1 Per ndxe'leque', mèn huesen por cón che'n Crist, co'se' mbalen loo gu' ner vez, no co'se' mdoodiz non gu', no co'se' mblon yalbàn loo gu', no co'se' mdethen cón che'n Diox loo gu', ne'ndoodisten gáp gáp di's loo gu'. Ne' ne' ngòon làth gu' xal mèn co' nde'f di's arid ndxác. 2 Co'se' ngòon làth gu'a, ne'ndoode lezon nglu'en daa loo gu' xal thìb mèn co' anze'f ndxác cón che'n chol con'. Ndxe'leque', mdoo lezon mblu'en loo gu' ante cón che'n Jesucrist co' nac di's cón che'n xá mod no cón che'n chonon nguth yub Jesucrist loo cruz. 3 Co'se' ngòon làth gu', nonque' gu' no naneeque' gu' ngòc daa mèn co' ne'ngode valor loo. Ngo no lezon no ale mxi'th daa co'se' mdoon loo gu'. 4 Ne' ne' ndoodizen, ne' ne' ngon yalbàn loo gu' con di's xal ndyoodi's mèn co' ndli cuent axta arid ndxác par mdub yéc gu' no par ngòo yéc gu' loo cón che'n Crist. Ndxe'leque', Diox mblyath no daa par mbuàal Xpii Natú' yéc gu' no lezo' gu' par nguaa'd di'sa loo gu'. No ngola's gu' di's ndac co' mblon yalbàn loo gu'. 5 Tataa mblin par gàca loo gu' le' mod co' ndxela's gu' loo Diox por cón che'n Jesucrist ngòc loo gu' ante por cón che'n con' roo con' xèn che'n Diox. Mod co' ndxela's gu' loo Diox por cón che'n Jesucrist ne'ngàcte loo gu' por cón che'n di's co' mdoodi's mèn co' nde'f di's ndxác loo izlyo' ndxè'.

6 Per mèn co' huen huen ndxòn cón che'n Crist no co' huen huen mté'th cón che'n Crist par ndyubdi'sque' mèna loo cón che'n Crist co' ndxela's mèn, loo mèna ndyoodi's nu' cón che'n Crist xalque' ndlyath no Crist nu' par ndxác nu'. Per inacte con' co' ndxác nu' ndxè' xal nac con' co' ndxác mèn co' alithe naban le'n tiemp ndxè'. Ne' ne' inaca xal nac yalndxác che'n mèn co' ñibe' loo xtàa mèn loo izlyo' ndxè'. Per cón che'n mèn co' ñibe' loo xtàa mèn loo izlyo' ndxè', mèna lyux no lith no mèna loo yalndxác co' ndxác mèna. 7 Ndxe'leque', di's co' ndyoodi's nu' nac cón che'n yalndxác che'n Diox. Con che'n yalndxác co' ndyoodi's nu' ndxè', le'i be' nzo casloo loo huax mèn axta nalle'. Le'i ngo casloo loo rye mèn ndoore' yi'th Tad Jesucrist loo izlyo'. Cón che'n yalndxác che'n Diox ndxè', Diox mxo'f zin'a loo nu' xal mdoo lezo' Diox par gàc yalndxác ndxè' thìb con' roo no thìb con' xèn loo ryete na' co' ndxela's thidtene. 8 Cón che'n yalndxác co' ngo casloo ndxè', casque' nec thìb mèn co' ñibe' loo xtàa mèn loo izlyo' tiemp ndxè', yende chó mèna nanee no nda' mèna cuent cón che'n yalndxáca. Tac chele' mèna ngnon no ngnee mèn cón che'n xá mod susque' ndxác Diox, ngobe'en ne'nque'de mèna Tad Crist, co' ñibe' loo alux con' no co' nquée xnìi tín', loo cruz. 9 Per ndxe'leque', ndub di's loo libr co' nac xti's Diox co' mbez:

11 Tac ¿chó nac thìb mèn co' nzo làth xtàa mèn co' non cón che'n xtùuz co' ndli tedib mèn, à'? Yende chó mèn nona, ¿lé'? Ndxe'leque', leque mèn co' ngue li xtùuz non cón che'n co' ngue li mèna xtùuz. Lomisque' mod ne, yende chó mèn non cón che'n con' co' ndli Diox xtùuz. Ndxe'leque', ante Xpii Natú' che'npe' Diox non cón che'n con' ndli Diox xtùuz. 12 Co'se' ngola's na' loo Tad Jesucrist, ne'ntolode mnibe' chol xpii che'n izlyo' loo na'. Ndxe'leque', mtlo mnibe' Xpii Natú' co' ngro' loo Diox co' ngulàa loo na' par ta' na' cuent no par non na' cón che'n con' ndac co' angndli Diox loo na'. 13 Cón che'n con' ndac ndxè' co' angmbli Diox loo na' ndyoodi's nu'. Per indyoodi'ste nu' cón che'n con' ndac ndxè' xal mèn co' ñaaleque' loo ndxác. Ndxe'leque', nu' ndlu' loo mèn xalque' nac xley' co' ndlu' Xpii Natú' loo nu', co' nee di's, ndlu' nu' ley' co' nac xley' che'n Crist loo mèn co' ndxònque' cón che'n Crist no mèn co' mté'thque' cón che'n Crist par ndubdi'sque' mèna loo Crist.

14 Per mèn co' alithe nzi ban loo cón che'n izlyo' ndxè', mèna indxònte cón che'n con' co' ndlu' Xpii Natú' che'n Diox loo mèna. Mèna nden' le' cón che'n Xpii Natú' nac co' ncàb loo mèn nquée mbii yéc mèn. Cón che'n con'a yende mod ta' mèna cuent cón nee di'sa tac ante loo mèn co' ñibe' Xpii Natú' ndryo xo'f cón che'n Xpii Natú'. 15 Per loo mèn co' ñibe'que' Xpii Natú', Xpii Natú' ndli par leque mèna li xtùuz co' huenleque' no tub rez mèna cón che'n ryethe con'. Per ndxe'leque', mèn co' alithe nzi ban loo cón che'n izlyo' ndxè', yende chó cón che'n mèna par ryal no tub rez mèna cón che'n mèn co' ñibe' Xpii Natú' loo. 16 Loo libr co' nac xti's Diox ndub di's co' mbez: ¿Xá ñaa thìb mèn co' nzo loo izlyo' co' ta' cuent no co' non xal nac xtùuz co' ndli Diox xtùuz, à'? Yende chó mèn nona, ¿lé'? Lomisque' ne, ndub di's loo libr co' nac xti's Diox, ne, co' mbez: ¿Xá ñaa thìb mèn co' nzo loo izlyo' co' lu' loo Diox cón che'n con' li Diox, à'? Yende xàa. Mastale' tataa ndub di's loo libr co' nac xti's Diox, na' nonque' no naneeque' na' le' na' ndli xtùuz xal ndli Crist xtùuz.