1 Duen ipag ni Naomi he si Boaz. Sepian si Boaz wey edlingahaan te menge etew zutun. Ne id-aǥew sikandin ni Elimelek, sikan is esawa ni Naomi. 2 Duen timpu he migkaǥi si Ruth diyà te ki Naomi te, “Tuǥuti a kenikew he edhendiyà a te menge perayan su wey a mekepekirarew te barli. Kela ke zuen etew he idtuǥut din kediey is kebpekirarew ziyà te perayan din.” Ne midtavak si Naomi te, “Uya, bayi, hendiyè ka.” 3 Ne midhendiyà si Ruth ne mibpekirarew ziyà te ubpu te perayan ni Boaz he id-aǥew ni Elimelek.

4 Ne netegteǥaad dutun, ne nekeuma si Boaz he ebpuun te Betlehem, “Ipata kew te Nengazen,” ke sikandin diyà te menge sakup din. Ne midtavak dan te, “Ipata ka zaan te Nengazen.” 5 Ne zutun mid-insà si Boaz diyà te impezumala zin te menge ebpemenraǥun te, “Hentei haazà is bahi?” 6 Ne midtavak sikan is impezumala te, “Iyan sikan is tig-Moab he vahi he miduma ki Naomi. 7 Nenanghid sikandin geina ke egkehimu he ebpekepekirarew zini. Midsayu sikandin medterebahu ne sikan pa medhimeley kayi te lawig.” 8 Ne zutun migkaǥi si Boaz diyà te ki Ruth te, “Bayi, pemineg ka te sambag ku kenikew. Kayi ke zà pekirarew te neipusan kayi te menge suluǥuen ku he vahi. Kenè ka awà kayi ne kenè ka zaan pekirarew ziyà te selakew he perayan. 9 Dini ke zà pen-ahà te rerawen te perayan ku he ebpenggeraven te menge sakup ku ne zini ka terebahu uvey te menge suluǥuen ku he vahi. Migkeǥiyan ku is menge sakup ku he kenè ke zan semuka. Ne emun egkemezahan ka, diyà ka inum te menge umuy he mibpemenù dan te wahig.”

10 Ne si Ruth, hein nezineg din haazà is migkaǥi ni Boaz, ne midluhud sikandin su iyan betasan dan te kedtahud, ke sikandin te, “Maan is egkehizuwan a wey edtevangan a kenikew is lumelengyawà dà dini te keniyu?” 11 Ne midtavak si Boaz te, “Geina te netudtulan a te langun he tavang nu te enuǥang nu puun dutun te timpu he minatey is esawa nu. Netuenan ku he mid-ewaan nu is amey nu wey iney nu wey inged nu ne mid-ulì ka kayi te kenami he kenè nu egkengekilala. 12 Berakat he suhuli ka te Nengazen tenged te meupiya he mid-ulaula nu. Berakat he utew lavew is kedtuvazi kenikew te Nengazen he Megbevayà he Megbevayà te Israel, su mid-aput ka zini te kandin.” 13 Ne ke si Ruth te, “Utew zekelà is hizu nu kediey. Inmeupiya utew te ǥehinawa ku is menge lalag nu he menayù, minsan pa te siak wazè e en mekerepeng te menge suluǥuen nu.”

14 Ne hein iyan en uras te kegkaan, migkaǥi si Boaz diyà te ki Ruth te, “He bayi, uvey ka kayi. Kaan ka te supas wey izehulit nu kayi te sukà.” Ne hein mibpinuu si Ruth duma te menge ebpemenerebahu mibeǥayan ni Boaz te midsandag he barli. Ne migkaan si Ruth ne hein nahantey en sikandin duen din pa samà. 15 Ne hein midlikuan din is baal zin, migkaǥi si Boaz diyà te menge sakup din, ke sikandin te, “Tuǥuti niw ke ebpekirarew sikandin minsan dutun te uvey te menge vinagkes. Kenè niw vensaǥi, 16 kekenà, kuwa kew te menge pungu zutun te vinagkes niw wey ituyù niw iulug wey zin mekuwa ne kenè niw sikandin dewaya.”

17 Ne mibpenigudu en dutun si Ruth is ebpekirarew taman te mahapun en. Ne hein migunas din is nekuwa zin, ne menge keluwaan he kilu he parey is ginunas din. 18 Ne zutun mibitbit din kes parey zin ne mid-ulì diyà te inged ne impeehè din te enuǥang din ke sengemenu kezekelà is nekuwa zin. Impeehè din daan haazà is samè din duen te midsandag he barli he wazè din mekaan, ne imbeǥey zin duen te enuǥang din. 19 Ne zutun mid-insà kandin si Naomi te, “Hendei ka mebpekirarew ǥeina? Hentei ki perayan is mibpekirerawan nu? Berakat he tuvazi te Megbevayà haazà is etew he nehizu kenikew!”

Ne zutun migkaǥi si Ruth he ziyà sikandin mebpekirarew te perayan te etew he migngezanan ki Boaz. 20 Ne ke si Naomi te, “Is Nengazen tew, ne kenè din egkelipatan is menge pesarig din dutun te nemematey en wey te menge uuyag pa. Berakat he tuvazi zin si Boaz. Haazà si Boaz, ne kezuzumahi ta; sevaha sikandin te menge etew he zuen dan ketenged te kebpemalu kayi te kenita.”

21 Ne migkaǥi zaan si Ruth te, “Ne kenà duen dà taman su migkeǥiyan e zin te, ‘Dini ke zà pekirarew he zuma te menge sakup ku taman te kenè dan pa ebpekepasad te ked-eǥani te parey ku.’ ” 22 Ne migkaǥi zutun si Naomi ziyà te ki Ruth te, “Deyzey iyan, bayi, ke ziyè ka pekirarew he zuma te menge suluǥuen din he vahi su emun diyè ka te senge perayan kela ke mepesipalahi ka.”

23 Ne tenged dutun, wazà si Ruth medhalin, kekenà, diyè dà sikandin mebpekirarew zuma te menge suluǥuen he vahi ni Boaz taman te wazè pa mepasad is ked-eǥani te barli wey trigu. Ne ziyà sikandin med-ubpà te valey te enuǥang din he si Naomi.