan, ne nepasad dan en is kebahinbahin duen te tanà.