1 A mato, mangana nde mangayaan nabama nɛn tinxinni,

kuntigine yi kuntigiyaan liga kiti kɛndɛn xɔn.

2 E muxune birin luma nɛn

alo yigiyaden foyen bun

alo luxunden kala ti foyen bun,

alo igena kiraan tonbonni,

alo gɛmɛ gbeen nininna bɔxɔ yixareni.

3 Yɛɛ kanne yɛɛne mi fa luma raxixi,

tuli kanne yi e tuli mati.

4 Muxun naxanye xaxili mi dɔxi,

ne xaxinla nun kolonna sɔtɔma nɛn,

dɛ masuxune yi falan ti a tinxinni e dɛ mafuraxin na.

5 Nayi, a mi fa falama xaxilitarene ma a xaxilimane,

fe ɲaxi rabane mi fa yatɛma muxu gbeene ra.

6 Amasɔtɔ xaxilitaren xaxilitareya falan nan tima.

E hakɛ feene yitɔnma e bɔɲɛni,

e lu Ala kolontareya wanle kɛ,

e lu fala ɲaxine tiyɛ Alatala ma.

E kamɛtɔne luma kamɛn na,

min xɔnla naxan ma,

e na kuma igeni.

7 Fe ɲaxi rabane wanle ɲaxu.

E fe ɲaxine yitɔnma

alogo e xa yiigelitɔne halagi wulene xɔn,

hali yoon tɔrɔ muxune xa e kitini.

8 Koni muxu faɲine fe faɲine nan yitɔnma

e yi lu e ɲɛnige faɲiyani.

9 Ɛ tan ɲaxanla naxanye luxi xaxili sani,

ɛ keli, ɛ tuli mati n na!

Ɛ tan sungutunna naxanye xaxili ragidixi feu,

ɛ tuli mati n ma falan na!

10 Benun ɲɛɛ keden e nun nde,

ɛ tan naxanye xaxili ragidixi,

ɛ yimaxama nɛn,

bayo se bogi bolon daxine ɲanma nɛn,

sansi xaba daxine yi dasa se xaba waxatini.

11 Nayi, ɛ gaxu,

ɛ tan ɲaxanla naxanye xaxili sani,

ɛ kɔntɔfili, ɛ tan sungutunna naxanye xaxili ragidixi.

Ɛ dugine ba ɛ ma,

ɛ yi kasa bɛnbɛli dugine xidi ɛ tagi sununi.

12 Ɛ kanken makudun, ɛ wuga

xɛɛ tofaɲine nun manpa bili sabatixine fe ra,

13 e nun n ma yamana bɔxɔna,

firin ɲali kanne nun tansinne bata sabati dɛnaxan yi.

Ɛ wuga banxi faɲine fe ra

sɛwan yi dɛnaxanye yi

e nun sumunna yi taan naxan yi yɛyɛ.

14 Amasɔtɔ manga banxin nabeɲinma nɛn,

taa yimaxaxini ito yigelima nɛn,

a yire makantanxine nun sangansone yi findi

banxi xɔnne ra han habadan,

e nun burunna sofanle magidena,

e nun xuruseene dɛ madondena,

15 han Alaa Nii Sariɲanxin yi godo nxu ma keli kore,

tonbonna yi findi wudi bili nakɔɔn na,

wudi bili nakɔɔn yi findi fɔtɔnna ra.

16 Nayi, kiti kɛndɛn luma nɛn tonbonni,

tinxinna yi lu wudi bili nakɔni.

17 Tinxinyaan yi bɔɲɛ xunbenla raso.

Tinxinyaan tɔnɔn yi findi sabarin nun makantanna ra habadan.

18 N ma yamaan dɔxɔma nɛn bɔɲɛ xunbeli yireni,

dɔxɔde makantanxine yi,

matabu faɲin dɛnaxanye yi.

19 Hali balabalan kɛsɛne fɔtɔnna kalama nɛn,

taan mumɛɛn yi fɔn,

20 sɛwan luma nɛn ɛ tan xa.

Ɛ tan ɛ sansine sima nɛn xudene birin dɛ,

ɛ yi ɛ ɲingene nun sofanle lu e sagoni.