JAKOBONÊ papia
Jakobonê papia nec ŋac tau gêjac lau buŋa nêŋ kôm to nêŋ lêŋ ŋagôliŋ gwalêkiŋ sa. Eŋ keto biŋ tau gêjac gôlôac tapaôŋgeŋ ŋawae kêtôm eŋ awa gêjac Anôtônê lau, taŋ sêŋg ŋ kêsi-k sigeŋ aŋga nom ŋagamêŋ samob naŋ. Ŋac-ketowaga gebe epeŋ lau buŋa nêŋ kauc lasê êpi nêŋ ŋalêlôm to nêŋ lêŋ, taŋ gêjac êsêac ŋawae naŋ, tec kêwaka nê ŋagôliŋ sa keto ŋalô totau-totau gêjam dani ma keto biŋgôliŋ to ŋadôŋdôŋ gêwiŋ-gêwiŋ e ŋam gêc awê ŋajam. Lau buŋa nêŋ ŋagôliŋ tonaŋ kêkwa biŋ tonec ŋai gebe lau tolêlôm to lau ŋalêlôm sawa ma lêtôm to lêŋ mansaŋ ma tatu kasec to takêŋ êwiŋ ma daŋgôm ŋanô êsaŋa to tajop imbeleŋ ma mêtê tokauc to biŋkalom ma teŋbeleŋ aêgeŋ to dambu tauŋŋa ma tatoc tauŋ sa to daê biŋ tôŋ ma tapuc tauŋ tôŋŋa to tateŋ mec.
Jakobo keto papia tonec kêkac lau buŋa ŋajaŋageŋ gebe daŋgôm Mêtê ŋanô êsa, ec dawa nêŋ takêŋ gêwiŋ sa ŋa nêŋ lêŋ to nêŋ koleŋ ênêc awê êndêŋ lau sêlic êpi mateŋanô.
Ŋadênaŋ
1. Gêjac m nê papia 1:1
2. Takêŋ gêwiŋ to tajala biŋŋa 1:2-8
3. Lau ŋalêlôm sawa to lau tolêlôm 1:9-11
4. Saê to lêntôm 1:12-18
5. Taŋô mêtê ma gacgeŋ daŋgôm ŋanô êsa 1:19-27
6. Tapuc lau ŋam atom 2:1-13
7. Takêŋ gêwiŋ gêjac ŋakoleŋ ŋawae 2:14-26
8. Tajop imbeleŋ ŋapepŋa 3:1-18
9. Tajop tauŋ êndêŋ mateŋ katu gêŋ nomŋaŋa 4:1–5:6
10. Ŋagôliŋ toê-toê ŋagêdô 5:7-20
1
Jakobo awa gêjac lau
1 Anôtô agêc Apômtau Jesu Kilisi nêŋ sakiŋwaga aê, Jakobo, aoc gêjac gôlôac 12, taŋ sêŋgôŋ kêsi-kêsigeŋ aŋga nom ŋagamêŋ samob naŋ.
Biŋ kêpi takêŋ gêwiŋ to tajala biŋŋa
2 O ŋoc lasitêwaac, Iêtôm tokaiŋtokaiŋ embe êtap amac sa, go alic amboac gêŋ têmtac ŋajam ŋa teŋ. 3 Amac ajalagac gebe gêŋ, taŋ kêsaê amacnêm akêŋ gêwiŋ naŋ, gêgôm amac aôc gêŋwapac totêmtac kêpa sugeŋ. 4 Aôc gêŋwapac totêmtac kêpa sugeŋ tau ênam ŋanô amboac tonec gebe ênac dabiŋ amac e atu kwalam laŋgwa ma apô lêna gêŋ teŋ atom, 5 mago amacnêm teŋ embe êpô lêna kauc mêtêŋa, naŋ eteŋ êndêŋ Anôtô ma êkêŋ êndêŋ eŋ, gebe Anôtô kêkêŋ gêŋ gêdêŋ lau samob totêtac wapômgeŋ ma kêgamiŋ teŋ atom. 6 Mago ŋac tau eteŋ toêkêŋ êwiŋgeŋ, eteŋ totêtac lulu atom, gebe ŋac-têtac-luluwaga kêtôm gwêc ŋadembom, taŋ mu gêli sa e ŋakotoŋ-kotoŋ kêsa naŋ. 7 Ŋac amboac tonaŋ taê êka gebe êkôc gêŋ teŋ aŋga Apômtaunê atom. 8 Eŋ ŋac ŋalêlôm-gêja-luwaga ma kêsa nê lêŋ samob lulusawa.
Lau ŋalêlôm sawa to lau tolêlôm
9 Lasimi ŋalêlôm sawa êlanem tau gebe Anôtô ketoc eŋ sa. 10 Ma ŋac tolêlôm êlanem tau êtu Anôtô kêkôniŋ eŋŋa, gebe eŋ oc ênaŋa êtôm gêgwaŋ ŋaola. 11 Oc kêpi toŋandaŋgeŋ ma kêsêgô gêgwaŋ e ŋaola kêsêlô ma talic ŋakatu masi. Ŋac tolêlôm amboac tonaŋ. Eŋ ênaŋa aŋga nê kôm ŋaluŋgeŋ.
Saê to letôm
12 Aê aoc êôc ŋac, taŋ gêôc saê totêtac kêpa sugeŋ. Eŋ êwaka tau sa su acgom, go êkôc êŋgôŋ mata jali ŋasunsuŋ, taŋ Anôtô gêjac mata gêdêŋ lau-têntac-gêwiŋ-eŋwaga naŋ. 13 Ŋac teŋ embe lêtôm êtap eŋ sa, naŋ êsôm gebe “Lêtôm tonec aŋga Anôtônê” nec atom. Sec kêtôm gebe êlêtôm Anôtô atom. Ma Anôtô tau kêlêtôm ŋamalac teŋ atom. 14 Lêtôm ŋam kêsêp ŋamalac tau nê têtac kalac, taŋ kêkac to kêlêtôm eŋ naŋ. 15 Têtac kalac embe taê, go êsu ŋalatu sec. Sec tau embe ênac dabiŋ tau su, go êsu ŋalatu gêmacanô.
16 O ŋoc lasitêwaace, êkêli taôm atom. 17 Gêŋ ŋajam samob, taŋ sêkêŋ gêdêŋ amac to gêŋ ŋanô samob, taŋ atap sa naŋ, gêmêŋ aŋga lôlôc. Gêŋ tau kêsêp gêmêŋ aŋga ŋawê ŋataunê. Eŋ gêjam tau ôkwi atom ma eŋ gêjam kanuc atom amboac tonaŋgeŋ. 18 Eŋ taê gêjam kêtu tôŋ, tec kêkêŋ nê biŋŋanô kêka aêac lasê gebe tatu gêŋ samob, taŋ eŋ kêkêŋ naŋ ŋaŋamata.
Taŋô mêtê to daŋgôm ŋanô êsa
19 O ŋoc lasitêwaace, taêm ênam biŋ tonec gebe ŋamalac samob sêŋô biŋ ŋagaôgeŋ acgom, ma sêsôm biŋ malô-malôgeŋ to têntac ŋandaŋ sebeŋ-sebeŋ atom amboac tonaŋgeŋ, 20 gebe ŋamalacnêŋ têntac ŋandaŋ gêjam Anôtônê biŋgêdêŋ sa atom. 21 Amboac tonaŋ akac ŋatêmui to sec totau-totau su ma akôc mêtê, taŋ Anôtô kêsê kêsêp amacnêm ŋalêlôm naŋ sa. Mêtê tonaŋ kêtôm gebe ênam amac katôm kêsi, tec akôc sa tonêm ŋalêlôm malôgeŋ.
22 Embe aŋô mêtê ŋaômageŋ, oc ansau taôm, aŋgôm mêtê tau ŋanô êsa acgom. 23 Ŋac teŋ embe êŋô mêtê ŋaômageŋ ma êŋgôm ŋanô êsa atom, naŋ êtôm ŋac, taŋ kêsala laŋôanô kêsêp tasalakatu naŋ. 24 Eŋ kêsala tau su, go gec gêja ma kêliŋ laŋôanô ŋakatu siŋ sebeŋ. 25 Mago ŋac, taŋ êtuc kêniŋ êsêp biŋsu ŋanô tau, taŋ kêgaboac aêac su naŋ, ma êsô ŋalabu êmoa to êŋô biŋ e êliŋ siŋ êtiam atom, êŋgôm ŋanô êsa naŋ, Anôtô oc ênam mec ênê kôm samob.
26 Ŋac teŋ embe taê ênam gebe ênam sakiŋ Anôtô, mago ênam gôliŋ imbêla atom, oc ênsau tau ma nê sakiŋ Anôtôŋa êtu gêŋ ŋaôma. 27 Sakiŋ ŋawa to mansaŋ, taŋ Tameŋi Anôtô gêlic gêjac mataanô ŋajam naŋ tonec gebe tanac mosêbu to awêtuc, taŋ sêmoa jageo naŋ, kêsi to taŋgamiŋ tauŋ êndêŋ geŋ ŋatêmui nomŋa.