1 “Êndêŋ taŋ Apômtau, aômnêm Anôtô, êwê aôm ô lasê gamêŋ, taŋ galoc kopeŋ gômoa naŋ, gebe ôwê kaiŋ êtu aômnêm gamêŋ naŋ, eŋ oc êjanda lau tomôkê-tomôkê êmuŋ aôm. Eŋ êjanda lau-m 7, taŋ nêŋ namba to ŋaclai kêlêlêc aômnêm su naŋ, lau Het to Girgas ma Amor to Kanaan ma Peres to Hib ma Jebus. 2 Ma êndêŋ taŋ Apômtau, aômnêm Anôtô, êkêŋ êsêac sêsêp aôm lêmam ma aôm ôku êsêac tulu naŋ, onseŋ êsêac su samucgeŋ sênaŋa. Ômoatiŋ poac ôwiŋ êsêac to taêm walô êsêac atomanô. 3 Ômansaŋ biŋ awê to ŋac sênam tauŋŋa ôwiŋ êsêac atom. Ôkêŋ latômio sênam êsêac latuŋi atom to ôkôc êsêac latuŋio sênam aôm latômi atom. 4 Gebe êsêac oc sênam latômi ôkwi e sêndaŋguc aê êtiam atom ma sênam sakiŋ anôtôi jaba. Embe amboac tonaŋ, go Apômtau têtac ŋandaŋ êsa êndêŋ amac e enseŋ amac su anaŋa sebeŋ. 5 Aŋgôm êsêac amboac tonec gebe anseŋ nêŋ altar su to atuc nêŋ alêpoc popoc ma asap nêŋ gwam tulu to akêŋ nêŋ anôtôi jaba nêŋ ŋakatu êsa ja êniŋ su.

6 “Gebe amac atu Apômtau, amacnêm Anôtô, nê lau dabuŋ. Apômtau, amacnêm Anôtô, kêjaliŋ amac sa aŋga lau tomôkê-tomôkê nomŋa samob, gebe atu eŋ taugeŋ nê lau. 7 Apômtau têtac gêwiŋ amac to kêjaliŋ amac sa kêtu nêm namba kapôêŋ kêlêlêc lau-m ŋagêdô nêŋ suŋa nec atom. Masi, amacnêm namba sauŋanô kêlêlêc lau tomôkê-tomôkê samob nêŋ su. 8 Apômtau gêwê amac ŋa lêma ŋajaŋa asa amêŋ ma kêgaboac amac su aŋga andu kapoacwalôŋa to aŋga kiŋ Aiguptuŋa Parao lêma, gebe eŋ têtac gêwiŋ amac ma gêgôm biŋ, taŋ kêtôc lêma gêdêŋ amac tamemi naŋ, ŋanô kêsa. 9 Amboac tonaŋ ajala gebe Apômtau, amacnêm Anôtô, eŋ Anôtô ŋanô. Eŋ Anôtô ŋaŋêŋ, taŋ kêsap nê poac tôŋ ma têtac gêwiŋ êsêac, taŋ têntac gêwiŋ eŋ ma sêmansaŋ ênê biŋsu naŋ, oc êmoasiŋ êsêac gôlôac to gôlôac ŋêŋgeŋ êna. 10 Mago Anôtô êkêŋ ŋagêjô êndêŋ êsêac, taŋ têntac gedec eŋ naŋ, êpi êsêac tauŋ ôliŋ ma enseŋ êsêac su. Eŋ ê lau, taŋ têntac gedec eŋ naŋ, nêŋ biŋ tôŋ atom. Masigoc, êkêŋ ŋagêjô êpi êsêac tauŋ ôliŋ solopgeŋ. 11 Amboac tonaŋ ôŋgôm biŋsu to ŋagôliŋ ma jatu, taŋ galoc kajatu aôm naŋ, ŋanô êsamaŋ.

12 “Aŋô to aŋgôm ŋagôliŋ tonaŋ ŋanô êsa, ma Apômtau, amacnêm Anôtô, êsap poac tau tôŋ to têtac êwiŋ amac êtôm kêtôc lêma gêdêŋ tamemi. 13 Eŋ oc têtac êwiŋ aôm ma ênam mec aôm to êŋgôm aôm ôtu taêsam. Eŋ ênam mec aôm ôlim ŋaŋanô to nêm nom ŋanô amboac polom to wain ma katêkwi. Eŋ ênam mec nêm bulimakao têtu taêsam to domba ŋalatu amboac tonaŋ. Eŋ êŋgôm gêŋ tau aŋga gamêŋ, taŋ kêtôc lêma gêdêŋ tamami, gebe êkêŋ êndêŋ aôm naŋ. 14 Eŋ ênam mec aôm êlêlêc lau-m ŋagêdô samob su. Nêm ŋacwaga samob sêka gôlôac lasê to nêm lauo kapoac teŋ sêmoa atom. Ma nêm bulimakao samob sêsu ŋalatu amboac tonaŋgeŋ. 15 Apômtau gebe êmbalaŋ gêmac tokaiŋ-tokaiŋ auc êndêŋ aôm ma lau Aiguptu nêŋ gêmac, taŋ ajala kêtu tôŋ naŋ, ŋateŋ êtap aôm sa atom. Ma Apômtau ênac lau samob, taŋ têntac gedec aôm naŋ, ŋa gêmac tau tonaŋ. 16 Aôm onseŋ lau-m samob, taŋ Apômtau, aômnêm Anôtô, êkêŋ êsêp aôm lêmam naŋ, su. Taêm walô êsêac atom to ônam sakiŋ nêŋ anôtôi atom amboac tonaŋgeŋ, gebe oc êtu lakô ênac aômŋa.

17 “Aôm moae ôsôm êndêŋ taôm gebe ‘Lau-m tonec nêŋ namba kêlêlêc aêŋoc su, oc jajanda êsêac amboac ondocgeŋ.’ 18 Ôtêc êsêac atom. Taêm ênam gêŋ, taŋ Apômtau, aômnêm Anôtô, gêgôm gêdêŋ Parao to gamêŋ Aiguptuŋa samucgeŋ naŋ. 19 Taêm ênam gêŋwapac to gêŋsêga ma gêŋtalô, taŋ matamanô gôlic naŋ, ma taêm ênam Apômtau, aômnêm Anôtô, lêma ŋajaŋa, taŋ kêmêtôc ma gêwê aôm kôsa gômôêŋ naŋ. Apômtau, aômnêm Anôtô, oc êŋgôm lau-m samob, taŋ aôm kôtêc êsêac naŋ, êtôm tonaŋ. 20 Ma eŋ êŋgôm gêŋ teŋ êlêlêc su êwiŋ, eŋ êsakiŋ banic kapôêŋ-kapôêŋ êndêŋ êsêac e enseŋ lau ŋapopoc, taŋ gacgeŋ sêmoa to sêsiŋ tauŋ êndêŋ aôm naŋ, su amboac tonaŋgeŋ. 21 Ôtêc êsêac atom, gebe Apômtau, aômnêm Anôtô, gêmoa aôm ŋalêlôm. Eŋ Anôtô kapôêŋ ma kaiŋ teŋ. 22 Ma Apômtau, aômnêm Anôtô, oc êtiŋ lau-m tonaŋ su malô-malô êmuŋ aôm. Aôm oc ôtôm gebe onseŋ êsêac su sep tageŋ atom. Embe ôŋgôm, oc bôc saleŋŋa têtu taêsam ma sêkêŋ wapac aôm. 23 Mago Apômtau, aômnêm Anôtô, oc êkêŋ êsêac sêsêp aôm lêmam ma êlênsôŋ êsêac e nêŋ meloco êsa ma sênaŋa. 24 Eŋ oc êkêŋ êsêacnêŋ kiŋ sêsêp aôm lêmam ma aôm onseŋ êsêacnêŋ ŋaê su aŋga nom. Ŋac teŋ êtôm gebe êkô aôm auc atom e onseŋ êsêac samob su. 25 Ôkêŋ êsêacnêŋ anôtôi gwam ja êniŋ su. Matam katu silber to gold, taŋ kêtu ŋakatu tau ŋagêlôŋ naŋ, ma ôkôc su atom, gebe oc êtu lakô ênac aômŋa, gebe Apômtau, aômnêm Anôtô, gêlic gêŋ tonaŋ amboac gêŋ alôb-alôb. 26 Ôkêŋ gêŋ alôb-alôb êsô nêm andu êna atom. Apômtau kêpuc boa gêŋ tau ma eŋ oc êpuc boa aôm amboac tonaŋgeŋ. Ôlic gêŋ tau amboac gêŋ ŋatêmui to alôb-alôb, gebe Apômtau kêpuc boa gêŋ tau su.