1 Yang kariko ng mga allang na yagapangintoo sang Almasi, dait na addatan nilan yang kanilan amo untak way makapaglaong ng maat makapantag sang Tohan kipat sang kanatun pyaga-indo. 2 Na, kong sawpama yang amo nilan yagapangintoo oman sang Almasi, dili ng madyaw kong di da nilan addatan kay maglomon silan sang pagpangintoo. Awgaid labi da na kinaanglan na dadayawon nilan yang gawbuk nilan kay yang tyabangan nilan yang sambok na lomon na dakowa sang pangatayan nilan. Indowi yang mga kalomonan sini na mga butang aw paglaonga silan na pangagadan nilan.

3 Yang sino-sino na tuna yang pyaga-indo nan na wa asobay sang bunna na indowan na yagasikun kang Isa Almasi na kanatun Tagallang aw wa oman asobay sang indowan makapantag sang pagpangagad sang Tohan, 4 na, yan na otaw ambogon aw way kyatigaman nan. Yamallini gaid yan somopak aw maglalis makapantag sang mga pyaglaongan. Yang idto yang pyagasikunan ng kasina, pagkabain-bain, pag-insolto aw pagpitna. 5 Yang mga otaw na abay gaid managlalis, waa day madyaw na dumduman nilan aw yagapakawat silan sang kabunnaan. Pagtoo nilan na ma-inang silan ng sapian pina-agi sang pagpangagad nilan sang Tohan.

6 Awgaid sang kabunnaan, dakowa yang kadyawan ng pagpangagad sang Tohan kong matigam kita manginsokor sang maskin ono na ini kanatun. 7 Kay sang pagkaotaw natun adi sining donya way dyaa natun, aw kong amatay da kita, way oman amadaa natun. 8 Agaw, kong aon kanatun pagkan aw mga dagom, amanginsokor da kita. 9 Awgaid yang mga otaw na yaganiyat na magkasapian, amadaa silan ng sasat. Amalitag silan ng maskin ono na kyallinian nilan na maat aw way siyat na idto yang amakasapad kanilan aw makadaa kanilan adto sang narka. 10 Kay yang pagpalabi ng sapi, yani yang pyagasikunan ng madaig na kaatan. Na, aon mga otaw na sabap sang pagpalabi nilan sang sapi kyawaan silan ng pagpangintoo aw madaig yang karidowan na yadatung kanilan.

11 Awgaid ikaw, kay Timotiyo, sabap ng sogowanun kaw ng Tohan, paglikay sini na mga butang. Pagpaningkamot na ma-inang mo yang matorid aw akapangagadan mo yang karim ng Tohan sang kariko ng wakto. Paningkamoti na mabagsug yang pagpangintoo mo aw aon looy mo sang kapag-onawa mo. Pagsabari yang mga kasikotan na madatung kammo aw dadayawa yang addat mo sang kariko ng mga otaw. 12 Mag-onawa ng yapaglomba ng daagan, dadayawa taman ng amagaga mo yang pagpangagad sang Tohan untak madawat mo yang kinabowi na way kataposan. Kay sang pagdawat ninyan pinili kaw ng Tohan sidtong wakto na yagalaong kaw sa adapan ng madaig na mga saksi na yagapangintoo da kaw sang Almasi. 13 Na, saksi yang Tohan na yan yang yaga-atag ng kinabowi sang kariko, aw saksi oman si Isa Almasi na yagalaong ng kabunnaan adto sa adapan ni Pontiyos Pilato, na yani yang towada ko kammo 14 na pangagadan mo yang mga sogowan na binilin ko kammo. Sigorowa na madyaw yang pagtoman mo sang kariko ninyan untak way ikasaway kammo sampay da sang pagbarik ni Isa Almasi na kanatun Tagallang. 15 Apabarikun yan adi sang donya sang wakto na pyagakahanda ng Tohan. Kay yan yang Tohan na labi na mabarakat aw sambok da yan na yagadato sang kariko. Yan yang Soltan na labaw sang kariko ng mga soltan aw yang Dato na labaw sang kariko ng mga dato. 16 Sambok da yan na di amatay aw iyan yan paga-uya sang bali na kasiga na way sino-sino na makadood sinyan. Way maskin isa na manosiya na yakakita kanan aw way maskin sino na makakita kanan. Kanan da yang kabantog aw kabarakat taman sa taman! Amin.

17 Adon, yang mga yagapangintoo sang Almasi na sapian adi sang donya, towadai silan na di silan magpataas ng ginawa nilan sabap sidtong kakawasaan nilan. Di silan dait somarig sang mga kakawasaan nilan kay yang idto madari gaid mawaa. Awgaid yang dait nilan sarigan yang Tohan na yan yang yaga-atag kanatun ng labi-labi na ridski aw kadyawan untak kita masowat. 18 Towadai silan na abay mag-inang ng madyaw untak magkawasa silan sang madyaw na mga inang. Aw paglaonga silan na magpangatag aw tomabang sang kadaigan na aon kasowat. 19 Kay kong maynan yang inangun nilan, makatiopon silan ng kakawasaan adto sa sorga na mag-onawa ng madyaw na pondasyon aw amakadawat silan ng kinabowi na way kataposan.

20 Kay Timotiyo, atimana ng madyaw yang bunna na indowan na syarig kammo ng Tohan. Paglikay sang mga pagbabaawon na way siyat aw di makatabang, aw pagpakawat sang mga panaglalis na pyagalaong ng kadaigan na yan kono yang bunna na katigam. 21 Kay aon kadaigan ansan kamayo na yang idto yang pyangagadan nilan, aw sabap sinyan biniyaan da nilan yang pagpangintoo nilan.

Na adon, kaoyan pa gao ng Tohan yang kariko mayo ansan.

Wassalam