1 Daa Pab co' ngue lezi'f por cón che'n Tad Crist, ña'ben loo gu': Fque tee ban gu' xal ndxàal li mèn, mèn co' Diox mblec loo cón che'n Diox xalque' mcui Diox gu'. 2 Gòc gu' mèn nado' co' indye'ste. Fque' lezo' gu' gunèe gu' hues xtàa gu'. Gòc gu' mèn co' ncha'la's. No gòp gu' mod con mèn co' nac hues xtàa gu' xalque' mèn co' nque' lezo' ñèe hues xtàa mèn. 3 Bli gu' fuerz par thidte que tee ban gu' xal ñibe' Xpii Natú' che'n Diox loo gu'. Fque tee ban gu' rye nda gu' no rye ndye'th gu' no par thidte gàc gu' loo Diox. 4 Tac mèn co' ndxela's loo Crist no loo cón che'n Crist, mèna thidte ngòc loo Diox xal thidte ladpe' Crist. Thidte Xpii Natú' che'npe' Diox nzo. Lomisque' ne, loo thidte con' nzi quee lezo' na', con' co' li Diox loo na', co' nee di's, con' co' mbli nable' Diox gàc loo na' yiloa. 5 Thidte Tad Diox nzo. Thidte yalndxela's nzo. Thidte bautism nzo. 6 Lomisque', nzo thidte Diox co' nac xud na' co' ñibe' loo alux con' co' nziri'. Ndli Diox zin' loo ryethe con'a. Nzoque' Diox le'n lezo' ryete na', ne.

7 Mbli Diox loo thìb thìb na' ndxác na' li na' con' xal ndlya's Diox gác na' par ta' na' cuent loo xtàa na' cón che'n di's ndac xal mblya's Crist. 8 Por cona, mbez loo libr co' nac xti's Diox cón che'n Crist:

9 ¿Cón nee di's nguáp Crist loo bé', à'? Con'a nee di's ner ngulàa Crist le'n thìb ye'r co' anze'f na's co' nac axta xàn' le'n izlyo'. 10 Crist co' ngulàa le'n izlyo', leque yub Crist nac xa' co' mquée gáp loo bé' yiloa par hui' loo Crist ryethe con' co' ñibe' Crist loo bé'. 11 Leque yub Crist mbli angngòc con' ndac loo mèn. Crist angmbli le' ndxep mèn ngòc mèn co' mtel' Crist, co' ndxe' di's cón che'n Crist. Angmbli Crist le' taamas mèn ngòc mèn co' nde'th di's co' ndxab Diox. Angmbli Crist le' taamas mèn mblo yalbàn che'n di's ndac. Angmbli Crist le' taamas mèn ngòc pastor loo mèn. Angmbli Crist le' taamas mèn ngòc maistr co' ndlu' cón che'n Crist loo mèn. 12 Tataa mod mbli Diox le' mèna lu' loo ryete mèn co' ngro xà' loo cón che'n xab izlyo', mèn co' ngòc che'npe' Diox. Tataa mbli Diox par xo'f zin' mèn co' ngro xà' loo cón che'n xab izlyo', mèn co' ngòc che'npe' Diox, zin' co' nac rsin'pe' Diox. Mèna mxo'f zin' zin'a par tolo té'th mèn par tyubdi's ndac mèn loo Crist, co' nee di's, mèn co' nac loo Crist xal ladpe' Crist. 13 Mèna toloque' lu' loo mèn co' ngro xà' loo cón che'n xab izlyo', mèn co' ngòc che'npe' Diox, axtaque' thidte gàc na' loo yalxla's co' ndxàp na' loo Crist no axtaque' ñee na' no non na' ryethe con' cón che'n Crist co' nac xgan'pe' Diox. No tolo té'th na' cón che'n Diox par tyubdi's na' loo cón che'n Crist axtaque' gàc na' mèn co' nac xalque' nac Crist. 14 Chele'i taandxè' mod ndxàc loo na', ne'gàcte na' xal myen' bix co' ndli xtùuz chol con'. Ne' ne' gàc na' xal yix co' ndxe' mbii pál co'te' nxyo'f mbii loo cón che'n chol xley' mèn. Ndxàca loo ndxep mèn por xquin che'n chol mèn co' mcua'n mod, par nquedìi mèn mèna no nabe's ntoxcua' mèna yalgutyè' par quedìi mèn mèna. 15 Más huen gàca tyoodi's na' ante con' co' nac lìcpe' láth tolo que' lezo' na' ñèe na' hues xtàa na'. Tolo té'th ndac na' par tolo tyubdi's ndac na' loo ryete con' che'npe' Crist co' ñibe' loo na'. Ñibe'pe' Crist loo na' xal ñibe' yécpe' na' loo na'. 16 Loo cón che'n Crist nac na', co' nee di's, nac na' xal ladpe' Crist. Lada natoxcua'. Nac lada xal thìb con' co' huen natedó', co' nee di's, nayal' lada. Tac ryete lugar co'te' nayal' lad mèn nda' fuerz loo lad mèn. No thìb thìb lugar che'n lada ndli thìb zin' co' ndlyath no loo dib lad par li lada zin'. Tataa mod, ne, lyath no na' hues xtàa na' no que' lezo' na' ñèe na' hues xtàa na' par tolo té'th na' par tyubdi's na' loo cón che'n Crist.

17 Con' ndxè' niin loo gu', tá, no tolo ñibe'en loo gu' por lèe che'n Tad: Ya ne'tolode que tee ban gu' xal taamas mèn co' indlibe'de Diox. Tac ngue que tee ban mèna xal nee lezo' mèna loo co' nac xtùuz mèn co' intacte. 18 ¡Prob mèna izlyo'! tac nacuau yéc mèna no nacuau lezo' mèna. No indxàpte mèna yalnaban co' nac yalnaban co' ndli Diox que no mèn tac anze'f naxèn mèna no anze'f nachol' mèna tac naad no nguud lezo' mèna. 19 ¡Prob mèna izlyo'! tac leque mèna mbli par mdyuhuan yob yéc mèna por inthyonte mèna. No leque mèna ngulàa loo chol con' ye'rsin' co' ndyub yo'f lezo' mèna li mèna. No axta con gust ndli mèna ryethe con' ye'rsin' no con' zab tac tataa mblya's mèna li mèna. 20 Per ndxe'leque', gu' ne'nté'thte cón che'n Crist tataa, ¿lé'? 21 Chele' gu', lìcque', mbìn di's cón che'n Crist, mté'thque' gu' co' nac cón che'n Crist xal nac Crist lìcpe' no co' nac con' lìcpe' co' nzo loo Crist, ¿lé'? 22 Le' cón che'n mod ye'rsin' co' ngòc mod co' mque tee ban gu' thìb cua'a na, blá' gu' ryete mod gox ye'rsin' co' nac mod cap co' mquedìi gu' thìb cua'a loo cón che'n xab izlyo'. Loo yalnaban co' mban gu' co' ngòc co' nduhua nee lezo' gu', nac co' angnquedìi mèn loo izlyo' ndxè'. 23 Per nalle' naquin gàc gu' xal mèn cub loo con' co' ndli gu' xtùuz no loo con' co' nden' gu' le'n lezo' gu'. 24 Gòc gu' xal mèn cub loo mod co' nzi ban gu' nalle' le' gu' nac mèn cub tac Diox mbli nacque' gu' mèn cub. Por cona, fque tee ban lu' gu' loo mèn le' gu', lìcque', nzi tee ban lìque' no nambìique' nzi tee ban gu' loo Diox.

25 Por cona, ngue niin loo gu': Ne'toxcua'de gu' yalgutyè'. Ndxe'leque', ftoodi's thìb thìb gu' con hues xtàa gu' ante co' nac con' lìcpe' tac ryete na' thidte nac loo Crist no loo cón che'n Crist xal thidte ladpe' Crist.

26 Chele' gu' yecloo, ne'ta'de gu' lugar cua'n gu' xtol gu' látha. Ne' ne' co gu' xyàn lezo' gu' nen tiemp ñèe gu' hues xtàa gu'. 27 Ne' ne' ta' gu' lugar cobya' Mebizya gu' thidtene.

28 Gu' co' mbli huan' thìb cua'a, ya ne'tolode li huan' gu'. Ndxe'leque', bli gu' zin' con ya'pe' gu' co' nac zin' ndac par que no gu' con' ta' gu' anxle' loo hues xtàa gu' co' naquin con'.

29 Ne'tyoodi'ste gu' nec thìb di's zab. Ndxe'leque', ftoodi's gu' di's ndac par tataa mod lyath no gu' hues xtàa gu' no par li nèe hues xtàa gu' lezo' hues xtàa gu' loo cón che'n Diox co'se' ndxòn hues xtàa gu' di's co' ndyoodi's gu'. 30 Ne'texide gu' lezo' Xpii Natú' che'n Diox. Xpii Natú' ngue ten gu' par nac gu' xal mèn co' ngue sell lad gu' par ndxàc be' gu' axta zin huiz co' gàc huiz co'se', sin falt, telá' Diox na' loo ryethe con' ryes thidtene.

31 Biiche xà' gu' loo ryethe con' co' nac xèn xyàn, no loo ryethe con' co' nac ayen di's ayen cuent co'se' ngyoo gu', no cón che'n co'se' ndxòo xyàn lezo' mèn, no ryethe con' co' nac con' ye'rsin'. Ryethe con' ndxè' nac co' ndli ndyoo xà' lezo' gu' ñèe gu' hues xtàa gu'. 32 Ndxe'leque', gòc gu' mèn ndac co' ndlyat lezo' ñèe thìb hues xtàa gu' no tedib hues xtàa gu'. Fteri'th ftecan' gu' xtol thìb hues xtàa gu' no tedib hues xtàa gu' co' mbli hues xtàa gu' loo gu' xal mton' Diox xtol gu' por cón che'n Crist.