11
Manga nɛnɛn Dawuda bɔnsɔnni
1 Dii xɛmɛn minima nɛn Yese bɔnsɔnni* Yese nan Dawuda fafe ra. Na sɛbɛxi Samuyɛli Singena 16.18-19 kui.
alo wudi ɲingin minima
wudi dungin ma kii naxan yi.
Na sabatima nɛn fata a salenne ra.
2 Alatalaa Nii Sariɲanxin luma nɛn a yi,
fe kolonna nun xaxilimayaan sɔtɔma niin naxan xɔn,
kawandi kɛndɛn nun sɛnbɛn sɔtɔma niin naxan xɔn,
Alatala kolonna nun a yɛɛragaxun sɔtɔn niin naxan xɔn.
3 A niin sama nɛn Alatala yɛɛragaxun fari.
A mi kitin sama yɛtagin ma.
A mi feene ragidima muxune fala xuiin xɔn.
4 Koni a sɛnbɛtarene makitima nɛn tinxinni.
Yiigelitɔɔn naxanye yamanani,
a yi ne feene ragidi ɲɛnige faɲini.
A yamanan muxune garinma nɛn falan na
alo bosana.
A fala xuine yi muxu ɲaxine faxa.
5 Tinxinyaan nun tɔgɔndiyaan luma nɛn a yi
alo tagi xidin muxun tagi waxatin birin.
6 Nayi, kankon nun yɛxɛɛ diin luma nɛn e bode xɔn,
burunna ɲarin nun siin yi e sa yire kedenni,
turadin nun yatan nun xuruse turaxin yi lu e bode xɔn,
diidina nde yi ti e yɛɛ ra.
7 Ɲinge gilɛn nun kanko gbeena e dɛgema nɛn,
e diine yi sa e sa yire kedenni.
Yatan yi sɛxɛn don alo ɲingena.
8 Dii ɲɔrɛn sabaan soma nɛn saɲin soden dɛxɔn,
diin yi nɔ a yiin nasoɛ koson yinla ra.
9 Fe ɲaxi mi fa luma na, gbalo mi na
Alatalaa geya sariɲanxin birin fari.
Amasɔtɔ Alatala kolonna yamanan nafema nɛn,
alo fɔxɔ igena a folon nafema kii naxan yi.
10 Na lɔxɔni,
diin naxan minixi Yese bɔnsɔnni
na luma tixi nɛn
alo taxamasenna yamane yɛɛ ra.
Siyane fama nɛn a fɛma,
a dɔxɔden yi lu mayilenɲɛ binyeni.
Muxu suxine xɛtɛ fena
11 Na lɔxɔni,
Marigin mɔn a yiini bandunma nɛn
alogo a xa a yamaan muxu dɔnxɛne xunba:
naxanye na lu e nii ra Asiriya yamanani
e nun Misiran yamanan lanbanna nun a faxan na,
e nun Kusi nun Elan nun Babilɔn yamanane yi,
e nun Xamata yamanan nun fɔxɔ ige tagi bɔxɔne yi.
12 A taxamasenna tima nɛn siyane xa,
a Isirayila kaane malan
naxanye yi suxi yɛngɛni.
Yuda bɔnsɔnna muxun naxanye xuyaxi ayi
dunuɲa xun xɔn, a yi ne malan
sa keli bɔxɔn tongon naaninne birin yi.
13 Nayi,
Efirami bɔnsɔnna mi fa Yuda bɔnsɔnna maxɔxɔlɔnma.
Yuda bɔnsɔnna yaxune raxɔrima nɛn,
Efirami mi fa Yuda maxɔxɔlɔnma,
Yuda mi fa findima Efirami yaxun na sɔnɔn.
14 E birin sigama nɛn yɛngɛni
sogegododen binni Filisitine geyane fari,
e sa sogeteden binna muxune nafunle tongo yɛngɛni.
Edɔn nun Moyaba yamanane yi lu e sɛnbɛn bun,
Amonine yi xuru e ma.
15 Alatala igen ɲanma nɛn Misiran fɔxɔ ige yireni,
a yi a yiini bandun Efirati baan xun ma,
a yi na baani taxun xude solofere ra
a dɛ foye gbeen na,
muxune yi nɔ a gidɛ,
e mi e sankidine ba.
16 Kiraan luma nɛn a yamaan xa
naxanye na lu e nii ra Asiriya yamanani.
A luma nɛn alo a liga e benbane xa kii naxan yi
e to mini Misiran yamanani.