1 GODAA hanqquwaa gatiman metuwaa be7ida asi tana. 2 I tana laaggi kessidi, poo7oi bainna xumau efiis. 3 I zaari zaaridikka gallassa muliyaa tana shocanau ba kushiyaa ta bollan denttiis. 4 I ta galbbaanne ta ashuwaa ceegissiis; ta meqettaakka menttiis. 5 I tana diriis; metuwaaninne daafuran i tana dooddiis. 6 Beni aidekko haiqqida asadan, tana xumaa giddon wottiis. 7 Taani kiyennaadan, ta yuushuwaa diriis; deexo sanssalatankka tana qachchiis. 8 Taani a xeegaas; akko waassinkka, i ta woosaa siyennan ixxiis. 9 Ta ogiyan masettida shuchchaa wottidi gorddiis; ta hemettiyoosaakka geellayiis.

10 I taayyo zuggiya maahiyaa mala, woikko qosettidi naagiya gaammuwaa mala gidiis. 11 I tana ta ogiyaappe kessi oliis; olidi duuterettiis. Yaatidi tana asi bainnasan yeggi bayiis.

12 Ba wonddafiyaa dafidi, tana dukkanau maliis. 13 I ba wonddafiyaa dafidi, ta wozanaa aifiyaa caddiis. 14 Taani asa ubbaassi miicciyoobaanne gallassa kumettaa boridi yexxiyoobaa gidaas. 15 I tana camuwan kunttiis; qassi godare uuttaadan cammiya xuu7aa ushshidi, tana kalissiis.

16 I ta achchaa anccuwan menttiis; buhiyaa giddon i tana yedhdhiis. 17 Saroi taappe haakkiis; ufaissaakka taani dogaas. 18 Hegaa gishshau, taani, “Ta wolqqai taappe kichchiis; taani GODAN hidootaa wottidobai ubbaikka xayiis” yaagaas. 19 Ta metuwaanne taani toilattiyoogaa hassayin, de7oi tana cammiis. 20 Hegee taani mulekka dogennabaanne ta shemppoikka azzaniyoobaa.

21 Gidikkonne, taani ha issibaa ta wozanan qoppiyo wode, taayyo sinttanau hidootai de7ees. 22 Hegeenne, GODAA aggenna siiquwaappe denddidaagan nuuni xayibookko. A qaretaikka mule wuri erenna; 23 eti maallado maallado ooratta. Neeni keehippe ammanettiyaagaa. 24 Taani taayyo, “GODAI tana gakkida saama; hegaa gishshau, taani an hidootaa wottais” yaagaas.

25 Bantta hidootaa an wottiyaageetussinne a koyiyaageetussi GODAI lo77o. 26 Hegaa gishshau, asi GODAI ashshiyo ashettaa danddayan naagikko lo77o. 27 Qassi asi ba yelagatettan de7iiddi, danddayaa tamaarikko lo77o.

28 GODAI metuwaa ehiyo wode, i co77u giidi, barkka utti aggo. 29 I ba som77uwaa biittaa gattidi ziggo. Ooni erii, au sinttanau hidootai de7anaakkonne. 30 I ba qinxxalliyaa baqqiyaagaassi besso; ba morkketi cayiyo cashshaakka kallo.

31 Aissi giikko, Godai asa merinau olidi aggenna; 32 issi wode azzanuwaa ehiikkonne, i ba aggenna siiquwaa daruwaadan qarettees. 33 Aissi giikko, i asa tuggayiyoogaaninne metoyiyoogan ufaittenna.

34 A asaa kaalettiyaageeti qashettidaageeta bantta gediyaappe garssa baggaara yedhdhidosona; 35 qassi Ubbaappe Xoqqiya Xoossaa sinttan asassi de7iya maataa diggoosona; 36 qassikka shilootan pirddaa geellayoosona. Eti Godai hegaa ubbaa be7enna giidi qoppiyoonaayye?

37 Godai azazibeennaagaa azazidi, polissanau danddayiyai oonee? 38 Iitabaa gidin lo77obaa gidinkka, haasayidi poliyaagee Ubbaappe Xoqqiya Xoossaa gidenneeyye? 39 Yaatin, nuuni asa gidiyaageeti nu nagaraa gishshau, i nuna qaxxayiyo wode, aibissi zuuzummiyoo?

40 Hegaa aggidi, ane nu ogiyaa paaccoosinne qoroos; GODAAKKO ane simmoos. 41 Ane nu wozanaanne nu kushiyaa saluwan de7iya Xoossaakko denttidi, hagaadan yaagoos; 42 “Nuuni nena naaqqida; neeyyo makkalida; neenikka nuuyyo atto gabaakka. 43 Ne maaarotettaikka ne hanqquwan kamettiis; qassi neeni nuussi qarettennan nuna siifadasa. 44 Nu woosai neekko kanttennaadan, ne huuphiyaa shaaran kammadasa. 45 Asaa giddon nuna pitonne buura oottadasa. 46 Nu morkketi ubbai nu bollan haasayidosona. 47 Nuuni dagammidanne gitiyan gelida; bayidanne xayida” yaagoos.

48 Ta asai metuwan xayido gishshau, ta aifee shaafaadan afuttaa goggees. 49-50 Ta aifee GODAI saluwaappe duge xeellidi be7ana gakkanaashin, mule wode aggennan afuttaa tigees. 51 Ta kataman de7iya maccaasatu ubbaa bollan gakkidabaa ta aifee be7ido wode, ta wozanai azzaniis.

52 Coo tana morkkiyaageeti tana kafuwaa shankkatiyoogaadan shankkatidosona. 53 Eti tana paxa de7ishin ollan yeggidi, ollaa doonaa shuchchan gorddidosona. 54 Haattai kumidi, ta huuphiyaara goggiyo wode, taani xayaas gaada qoppaas.

55 Abeet GODAU, taani ciimma ollaa giddon de7aidda ne sunttaa xeegaas. 56 Ta waasuwaa siyanaadan taani nena woossiyo wode, neeni taayyo siyadasa. 57 Taani nena xeesido wode, taakko shiiqada, “Yayyoppa” yaagadasa. 58 Abeet Godau, neeni ta mootuwaa mootettada, tana wozadasa. 59 Abeet GODAU, neeni ta tuggaa be7adasa. Hegaa gishshau, ta mootuwaa neeni pirdda. 60 Eti haluwaa kessanau ta bollan maqettiyo maqquwaa ubbaa be7adasa. 61 Abeet GODAU, eti tana cayiyo cashshaanne ta bollan maqettiyo maqquwaa ubbaa siyadasa. 62 Qassi ta morkketi gallassa kumettaa ta bollan zuuzummiyoogaanne saasukkiyoogaa siyadasa. 63 Be7a, eti uttiiddinne eqqiiddi, tana bori boridi yexxoosona.

64 Abeet GODAU, eti oottido oosuwaassi bessiya waagaa etau qanxxa! 65 Eta wozanaa dammetta! Ne qanggettai eta gakko! 66 Abeet GODAU, neeni eta ne hanqquwan yedettada, ne salotuppe garssaara eti de7iyoosaappe eta xaissa!