Og tagnaꞌ Sulat ni
Jan
Og Piuna Taluꞌ paꞌali sog tagnaꞌ Sulat ni Jan
Si Jan, ion sala kotow sog sopuluꞌ bu duaꞌ sosuguꞌonanan ni Isukristu nog dinondag non mogustal paꞌali dianon. Ngon tolu buk sulat ni Jan nog pinoit non sog poktanudanan dia ni Isukristu. Mogulang na ion og kosulat non nog tolu buk sulatanan non koni.
Og tiganaꞌ sulat non koni, pinoit non dia sog glam nog gotowanan kituꞌ nog tinumud na dia ni Isukristu sog ainain nog bonuaanan. Sog tang koyon, modakol og gotowanan mikpanad nog diꞌ motud. Og duma, mikpoktaluꞌ ilan nog og Bataꞌ dow nog Mikpongon ondaꞌ solug nog glawas nog kilawan, otawaka ondaꞌ dow botaꞌoy nog sagyaotow, sugaꞌid non, tinumonaꞌ dow tibua ion dini sog glupaꞌan.
Dadi, pilogdong ni Jan bianan sog sulat non koni dia sog ain mingandol na dia ni Isukristu, nog si Isus, ion og tantu Bataꞌ nog Mikpongon, bu ion og tantu gotow dosop. Bu pidonsamaꞌ non dosop tumaluꞌ sog ain og mikokunut na dia ni Isus nog mogolig ilan tokodoy nog pikpanad nog duma gotowanan koyon nog diꞌ dumalan sog pikpanad nog miktidu dia ni Isukristu. Bu ondiꞌ ilan tokodoy tumud nog pikpanad nog gotowanan koyon nog diꞌ motud.
Sog sulat koni, mitampal dosop nog ain sinumalig na dia ni Isukristu, molalam dia sog Gamaꞌ nog Ion og Mikpongon, bu molalam dosop dia sog pakasiotow non.
1. Og bokna nog sulat koni, 1:1-4.
2. Og dolag bu og kodoloman, 1:5–2:29.
3. Og gombataꞌanan nog Mikpongon bu og gombataꞌanan ni Kindagow, 3:1-24.
4. Og motud bu og glopangan, 4:1-6.
5. Og polosukuꞌan nog ain molalam, 4:7-21.
6. Og kopomondag nog bianan sog kopongandol, 5:1-21.
1
Og Taluꞌ nog pitongow nog Mikpongon dianita
1 Sinumulat ami dianiu paꞌali sog Taluꞌ nog piktiduan nog kotubuꞌ nog donsamaꞌ na miongon tidu pa sog tolipunan. Og Taluꞌ koyon nog pogolongon nami, ion non ion og midongog nog dili tolinga nami, bu mitongow nog dili mata nami, bu mituyok nog dili komot nami, bu kitimaꞌanan nami. 2 Bu og piktiduan nog kotubuꞌ koni, linogdoy non og ginungod, bu mitongow nami ion. Dadi, tinoksiꞌan nami ion dianiu, nog ion og mogbogoy nog kotubuꞌ nog daꞌ kopus non. Sog donsamaꞌ pa, dia na ion sog Gamaꞌ ta nog Mikpongon, bu pitongow na dianami. 3 Saꞌan ituꞌ pikpulonag nami dianiu paꞌali sog mitongow nami, bu midongog nami kituꞌ, bagun amu mokopoksolabuk dianami, bu og kopoksolabuk ta koni bianan dia sog kosolabuk ta dia sog Gamaꞌ ta nog Mikpongon, bu dia sog Bataꞌ non nog si Isukristu. 4 Sinumulat ami ini dianiu bagun da motoktub og daꞌdaꞌan ta.
Og glangka nog gotow, ain sinumolabuk nadia sog Mikpongon
5 Og gustalan nog midongog nami dia ni Isukristu, ion non ini og pokpolotason nami koni dianiu nog, og Mikpongon, dianon og dolag. Daꞌidun nododaꞌ og dolom dianon. 6 Dadi, bila moktaluꞌ ita nog sinumolabuk ita na dia sog Mikpongon nog saka, og poginangon ta og kohinangan da dia sog kodoloman, og maꞌana non, migloput ita bu daꞌ ta longkaoy og motud. 7 Tibua, bila og poginangon ta og kohinangan nog dia sog kodolagan mamaꞌ non, nog ion dia sog dolag, mokopoksolabuk ita nog dumaanan ta bu kiugasan na og glam nog dusaanan ta nog duguꞌ ni Isus nog miglayas sog kudus, nog ion og Bataꞌ nog Mikpongon.
8 Bu bila moktaluꞌ ita nog daꞌidun dusa ta, piglimbungan ta og dili glawas ta, bu daꞌ ta tolimaꞌoy og motud. 9 Tibua, bila moglilaꞌ ita nog dusaanan ta dia sog Mikpongon, ompunan non ita sog glam nog dusaanan ta kituꞌ poꞌ ion kopongondolan bu diꞌ mogbigyaꞌ, bu ugasan non og glam nog kohinangan ta kituꞌ nog molaton. 10 Tibua, bila moktaluꞌ ita nog daꞌ ita pokodusa, og maꞌana non pingingloput ta og Mikpongon, bu daꞌ ta pa tolimaꞌoy og taluꞌ non.