1 Per cón che'n tiemp, co' nee di's, lín' no mbe' no huiz co' gàc co'se' yi'th Tad Crist, inquinte arid par que'en ye's cón che'n lín' no tiemp loo gu', ndyaquen, mèn huesen por cón che'n Crist. 2 Gu' nonque' no nda'que' gu' cuent co' huenleque' cón che'n huiz co'se' yi'th Tad Crist gàc huiza thìb huiz co' yende chó mèn ta' cuent no co' yende chó mèn mbed. Huiza gàc xal co'se' ndlyàa huan' liz mèn thìb tiemp co'se' yende chó mèn non yi'th huan'. 3 Tac co'se' gab mèn loo xtàa mèn co' ne'tyalte yila's loo Tad Crist: Nase nagàl nziri' mèn, ¿lé'? Yende cón ndyac mèn no yende cón ndli xol loo mèn, ¿lé'? Sya, látha, chàa, gàc con' ryes loo mèn. Lyux mèn no gàc yalnè co' ten' mèn xal co'se', chàa, nde thìb yalnè loo thìb xa'got co' ndoo nac xin' par gáal mbed. Ne'lyá'de mèn loo yaltìi co' gàc loo mèn huiz co' tetìi Diox no zib quìi Diox mèn. 4 Per gu', mèn huesen por cón che'n Crist, inacte gu' mèn co' ncuau loo no co' ncuau yéc par cue cuau lezo' gu' par, chàa, gàc huiz co' yi'th Tad Crist loo gu' xal co'se', chàa, ndlyàa huan' liz mèn. 5 Tac ryete gu' nacque' mèn co' ndyub xnìi yéc no mèn co' ndyub xnìi lezo' loo cón che'n Diox co' nac con' lìcpe'. Inacte gu' mèn co' ncuau yéc no mèn co' ncuac loo co' nzi tee ban loo yál'cuau. 6 Por cona, ne'gàcte na' mèn co' nzi cuau lezo' xal mèn co' indxela'ste co' nac xal mèn co' nzi yàt, co' nee di's, nzi tee ban mèn loo yál'cuau. Ndxe'leque', nalas cue na' no ndxe'sleque' cue na' tac nde zin' gaxle' tiemp yi'th xi Crist na'. 7 Tac gu' naneeque', mèn huesen por cón che'n Crist, lìcque', mèn ndxàt yál'. No mèn co' nac mènguy, ndyuuz mèna yál'. 8 Per por part cón che'n na', na' nacque' mèn co' nzi tee banque' loo cón che'n Tad Crist xal mèn co' nzi tee ndxáal ze. No ndxe'sleque' ndxàal cue ban na'. Ne'gàcte na' xal mèn co' ndyuuz yál'. Ndxe'leque', ñibe' na' loo lezo' na' ante que tee ban na' loo con' ndac. Lìcque', ndxàal gàp na' yalxla's tín' loo Diox no que'que' lezo' na' Diox no que'que' lezo' na' ñèe na' hues xtàa na' par ne'yiza'de na' na' loo cón che'n Diox xal ndli thìb solndad co'se' ntau' solndad pech solndad con camis yi'f solndad par ne'yaa'dte cuchi lad solndad no par ne'yidin'te bal lad solndad. Tataa mod, ne, cue quee lezo' na' loo con' ndac co' gàc loo na' co'se' yi'th xi Crist na' tac na' yòo ban no Diox thidtene yiloa. Tataa li na' par gàca loo na' loo cón che'n Tad Crist xal ndli thìb solndad co'se' ndub solndad thìb sombrel yi'f yéc solndad par tau' sombrel yéc solndad loo con' ryes. 9 Tac Diox ne'mbecte na' loo cón che'n Crist par tetìi Diox na' co'se' tub rez Diox cón che'n rye mèn. Ndxe'leque', mbli Diox mblyá' na' loo con' ryes por cón che'n Tad Jesucrist na'. 10 Tad Jesucrist nguth por cón che'n na' par gàca loo na' co'se' zin huiza, que naca naban na', que naca nguth na', thidteneque' yòo ban no na' Tad Jesucrist. 11 Por cona, ngue bez nu' loo gu': Toloque' bli gu' par ye'th lezo' thìb hues xtàa gu' no tedib hues xtàa gu'. No bli gu' par tolo té'th no tolo tyubdi's thìb hues xtàa gu' no tedib hues xtàa gu' loo cón che'n Tad Jesucrist xalque' ndli gu'.

12 Ña'ben loo gu', ne, mèn huesen por cón che'n Crist: Bli gu' cas no gòp gu' mod loo mèn co' ndxàc hues na' co' nxo'f zin' cón che'n Tad Crist làth gu', mèn co' ndyoo ner no co' ndyoo naa loo gu', mèn co' nco'x cón che'n Tad Crist loo gu'. 13 Ndlyazen bli gu' cas loo mèna no toloque' que' lezo' gu' ñèe gu' mèna axta plóthe por cón che'n zin' co' ngue xo'f zin' mèna loo gu' co' nac cón che'n Crist. No nabe'ste gure ban ndac gu' làth xtàa gu' no toloque' gure ban gu' rye nda gu' no rye ndye'th gu' làth xtàa gu'.

14 Lomisque' ne, mèn huesen por cón che'n Crist, ñibe'en no tan'en di's ndxè' loo gu': Fco'x gu' ndxep loo mèn no gunii gu' ndxep loo mèn nado' di's nado' cuent, loo mèn co' nzi tee za'f. Ftegán gu' lezo' mèn no bli gu' par ye'th lezo' mèn co' nzi tee ndoo xà' lezo' loo cón che'n Crist. Blyath no gu' mèn co' nguu's xtùuz no co' nguu's lezo' loo cón che'n Crist. Ale, fxec yèe gu' no fcha'la's gu' gunèe gu' ryete xtàa gu'.

15 Anderhuen gu' no chó Diox chó nee gu'. Ne'ta'de gu' lugar co xtàa leque gu' con' ye'rsin' co' ndli no xtàa gu' gu' xal ngo xtàa xtàa gu' con' ye'rsin' co' ndli taamas mèn loo xtàa mèn. Ndxe'leque', fcua'n gu' mod tolo li gu' con' ndac loo thìb xtàa gu' no loo tedib xtàa gu' no loo ryete mèn dib athu loo izlyo'.

16 Fxo'f nde' fxo'f ndla' lezo' gu' loo ryethe con' co' ndli nxi lezo' gu'. 17 Ne'cuedte gu' no ne'lá'de gu' toloque' gurez gu' Diox cón che'n ryethe con'. 18 Guuz gu': Diox quix U', Diox, loo Diox cón che'n ryethe con' ndxàc loo gu'. Tac con'aque' nac co' nee lezo' Diox no co' ndlya's Diox li gu' tac gu' nac che'npe' Crist Jesús.

19 Ne'tau'te gu' no ne'càde gu' loo Xpii Natú' no loo con' ndlya's Xpii Natú' li Xpii Natú' loo gu' par ye'th lezo' gu' loo cón che'n Tad Diox. 20 Ne'tè'bte gu' no ne'xìis node gu' di's co' ngo mèn yalbàn xal ñibe' Xpii Natú' che'n Diox loo mèn par co mèna yalbàn loo gu'. 21 Fteche ftexyath gu' xtùuz gu' no lezo' gu' loo ryethe con'. No bli gu' preb loo ryethe con' par ñee gu' ñeene' ché' huen naca o ché' ihuente naca. Làth xtau'a, fcui gu' con' ndac par li gu' con' ndac. 22 Fque tee xà' gu' loo ryethe con' ye'rsin'.

23 Diox co' ndli le' na' nagàl yo lezo' loo Diox par cue ban na' rye nda na' no rye ndye'th na' loo xtàa na', Diox li le' gu' gàc mèn co', lìcque', ngro xà' loo cón che'n xab izlyo', co' ngòc che'npe' Diox. Tataa quenap Diox xpii gu' no alm gu' no lad gu' par yende chó con' yizi'f no yiga's loo gu' no yende chó quexù' gu' co'se' gàc huiz yi'th xi Tad Jesucrist na' na'. 24 Diox co' mcui gu', Diox lique' le' ryete con' ndxè' gàcque' loo gu'. Loo Diox ndxàp na' yalxla's no ndxela's na' thidtene.

25 Mèn huesen por cón che'n Crist, gurez gu' Diox por cón che'n nu'.

26 Gunii gu' Diox loo ryete mèn hues na' por cón che'n Crist xalque' nac mod co' nii gu' Diox loo xtàa gu'.

27 Daa ngue ñibe' con' ndxè' loo gu' xal ñibe' Crist loon par niina loo gu'. Blab gu' cart ndxè' loo taamas mèn co' nac hues na' por cón che'n Crist co'te' nzo gu', ndee gu'.

28 Ndlyazen le' Tad Jesucrist toloque' li anggàc con' ndac loo gu'. Taandxè' gàca.