1-2 Akka nõko Ifo Jesucristo anã fotofaino nã Ifofaafo tii akiki nokoxikani afe ipaxakakĩ. Nãskafekẽ fetsafãfe mato parapaikani iskafakakĩ: “Jesús mã oxõ a inõpokoaifo keskara ea tãpimana,” ixõ mato yoikani. Nãskatari fetsafãferi mato yoikĩ iskafakani: “Mã nõ nika Jesús mã oa,” ixõ mato yoiaifono, fetsafãferi yoikĩ iskafakani: “Pablo noko kirika kenexõ fema, ‘Jesús mã oa,’ ” ixõ mato yoipaikani, ãa chanĩkakĩ. Nãskakẽ rateyamakãfe. Ẽ mato yoinõ. Jesús oaino nã Ifofaafo afe ichanãxikani, nãskax afe ipanakafo. Akka mato yoisharapaiyaito nikasharakãfe. 3 Nã chanĩmisfo ato nikayamakãfe. Jesús oyoamano keyokõichi Epa Niospa meka kachikiri fakani anã nikaxikakima. Nãskakanax nikayospakõi ixikani. Nãskaifono a feronãfake chakafinakõia oxii. Nãato a Niospa yoini keskara nikakaspakõimis. Nãato Satanás ifofakõimis. Askafiax chipo a omiskõipakenakafo mẽra kaxii. 4 Akka a feronãfãke niyoxõ iskafakĩ yoixii: “Ẽ keyokõi finõa. ‘Na nõko Niosra’ ixõ mã kĩfimis, nãri ẽ finõa. Akai Niosma,” ixõ ato yoita, nã Nios kĩfiti pexefã mẽra ikikaixõ ato yoixii iskafakĩ: “Afaa fetsa kĩfiyamakãfe. Askatari afaa fetsari noiyamakãfe. Ẽfi Nioski,” ixõ ato pãraxii.

5 Akka, ¿mã shinãimamẽ a ẽ mato fe iyoxõ a ẽ mato yoipaoni keskara? 6 Akka mã mã tãpia nã chaka finakõia Epa Niospa nẽtefayoa, fena oyoyamanõ. Nãskafiax chipo oxii Epa Niospa anã nẽtefayamaino. 7 Nã noikaspamis Epa Niospa nẽtefayoano fena oyoima. Chipo oxii Epa Niospa anã nẽtefayamaino. Akka oyoamano nã aõxõ afara chakafamisfãfe fomãpaiyoxikani. 8 Nãskakẽ nã chakafinakõia mã oano, nõko Ifo Jesús ãfe axfapa xoõ atakĩ retekĩ mapokõi fataxii. 9 Nõko Ifãfe reteyoamano nã yora chakafinakõiato Satanáõxõ afama mĩshtifo faxii afarafo afeskarafakĩ ato parayanã. 10 Nãskaxõ afarafo afeskarafakĩ ato pãraxii a nikaifo, nãskakẽ nã nikakanax afe nã omiskĩskõipakenakafo mẽra foxikani. Nãfãfe Niospa mekakõi nikayamakãta, ãfe meka sharari noimisfoma Nios fe ipaxakakĩma. Nãskakẽ nã omiskõipakenakafo mẽra foxikani. 11 Nãskakẽ Niospa anã ato yoipaima ãa ato paranõfo, a ato paramisfãfe ato yoiaifo keskara nikakõiaifono. 12 Nãskakẽ nãfãfe Niospa mekakõi nikayamakãta, tsoarikai aõ noimisma. Askatamaroko afara chaka fisti fichipaiyaifono Epa Niospa nã omiskõipakenakafo mẽra ato potaxii nã ato paramisfo fe omiskõipakexanõfo.

13 Efe yora mĩshtichi, taekõifakĩ Epa Niospa mato noikĩ mato katoni afe mã ipaxanõ. Nãskakẽ ãfe Yõshi Sharaõxõ mato ifini afe yora mã inõ, Jesúsnoa mã chanĩmara faino. Nãskakẽ mẽxotaima nõ Nios aicho famis mato shinãkĩ. 14 Nãskakẽ ãfe meka shara nõko Ifo Jesucristoõnoa nõ mato yoiaino nokoõxõ mã mã tãpikõia. Nãskaxõ mã chanĩmara faino ãfe Fake Jesucristo otofani keskafakĩ matori õtofaxii a ika ano mã afe ipaxanõ.

15 Nãskakẽ efe yora mĩshtichi, nã nõ mato yoimis anorikõi nikafafãikãfe. Akka anoriyamakẽ afo nikayamakãfe. Nã nõ mato yoipaoni keskara nã fisti chanĩmara fayanã, a nõ mato kirika kenexoki nõ mato yoini keskarari shinãfafãikãfe. 16 Nõko Ifo Jesucristo feta nõko Epa Niospa noko noikĩ, nõko õiti mẽraxõ noko inimamakõinõ. Nãskakẽ nõ tãpitiro noko potanakama nõ afe ipaxanõ. 17 Mãto õiti inimamakõikãfe mato imasharakõiaino. Nãskaxõ afara afeskara afiaino ato yoisharakõita mã ato axosharafafãixikakĩ.