1 Por cona, co'se' guneen ya ne'xecte daa tolo que tee xà'en loo gu', mblin xtùuz no mdoo lezon mbyan' ante daa le'n ciuda Aten 2 par tel'en Timote, co' ndxàc huesen por cón che'n Crist, par nee Timote máa gu' par nedrè' tac Timote nac thìb mbi' co' nxo'f zin' zin' co' nac che'n Diox. Timote ndli zin' con daa ned ngue tee gon yalbàn cón che'n di's ndac cón che'n Crist co' ndlu' xá mod lyá' mèn loo con' ryes. Mtel'en Timote loo gu' par yi'th li nèe Timote gu' no par co'x Timote loo gu' no li Timote par ye'th lezo' gu' loo cón che'n con' co' ndxela's gu' loo Crist. 3 Tataa ta' Timote cuent loo gu' par ne'tyoo xà'de lezo' nec thìb gu' loo cón che'n Crist por cón che'n yalndyub ngu's no ngòc nguàal con' co' ndxàc loo gu'. Leque yub gu' nda'le' cuent co' huenleque' le' Diox mdoo na' par càba loo na' tyactìi na' por cón che'n Crist. 4 Más de cona, co'se' be' ngo non gu'a, mdan cuent loo gu' le' na' tyactìique'. Tataaque' ndxàca loo na' nalle' xalque' mdan cuenta loo gu'a. 5 Por cona, daa ne, co'se' ne'tolode nxec daa mque tee xà'en loo gu' no inonte daa máa gu', cona mtel'en Timote par li lazen xá mod tolo nque tee ban gu' loo con' co' ndxela's gu' loo Crist. Tac anze'f ndyóon no nda noque' lezon ne'stolque' pá, chàa, mbi'th Mebizya, mbi'th mdobya' Mebizya gu'. No thìb descuid càba loo gu' anxle' gàc zin' co' mbi'th xo'f zin'en loo gu'.

6 Per nalle' Timote ndye'thle', ngua Timote loo gu' le'n ciuda Tesalónica. No nabe'ste mda' Timote cuent loo nu' le' gu' huenque' nziri' no toloque' ndxela's gu' loo Crist no loo cón che'n Crist. Mda' Timote cuent, ne, nzi que'que' lezo' gu' ñèe gu' hues xtàa gu'. Mda' Timote cuent loo nu' le' gu' nte'que' lezo' cón che'n nu', ne. No mda' Timote cuent loo nu' anze'f ndlya's gu' ñee gu' máa nu' xalque' ndlya's nu' ñee nu' máa gu', ne. 7 Por cona, xalque' mèn co' ndxàc huesen por cón che'n Crist, mastale' ndyactìi nu' no ndub ngu's mèn nu', co'se' mbìn nu' cón che'n cuent co' mda' Timote loo nu' cón che'n gu', ryete nu' mdyac lezo' no mbye'th lezo' nu' axta plóthe. No ndyac lezo' nu' cón che'n gu' tac, lìcque', mbli nèe gu' gu' loo con' co' ndxela's gu' loo Diox no loo cón che'n Diox. 8 Con' co' ndxàc loo gu' ba' ndli nden' nu' xal mèn co' ngro xban tac gu' nzi li nèeque' gu' loo cón che'n Tad Crist. 9 Por cona, axta ne' ne' gác gab nu' Diox quix non U', Diox, loo Diox co'se' mbez nu' Diox por cón che'n gu' tant ndyac lezo' nu' por cón che'n gu' co' ndli gu' ndxàc loo nu' loo Diox. 10 Imbedte nu' no indxathlaste nu' mbez nu' Diox ze no yál' par ta' Diox lugar loo nu' yi'th nèe nu' máa gu' no par tolo ta' nu' cuent cón che'n di's ndac co' be' ndxàc falt té'th gu', par tolo li nèe gu' gu' loo con' co' ndxela's gu' loo Crist no loo cón che'n Crist.

11 Anze'f ndlya's nu' le' yub Diox xud na' no Tad Jesucrist na' xal' ned xal' yó' loo nu' no lyath no Diox no Tad Jesucrist nu' par yi'th nee nu' máa gu' par nedrè'. 12 No ndlya's nu' le' Diox li par tolo té'th gu' cón che'n Diox no tolo que' lezo' gu' ñèe gu' thìb xtàa gu' no tedib xtàa gu' no que' lezo' gu' ñèe gu' rye mèn xalque' nque' lezon ñèen gu'. 13 No ndlyazen le' Diox li nèe xtùuz gu' no lezo' gu' loo cón che'n Crist. Ndlyazen le' gu' gàc mèn co' thidteneque' ngro xà' loo cón che'n xab izlyo' par gàc gu' che'npe' Diox. Le' sya, co'se' gàc huiz co' yi'th no Tad Jesús ryethe mèn co' nguth, mèn co' ryo xban ladpe' huiza, mèn co' ngro xà' loo cón che'n xab izlyo' co' ngòc che'npe' Dioxa, nec thìb mod no nec tedib mod ne'gàpte gu' nec thìb dol loo Diox.